ດາວັນ ມູນລາດ; ພໍ່ຕູ້ດາວັນ ມູນລາດຢູ່ບ້ານໜອງໄຮເມືອງຫາດຊາຍຟອງນະຄອນຫຼວງວຽງຈັນໄດ້ໃຫ້ສໍາພາດຕໍ່ຜູ້ຂຽນ ທີ່ບຸນພະທາດຫຼວງວຽງຈັນ ວ່າ: ຖືເອົາວຽກງານຫັດຖະກໍາ ຕີເຄື່ອງເງິນ-ທອງ ເປັນອາຊີບ ມາແຕ່ປີ 1985, ຮຽນຮູ້ວຽກງານຊ່າງຕີເຄື່ອງເງິນ-ທອງ ນໍາລຸງຫົວເພຍແຂວງຫຼວງພະບາງ. ພາຍຫຼັງຮຽນຮູ້ວິຊາດັ່ງກ່າວ ດ້ວຍຄວາມສຳນິຊໍານານງານ ຈຶ່ງໄດ້ນໍາເອົາບົດຮຽນທີ່ໄດ້ນັ້ນ ມາຜະລິດເປັນຂອງຄອບຄົວ ຊຶ່ງໄດ້ຍົກຍ້າຍລົງມາຢູ່ບ້ານໂນນຄໍ້ເມືອງໄຊເສດຖານະຄອນຫຼວງວຽງຈັນ. ຈາກນັ້ນ ຈຶ່ງນໍາພາຄອບຄົວ ຍ້າຍໄປຢູ່ບ້ານໜອງໄຮຈົນເຖິງປັດຈຸບັນ.
ຜະລິດຕະພັນ ປະກອບມີ: ຕິບເຂົ້າ, ເຕົ້ານໍ້າຢາດ, ໂອ, ຂັນ, ກະຕ່າ(ມີທັງລາຍດັ່ງເດີມ-ລາຍໃໝ່) ທັງໝົດ ແມ່ນລາຍລາວ, ແຮງງານໃນການຜະລິດ ມີ3 ຄອບຄົວ ກວມຈໍານວນ 10 ກວ່າຄົນ, ວັດຖຸດິບທີ່ນໍາໃຊ້ເຂົ້າໃນວຽກງານ ແມ່ນຊື້ນໍາພາຍໃນປະເທດ ເປັນຕົ້ນ: ທອງແດງ-ທອງເຫຼືອງ ເພື່ອນໍາໃຊ້ເຂົ້າໃນການຜະລິດ. ໃນໂອກາດບຸນນະມັດສະການພະທາດຫຼວງ ປີ 2024, ໄດ້ນໍາເອົາກະຕ່າລາຍໃໝ່ອອກສູ່ສາຍຕາລູກຄ້າໄດ້ຊົມ-ຊື້ ຈໍານວນ 40 ໜ່ວຍ ແມ່ນໄດ້ຂາຍດີ. ຄຽງຄູ່ກັບການຕີເຄື່ອງເງິນ-ທອງດັ່ງກ່າວ, ຍັງໄດ້ຂາຍເຄື່ອງເກົ່າ, ພະເຄື່ອງ, ພະທີ່ເປັນເຄື່ອງຄໍ້າຄູນ ທີ່ມີລາຍບູຮານອື່ນໆ, ກະຕ່າຫວາຍທີ່ມີຂະໜາດໃຫຍ່-ຂະໜາດກາງ, ການຈໍາໜ່າຍ ແມ່ນມີ 2 ລາຄາ ຄື: ຂາຍສົ່ງ ແລະ ຂາຍຍ່ອຍ, ລາຄາຂາຍຕໍ່າສຸດ 1 ແສນກີບ ແລະ ລາຄາສູງສຸດ 1.900.000 ກີບ. ສະພາບການຄ້າ-ຂາຍ ທີ່ງານນະມັດສະການພະທາດຫຼວງ ແມ່ນໄດ້ດີ.
ພໍ່ຕູ້ດາວັນ ມູນລາດ ກ່າວຕື່ມວ່າ: ເພື່ອໃຫ້ວຽກງານຫັດຖະກໍາຕີເຄື່ອງເງິນ-ທອງ ໄດ້ສືບສານລາຍລາວຢ່າງຍືນນານ ແຜນການໃນຕໍ່ໜ້ານີ້ ຈະສືບຕໍ່ຜະລິດ ທັງຮັກສາລາຍລາວ ແລະ ຜະລິດຕາມຄວາມຮຽກຮ້ອງຕ້ອງການ ກໍຄືການສັ່ງຈອງຂອງລູກຄ້າ.ຖ້າກຫາກວ່າ ລູກຄ້າທ່ານໃດຕ້ອງການສັ່ງຈອງ ຕາມລາຍລາວທີ່ສວຍງາມດ້ວຍສີມືທີ່ປານີດ ຕິດຕໍ່ໄດ້ ໂທ: 020 55697286, ແອັບ: 020 28886809.
ຄໍາເຫັນ