 |
ທ່ານ ກິແກ້ວ ສິງນາວົງຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ (ກສ) ໃນນາມຫົວໜ້າກອງເລຂາຊ່ວຍວຽກ ຄະນະຮັບຜິດຊອບຊີ້ນຳ, ໄດ້ລາຍງານຄວາມຄືບໜ້າກ່ຽວກັບການຮ່າງວາລະແຫ່ງຊາດສະບັບດັ່ງກ່າວນີ້ວ່າ: ຮ່າງວາລະແຫ່ງຊາດສະບັບດັ່ງກ່າວນີ້ ແມ່ນມີຄວາມຈຳເປັນ, ຮີບດ່ວນລະດັບຊາດ ທີ່ຖືກກຳນົດຂຶ້ນເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030). ໂດຍອີງໃສ່ຜົນການປະເມີນສະພາບພົ້ນທຸກໃນປີ 2025 ທີ່ພົບວ່າຍັງມີຄອບຄົວບໍ່ພົ້ນທຸກ 14.78%, ບ້ານບໍ່ພົ້ນທຸກ 25.83% ແລະ ເມືອງບໍ່ພົ້ນທຸກ 44.59% ໃນທົ່ວປະເທດ. ລັດຖະບານຈຶ່ງໄດ້ກໍານົດ 5 ວຽກງານຈຸດສຸມໃຫຍ່ ໃນຮ່າງວາລະແຫ່ງຊາດສະບັບນີ້ ດັ່ງນີ້:
ວຽກງານຈຸດສຸມທີ 1: ພັດທະນາໂຄງລ່າງ ແລະ ສິ່ງອຳນວຍຄວາມສະດວກຢູ່ຊົນນະບົດ (ເສັ້ນທາງຄົມມະນາຄົມ, ລະບົບນ້ຳສະອາດ, ໂທລະຄົມມະນາຄົມ, ຊົນລະປະທານຂະໜາດນ້ອຍ, ຕາຂ່າຍໄຟຟ້າ, ສາທາລະນະສຸກ ແລະ ໂຮງຮຽນ).
ວຽກງານຈຸດສຸມທີ 2: ສ້າງອາຊີບ ແລະ ແຫຼ່ງລາຍຮັບຂອງປະຊາຊົນໃຫ້ມີຄວາມໝັ້ນຄົງ ໂດຍຊຸກຍູ້ການເຮັດກະເສດສຸມ, ກະເສດປະສົມປະສານ ແລະ ການຜະລິດເປັນສິນຄ້າ.
ວຽກງານຈຸດສຸມທີ 3: ສ້າງຄວາມເຂັ້ມແຂງໃຫ້ແກ່ຄະນະກຳມະການປົກຄອງຕາແສງ, ການຈັດຕັ້ງບ້ານ ແລະ ຊາວຊົນນະບົດ.
ວຽກງານຈຸດສຸມທີ 4: ຂົນຂວາຍ ແລະ ຍາດແຍ່ງການລົງທຶນເຂົ້າໃສ່ການພັດທະນາຢູ່ຊົນນະບົດ ຈາກທັງພາຍໃນ ແລະ ຕ່າງປະເທດ.
ວຽກງານຈຸດສຸມທີ 5: ສ້າງ ແລະ ປັບປຸງນິຕິກຳ, ກົນໄກໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ມີປະສິດທິຜົນ.
ນອກນັ້ນ ໃນທີ່ປະຊຸມກໍໄດ້ຮັບຟັງການນຳສະເໜີຮ່າງຂໍ້ຕົກລົງ ວ່າດ້ວຍການແບ່ງຄວາມຮັບຜິດຊອບພາຍໃນຄະນະຮັບຜິດຊອບຊີ້ນຳ ເພື່ອໃຫ້ບັນດາຜູ້ເຂົ້າຮ່ວມໄດ້ປຶກສາຫາລື ແລະ ປະກອບຄຳເຫັນຕໍ່ຮ່າງດັ່ງກ່າວ.
ກອງປະຊຸມໄດ້ມອບໝາຍໃຫ້ ກະຊວງກະສິກຳ ແລະ ສິ່ງແວດລ້ອມ ເປັນເຈົ້າການປະສານສົມທົບກັບບັນດາກະຊວງ, ອົງການ ແລະ ທ້ອງຖິ່ນ ເພື່ອຈັດຕັ້ງປະຕິບັດ, ຕິດຕາມ ກວດກາ ແລະ ປະເມີນຜົນ ເຮັດໃຫ້ວາລະແຫ່ງຊາດສະບັບນີ້ປະກົດຜົນເປັນຈິງ ແລະ ສາມາດແກ້ໄຂຄວາມທຸກຍາກຂອງປະຊາຊົນໄດ້ຢ່າງຍືນຍົງ.
ຂ່າວ: ຂ່າວສານ ກສ
ຄໍາເຫັນ