ຝຶກອົບຮົມຄວາມຮູ້ພື້ນຖານດ້ານການເມືອງ-ການປົກຄອງໃຫ້ປະຊາຊົນເມືອງຫຼວງນ້ຳທາ

ຄະນະໂຄສະນາອົບຮົມແຂວງຫຼວງນ້ຳທາຮ່ວມກັບຄະນະໂຄສະນາເມືອງຫຼວງນໍ້າທາ ເປີດຊຸດຝຶກອົບຮົມ ຄວາມຮູ້ພື້ນຖານດ້ານການເມືອງ-ການປົກຄອງ, ການສ້າງບ້ານພັດທະນາ ແລະ ອົບຮົມປະຊາຊົນຢູ່ລຽບຕາມຊາຍແດນ ໃຫ້ແກ່ອົງການຈັດຕັ້ງ 5 ບ້ານ ທີ່ຂຶ້ນກັບກຸ່ມພັດທະນາບ້ານນາເຕີຍ ເມືອງຫຼວງນໍ້າທາ ແຂວງຫຼວງນໍ້າທາ ຂຶ້ນເມື່ອວັນທີ 22 ເມສາຜ່ານມາທີ່ບ້ານນາເຕີຍ ພາຍໃຕ້ການເປັນປະທານຮ່ວມຂອງ ທ່ານ ສິງໄຊ ວັນຄໍາ ກໍາມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ ແລະ ທ່ານຄໍາຫຼ້າ ແຫຼ່ງໄຊຍະທໍາ ຮອງເລຂາພັກເມືອງຫຼວງນ້ຳທາ, ຜູ້ຊີ້ນໍາຂົງເຂດການເມືອງ-ແນວຄິດ, ພັກ-ພະນັກງານ, ມີພາກສ່ວນກ່ຽວຂ້ອງເຂົ້າຮ່ວມ.
     ທ່ານ ສິງໄຊ ວັນຄໍາ ໄດ້ກ່າວເປີດຊຸດຝຶກອົບຮົມ ເຊິ່ງໄດ້ຮຽກຮ້ອງມາຍັງນັກວິທະຍາກອນ ແລະ ນັກສໍາມະນາກອນຈົ່ງພ້ອມກັນສຸມສະຕິປັນຍາ, ຄົ້ນຄວ້າ,ປຶກສາຫາລື ແລກປ່ຽນບົດຮຽນ ແລະ ປະກອບຄໍາຄິດຄໍາເຫັນ ທາງດ້ານຫຼັກມູນພື້ນຖານທາງທິດສະດີ ແລະ ພາກປະຕິບັດຕົວຈິງດ້ວຍຄວາມຮັບຜິດຊອບສູງ, ເພື່ອເຮັດໃຫ້ການຝຶກອົບຮົມໃນຄັ້ງນີ້ ສໍາເລັດຕາມລະດັບຄາດໝາຍທີວາງໄວ້.
ຊຸດຝຶກອົບຮົມໃນຄັ້ງນີ້ ໃຊ້ເວລາທັງໝົດ 3 ວັນ ເຊິ່ງນໍາສະເໜີ 2 ເອກະສານໂດຍປະກອບມີ 7 ບົດ, ເພື່ອເຮັດໃຫ້ປະຊາຊົນຢູ່ລຽບຕາມຊາຍແດນໄດ້ຮັບຮູ້, ເຂົ້າໃຈກ່ຽວກັບມູນເຊື້ອອັນສະຫງ່າລາສີຂອງປະຊາຊົນລາວ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ເຂົ້າໃຈກ່ຽວກັບບັນຫາຕ່າງໆທີ່ພົວພັນກັບປະຊາຊົນຢູ່ລຽບຕາມຊາຍແດນ ແລະ ເຮັດໃຫ້ສະມາຊິກພັກພະນັກງານ, ປະຊາຊົນຢູ່ຮາກຖານບ້ານໃຫ້ມີຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາ, ຍົກສູງຄວາມສາມາດນໍາພາຂອງໜ່ວຍພັກບ້ານ, ເຮັດໃຫ້ອົງການປົກຄອງບ້ານ ມີຄວາມເຂັ້ມແຂງໜັກແໜ້ນ ພ້ອມກັນສ້າງສາພັດທະນາປະເທດຊາດບ້ານເມືອງໃຫ້ມີຄວາມຈະເລີນຮຸ່ງເຮືອງເທືອລະກ້າວ.
ຂ່າວ: ໂຄສະນາອົບຮົມເມືອງຫຼວງນ້ຳທາ