ຮອງເຈົ້າເມືອງອຸທຸມພອນ ຫ້າມແມ່ຄ້າ-ຊາວຂາຍສວຍໂອກາດຂຶ້ນລາຄາສິນຄ້າໃນງານເທດສະການປີ  ໃໝ່ລາວ ພສ 2567

ໃນວັນທີ 10 ເມສາຜ່ານມາ, ການນໍາເມືອງອຸທຸມພອນ ແຂວງສະຫວັນນະເຂດ ຊຶ່ງນໍາໂດຍທ່ານ  ຄໍາພົງ ສຸລິເຍດ ຮອງເຈົ້າເມືອງ ຜູ້ຊີ້ນໍາວຽກງານເສດຖະກິດ, ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງຕິດຕາມກວດກາລາຄາສິນຄ້າຕາມທ້ອງຕະຫຼາດ (ຕະຫຼາດຄົບວົງຈອນເຊໂນ) ຊ່ຶງທ່ານໄດ້ເນັ້ນວ່າ: ເພື່ອບໍ່ໃຫ້ແມ່ຄ້າຊາວຂາຍເຄື່ອງອຸປະໂພກ, ບໍລິໂພກ ໂດຍສະເພາະ ແມ່ນແມ່ຄ້າຂາຍຊິ້ນໝູ, ຊິ້ນງົວ, ຊິ້ນຄວາຍ, ປາ, ພືດຜັກ, ຂ່າ-ຂີງ ແລະ ອື່ນໆ ສວຍໂອກາດຂຶ້ນລາຄາສິນຄ້າຕາມອໍາເພີໃຈ, ບໍ່ໃຫ້ໂກງຕາຊັ່ງຕາຊິງ ເພື່ອເອົາລັດເອົາປຽບຜູ້ບໍລິໂພກ. ຜ່ານມາມັກມີການເໜັງຕີງເລື່ອງລາຄາສິນຄ້າ, ພ້ອມທັງເບິ່ງຄວາມພ້ອມທາງດ້ານສະບຽງອາຫານ ໂດຍສະເພາະ ປາ, ຊິ້ນໝູ ໃນຕະຫຼາດຊິພຽງພໍຕໍ່ກັບຄວາມຕ້ອງການຂອງຜູ້ບໍລິໂພກບໍ່, ຊິ້ນງົວ, ຊິ້ນຄວາຍ ສ່ວນຫຼວງຫຼາຍແລ້ວປະຊາຊົນເຂົາເຈົ້າບໍ່ຄ່ອຍບໍລິໂພກປານໃດ ເຂົາເຈົ້າຫັນໄປບໍລິໂພກຊິ້ນໝູ ແລະ ປາ ເປັນສ່ວນໃຫຍ່
    ສໍາລັບແມ່ຄ້າຜູ້ທີ່ຂາຍຊິ້ນງົວ, ຄວາຍໃນຕະຫຼາດ ໄດ້ໃຫ້ສໍາພາດຕໍ່ນັກຂ່າວທ້ອງຖິນວ່າ: ບຸນປີໃໝ່ລາວປີກາຍນີ້ການຂາຍຊິ້ນແມ່ນຂາຍດີອີຫຼີ, ສ່ວນຫຼາຍປະຊາຊົນແຖວເຂດນອກລູກຫຼານເຂົາເຈົ້າທີ່ກັບມາແຕ່ທໍາງານຢູ່ປະເທດໄກ້ຄຽງເຂົາເຈົ້າຈະມາແວ່ຊື້ຊິ້ນງົວ, ຊິ້ນຄວາຍເມືອຕ້ອນພໍ່ແມ່, ອ້າຍ, ເອື້ອຍນ້ອງ, ແຕ່ປີໃໝ່ລາວ ພສ 2567 ປີນີ້ ການຂາຍຊິ້ນແມ່ນບໍ່ໄດ້ດີປານໃດ, ຍ້ອນມີກຸ່ມຄົນບໍ່ດີຈໍານວນໜຶ່ງໂຄສະນາທາງສື່ສັງຄົມອອນລາຍ ກ່ຽວກັບງົວ, ຄວາຍເປັນພະຍາດຫຼາຍແລ້ວຕາຍ ເຮັດໃຫ້ຄົນຢ້ານກວາ ແລະ ບໍ່ມີຜູ້ມາຊື້ຊິ້ນໃຜກະຢ້ານໄປຕ່າງໆນາໆ. ສະນັ້ນແລ້ວຈິ່ງເຮັດໃຫ້ການຄ້າຂາຍຊິ້ນບໍ່ຄຶກຄື້ນຄືປີທີ່ຜ່ານມາ, ຂາຍໄດ້ມື້ໜຶ່ງພຽງແຕ່ 2 ຫາ 3 ກິໂລເທົ່ານັ້ນ
    ສໍາລັບທາງດ້ານພະນັກງານວິຊາການຫ້ອງການກະສິກໍາ-ປ່າໄມ້ເມືອງເວົ້າວ່າ: ການສະໜອງຊິ້ນ, ປາໃຫ້ກັບຕະຫຼາດທົ່ວເມືອງອຸທຸມພອນໃນງານເທດສະການບຸນປີໃໝ່ລາວ ພສ 2567 ປີນີ້ໜ້າຈະພຽງພໍຕໍ່ຄວາມຕ້ອງການຂອງປະຊາຊົນຜູ້ບໍລິໂພກພາຍໃນເມືອງ.
(ຂ່າວ: ສະຫວັນ)