ໃນວັນທີ 8 ພຶດສະພາ 2024,ຂະແໜງລ້ຽງສັດ ແລະການປະມົງ ພະແນກກະສິກໍາ ແລະປ່າໄມ້ແຂວງສະຫວັນນະເຂດ ຮ່ວມກັບຫ້ອງການກະສິກໍາ ແລະປ່າໄມ້ເມືອງຊົນນະບູລີ ໄດ້ຈັດຝືກອົບຮົມສ້າງຄວາມເຂັມແຂງໃຫ້ສັດຕະວະແພດບ້ານຄໍາປ່າແໜ ໂດຍມີທ່ານນາງ ອໍລະວັນ ສາມາດມະນີວົງ ຫົວໜ້າຂະແໜງລ້ຽງສັດ ແລະການປະມົງ ພ້ອມດ້ວຍພະນັກງານວິຊາການສັດຕະວະແພດບ້ານ ແລະຄອບຄົວເປົ້າໝາຍໃນການລ້ຽງສັດເຂົ້າຮ່ວມ.
ໃນການຝຶກອົບຮົມໃນຄັ້ງນີ້,ບັນດາວິຊາການຂະແໜງລ້ຽງສັດ ແລະການປະມົງ ໄດ້ຂຶ້ນອະທິບາຍລະອຽດທາງດ້ານທິດສະດີ ແລະໄດ້ແນະນໍາເຕັກນິກການນໍາໃຊ້ວັກຊິນ, ຢາປົວພະຍາດສັດ ແລະການນໍາໃຊ້ອຸປະກອນສັດຕະວະແພດໃຫ້ກັບສັດຕະວະແພດບ້ານຈໍານວນ 2 ທ່ານ ແລະບັນດາຄອບຄົວເປົ້າໝາຍໃນການລ້ຽງສັດຈໍານວນ 8 ຄອບຄົວ ທີ່ໄດ້ຜ່ານການຄັດເລືອກ ແລະໄດ້ຜ່ານການຝຶກອົບຮົມດ້ານເຕັກນິກຂັ້ນພື້ນຖານມາແລ້ວ.ການຝຶກອົບຮົມຄັ້ງນີ້ ແມ່ນໄດ້ປະຕິບັດຕົວຈິງກ່ຽວກັບເຕັກນິກການສັກຢາປ້ອງກັນພະຍາດເຕົ້າໂຮມເລືອດງົວຄວາຍແລະສັກຢາຂ້າພະຍາດກາຝາກໃນງົວ ໃຫ້ກັບຄອບຄົວເປົ້າໝາຍ ມີງົວ-ຄວາຍທັງໝົດ 119 ໂຕ. ພ້ອມນີ້, ວິຊາການກໍ່ຍັງໄດ້ແນະນໍາການໃຫ້ອາຫານເພື່ອບໍາລຸງສັດ, ການສ້າງຄອກສໍາລັບສັດ, ການປູກຫຍ້າ, ການເກັບຮັກສາອາຫານສັດ, ການດູແລສຸຂະພາບສັດ, ການເພາະພັນ ແລະການແຍກສັດລ້ຽງ ຕາມເຕັກນິກ ເພື່ອເຮັດໃຫ້ສັດມີສຸຂະພາບທີ່ແຂງແຮງ ແລະເຮັດໃຫ້ສັດຂະຫຍາຍແຜ່ພັນໄດ້ດີ.
ຈຸດປະສົງໃນການຝຶກອົບຮົມກໍ່ເພື່ອສ້າງຄວາມເຂັ້ມແຂງໃຫ້ສັດຕະວະແພດຂັ້ນບ້ານ ກ່ຽວກັບການລ້ຽງສັດ, ການສັກຢາປ້ອງກັນພະຍາດສັດ ເພື່ອບຳລຸງສັດ. ຫຼັງຈາກສຳເລັດການຝຶກອົບຮົມແລ້ວ, ສັດຕະວະແພດບ້ານຈະໄດ້ລົງໄປຈັດຕັ້ງປະຕິບັດຕົວຈິງຢູ່ພາຍໃນບ້ານ ເພື່ອຮັບປະກັນວ່າ ສັດລ້ຽງຂອງປະຊາຊົນຈະໄດ້ຮັບການສັກຢາປ້ອງກັນພະຍາດຕາມຄາດໝາຍສູ້ຊົນໃຫ້ສັດໄດ້ບໍ່ຫຼຸດ 80% ຂອງຝູງສັດ ແລະໄດ້ຮັບການດູແລຢ່າງຖືກວິທີ. ພາຍໃນບ້ານຄຳປ່າແໜມີງົວ 476 ໂຕ, ຄວາຍ 99 ໂຕ. ໂອກາດນີ້, ຍັງໄດ້ມອບອຸປະກອນການສ້າງຄອກສັດປະກອບມີ: ສັງກະສີ 128 ແຜ່ນ, ເຫຼັກຕະປູ 13 ກິໂລ ແລະແຮ່ທາດອາຫານເສີມງົວ 18 ກ້ອນ ໃຫ້ກັບຄອບຄົວເປົ້າໝາຍນຳອີກ./.(ຂ່າວ:ສະຫວັນນະເຂດ)
ຄໍາເຫັນ