ຂອງກໍາມາທິການ ກສຕສ, ເສນາທິການຊ່ວຍວຽກຂອງຄະນະກໍາມະການເສດຖະກິດ, ແຜນການ ແລະ ການເງິນ ຂອງສະພາປະຊາຊົນຂັ້ນແຂວງ (ສພຂ) 11 ແຂວງ: ນະຄອນຫຼວງວຽງຈັນ, ຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ, ວຽງຈັນ ແລະໄຊສົມບູນໄດ້ຈັດຂຶ້ນໃນວັນທີ 5-6 ສິງຫາ2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ ຜູ້ຊີ້ນໍາວຽກງານເສດຖະກິດ.
ຈຸດປະສົງເພື່ອສ້າງຄວາມຮັບຮູ້ ແລະ ຄວາມເຂົ້າໃຈຕໍ່ວຽກງານການປະເມີນຜົນກະທົບທາງດ້ານສິ່ງແວດລ້ອມ, ສັງຄົມ ແລະ ທໍາມະຊາດ ໃຫ້ແກ່ສະມາຊິກສະພາ ແລະ ວິຊາການ ໃນການຄົ້ນຄວ້າ, ວິເຄາະ, ວິໄຈ ແລະ ສັງລວມບັນຫາຕ່າງໆໃຫ້ແກ່ຄະນະປະຈໍາສະພາແຫ່ງຊາດ (ຄປຈສພຊ) ແລະ ຄະນະປະຈໍາສະພາປະຊາຊົນຂັ້ນແຂວງ; ແລກປ່ຽນບົດຮຽນ,ຂໍ້ມູນກ່ຽວກັບການຈັດຕັ້ງປະຕິບັດວຽກງານການປະເມີນຜົນກະທົບທາງດ້ານສິ່ງແວດລ້ອມ, ສັງຄົມ ແລະ ທໍາມະຊາດ ຂອງບັນດາໂຄງການລົງທຶນ ທັງເປັນການສ້າງຄວາມເຂັ້ມແຂງທາງດ້ານວິຊາການໃຫ້ແກ່ພະນັກງານຂອງ ສພຊ ແລະ ສພຂ.
ທ່ານ ສົມມາດ ພົນເສນາ ໄດ້ມີຄໍາເຫັນກ່າວເປີດກອງປະຊຸມວ່າ: ຕະຫຼອດໄລຍະຜ່ານມາ ຄະນະປະຈໍາສະພາແຫ່ງຊາດ ໄດ້ຖືສໍາຄັນວຽກງານຍົກສູງຂີດຄວາມສາມາດໃຫ້ແກ່ສະມາຊິກສະພາ ແລະ ວິຊາການທີ່ເປັນເສນາທິການໃຫ້ ສພຊ ແລະ ສພຂ ໂດຍມີການຊຸກຍູ້, ສົ່ງເສີມ ແລະ ອໍານວຍຄວາມສະດວກໃຫ້ແກ່ວຽກງານຍົກສູງສ້າງຄວາມສາມາດ ໃຫ້ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ແນໃສ່ຮັບປະກັນການປະຕິບັດພາບົດບາດຂອງ ສສຊ ແລະ ສສຂ ກໍຄືຂອງ ສພຊ ແລະ ສພຂ ໃຫ້ມີປະສິດທິພາບ ແລະ ມີປະສິດທິຜົນສູງຂຶ້ນເລື້ອຍໆ ໂດຍສະເພາະການສ້າງ, ປັບປຸງກົດໝາຍ, ນິຕິກຳໃຕ້ກົດໝາຍ (ດ້ານນິຕິບັນຍັດ), ການຕົກລົງບັນຫາສໍາຄັນພື້ນຖານຂອງປະເທດຊາດ ແລະ ຂອງທ້ອງຖິ່ນ, ການຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຂອງບັນດາອົງການຈັດຕັ້ງລັດຂັ້ນຕ່າງໆຜ່ານ ສພຊ ແລະ ສພຂ,ດ້ວຍເຫດນີ້, ຈຶ່ງມີຄວາມຈໍາເປັນຕ້ອງໄດ້ຝຶກອົບຮົມຍົກສູງສ້າງຂີດຄວາມສາມາດ ແລະ ຄວາມຮັບຮູ້ທາງດ້ານວິຊາການສະເພາະດ້ານໃຫ້ແກ່ສະມາຊິກສະພາ ແລະ ວິຊາການທີ່ກ່ຽວຂ້ອງ ໃຫ້ເລິກເຊິ່ງແລະກວ້າງຂວາງຫຼາຍຂຶ້ນກວ່າເກົ່າ.
ໃນກອງປະຊຸມ,ທ່ານ ນາງ ປິ່ງຄຳ ລາຊະສິມມາ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ເຜີຍແຜ່ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍຂັ້ນຕອນການພິຈາລະນາແຜນພັດທະນາພະລັງງານໄຟຟ້າ ແລະ ແຮ່ທາດແຫ່ງຊາດ, ໂຄງການສຳປະທານພັດທະນາໄຟຟ້າ, ບໍ່ແຮ່ ແລະ ໂຄງລ່າງພື້ນຖານ ສະບັບເລກທີ 02/ຄປຈ, ລົງວັນທີ 6/1/2022,ຮັບຟັງການສະເໜີບົດຈາກຜູ້ຕາງໜ້າຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃນຫົວຂໍ້: ຂັ້ນຕອນ ແລະ ການປະເມີນລາຄາທີ່ດິນ,ຂັ້ນຕອນ ແລະ ວິທີການຄົ້ນຄວ້າກ່ຽວກັບການປະເມີນຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດ ທີ່ຕິດພັນກັບການພັດທະນາໂຄງການ ເຊັ່ນ:ໂຄງການພະລັງງານໄຟຟ້າ,ໂຄງການຂຸດຄົ້ນແຮ່ທາດ ແລະ ການພັດທະນາໂຄງລ່າງພື້ນຖານ,ຂັ້ນຕອນ ແລະ ວິທີການຄົ້ນຄວ້າລາຄາຫົວໜ່ວຍຊົດເຊີຍຕໍ່ຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດ. ຈາກນັ້ນ, ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ປະກອບຄຳຄິດຄຳເຫັນ ແລະ ສົນທະນາແລກປ່ຽນບົດຮຽນຊຶ່ງກັນແລະກັນຢ່າງກົງໄປກົງມາ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ(STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອໃຫ້ແກ່ສະພາແຫ່ງຊາດ.
ຂ່າວ:ສອນສັກ ວັນວິໄຊ
ຄໍາເຫັນ