ຟີລິບປິນ ປະສົບກັບໄພນໍ້າຖ້ວມ ປະຊາຊົນຫຼາຍສິບພັນຄົນຕ້ອງຍົກຍ້າຍອອກຈາກເຮືອນ

ຂ່າວລະບຸວ່າ: ໂຮງຮຽນ ແລະ ສຳນັກງານ ໃນນະຄອນຫຼວງມະນີລາ ແລະ ບັນດາແຂວງອ້ອມຂ້າງໄດ້ປິດການເຮັດວຽກ ຫຼັງຈາກຝົນຕົກໜັກໃນຕອນຄໍ່າຂອງວັນທີ 21 ກໍລະກົດ ຜ່ານມາ, ເຮັດໃຫ້ແມ່ນໍ້າມາຣິກິນາລົ້ນຕາຝັ່ງ. ປະຊາຊົນຫຼາຍກວ່າ 23,000 ຄົນທີ່ອາໄສຢູ່ລຽບຕາມແຄມແມ່ນໍ້າໄດ້ຖືກຍົກຍ້າຍອອກໄປໃນຕອນກາງຄືນ, ໂດຍພາກັນໄປລີ້ໄພຢູ່ໂຮງຮຽນ, ຫ້ອງໂຖງສາທາລະນະ ແລະ ເດີ່ນທີ່ມີຫຼັງຄາປົກຄຸມ, ໃນຂະນະທີ່ອີກ 25,000 ຄົນ ໄດ້ຖືກຍົກຍ້າຍອອກຈາກເມືອງເກຊອນ ແລະ ເມືອງກາລູກັນ ໃນເຂດນະຄອນຫຼວງມະນີລາ.

ທຳນຽບປະທານາທິບໍດີ ໄດ້ໂຈະການກະກຽມທັງໝົດສຳລັບການຖະແຫຼງນະໂຍບາຍປະຈຳປີ ຄັ້ງທີ 4 ຂອງທ່ານ ເຟີດິນານ ມາກອສ ຈູເຈຍ ປະທານາທິບໍດີຟີລິບປິນ ໃນອາທິດໜ້າ ເນື່ອງຈາກປະເທດກຳລັງປະສົບກັບໄພນໍ້າຖ້ວມຢ່າງໜັກໜ່ວງ ແລະ ໄດ້ໂຈະການຮຽນ - ການສອນ ແລະ ວຽກງານຂອງລັດຖະບານໃນນະຄອນຫຼວງມະນິລາ ແລະ ຫຼາຍໆແຂວງໃນວັນທີ 23 ກໍລະກົດນີ້ ເນື່ອງຈາກຝົນຕົກໜັກຈາກລົມມໍລະສຸມຕາເວັນຕົກສ່ຽງໃຕ້.

ສູນປະຕິບັດງານສຸກເສີນລະບຸວ່າ: ມີແມ່ຍິງອາຍຸສູງຄົນໜຶ່ງ ແລະ ຄົນຂັບລົດ ຖືກພັດຕົກລົງໃນແມ່ນໍ້າ ໃນຂະນະທີ່ພະຍາຍາມຂ້າມຂົວໃນເມືອງກາລູກັນ, ອົງການກູ້ໄພມາຣິກິນາລະບຸວ່າ: ລະດັບນໍ້າໃນແມ່ນໍ້າສູງເຖິງ 18 ແມັດ ເຖິງແມ່ນວ່າລະດັບນໍ້າຖ້ວມໄດ້ເລີ່ມຫຼຸດລົງໃນຕອນເຊົ້າຂອງວັນທີ 22 ກໍລະກົດ ແຕ່ປະຊາຊົນຫຼາຍພັນຄົນຍັງບໍ່ສາມາດກັບຄືນໄປເຮືອນຂອງເຂົາເຈົ້າໄດ້.

ຄະນະຄຸ້ມຄອງ ແລະ ຫຼຸດຜ່ອນຄວາມສ່ຽງໄພພິບັດແຫ່ງຊາດ ໃຫ້ຮູ້ວ່າ: ຝົນມໍລະສຸມທີ່ຕົກຢ່າງຕໍ່ເນື່ອງໄດ້ເຮັດໃຫ້ມີຜູ້ເສຍຊີວິດ 3 ຄົນ ແລະ 7 ຄົນຫາຍສາບສູນຢູ່ທາງພາກກາງ ແລະ ພາກໃຕ້ຂອງຟີລິບປິນ ນັບຕັ້ງແຕ່ພາຍຸວິພາ ໄດ້ພັດຜ່ານປະເທດໃນວັນທີ 18 ກໍລະກົດ ຜ່ານມາ.