ຮອງຫົວໜ້າ ຄອສພ ເນັ້ນເອົາໃຈໃສ່ບັນຫາສຳຄັນສະພາບແນວຄິດ-ຫາງສຽງສັງຄົມ

ສະຫາຍ ວັນໄຊ ເງຍຈັນທະສອນ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງໄດ້ລາຍງານວຽກງານການເມືອງ-ແນວຄິດ ແລະ ຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະ 1 ປີຜ່ານມາວ່າ: ຄະນະພັກ, ຄະນະນໍາແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ດ້ວຍຫຼາຍຮູບແບບ, ຫຼາຍວິທີການ ໂດຍການເຜີຍແຜ່-ເຊື່ອມຊຶມບັນດາ ມະຕິ, ຄໍາສັ່ງ ແລະ ນິຕິກຳຕ່າງໆ ຂອງພັກ-ລັດ, ຈັດຕັ້ງໂຄສະນາ-ປາຖະກະຖາວັນສໍາຄັນທາງປະຫວັດສາດຢ່າງເປັນປົກກະຕິ-ຕໍ່ເນື່ອງ, ຄຽງຄູ່ກັບການຕິດຕາມ, ເກັບກຳ ແລະ ແກ້ບັນດາປະກົດການຫຍໍ້ທໍ້, ຫາງສຽງສັງຄົມ ທີ່ເກີດຂຶ້ນຢູ່ໃນແຕ່ລະຂົງເຂດຢ່າງຕັ້ງໜ້າ ແລະ ຫ້າວຫັນ. ໃນນັ້ນ, ວຽກຕິດຕາມເກັບກຳສະພາບແນວຄິດ-ຫາງສຽງສັງຄົມ. ຄະນະຮັບຜິດຊອບຂັ້ນແຂວງ ແລະ ຂັ້ນເມືອງ ໄດ້ເອົາໃຈໃສ່ປະຕິບັດພາລະບົດບາດ, ສິດ-ໜ້າທີ່ຂອງຕົນ ໃນການຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນທົ່ວແຂວງ, ເປັນເຈົ້າການຈັດກອງປະຊຸມຮັບສ່ອງແສງ-ລາຍງານປະຈຳເດືອນເປັນປົກກະຕິ ເດືອນລະ 1 ຄັ້ງ ຊຶ່ງຂັ້ນແຂວງໄດ້ຮັບຫາງສຽງ 10 ບັນຫາ, ຂັ້ນເມືອງ ໄດ້ຮັບ 58 ບັນຫາ, ບັນຫາທີ່ພົ້ນເດັ່ນ ມີ 1 ບັນຫາຄື: ບັນຫາປະຊາຊົນ ບຸກລຸກປ່າສະຫງວນ ໂດຍສະເພາະປ່າສະຫງວນພູກະດັນ ເມືອງປາກຊັນ. ໃນນັ້ນ, ມີຂ່າວລື 1 ຂ່າວ ແລະ ຂ່າວບິດເບືອນ 1 ຂ່າວ.

ຈາກນັ້ນ, ບັນດາພະແນກການຕ່າງໆໄດ້ປະກອບຄຳຄິດຄຳເຫັນຕໍ່ວຽກງານສະພາບແນວຄິດ-ຫາງສຽງສັງຄົມໃນຂົງເຂດຮັບຜິດຊອບຢ່າງກົງໄປກົງມາ ແລ້ວ ປະທານກອງປະຊຸມໄດ້ມີຄຳເຫັນຊີ້ນຳ, ເຮັດໃຫ້ກອງປະຊຸມ, ມີບັນຍາກາດຟົດຟື້ນ, ມີເນື້ອໃນເລິກເຊິ່ງ ແລະ ດຳເນີນໄປຕາມຈຸດປະສົງລະດັບຄາດໝາຍທີ່ວາງໄວ້.

ໂອກາດດັ່ງກ່າວ, ສະຫາຍ ລາວປາວຊົ່ງ ນະວົງໄຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳ ເລັດທີ່ຄະນະພັກ, ຄະນະນຳຂອງແຂວງຍາດມາໄດ້ໃນໄລຍະທີ່ຜ່ານມາ ແລະ ໃຫ້ທິດຊີ້ນຳໃນຕໍ່ໜ້າຕ້ອງເພີ່ມທະວີຄວາມຮັບຜິດຊອບຕໍ່ວຽກງານສ່ອງແສງຂ່າວໃຫ້ສູງຂຶ້ນກວ່າເກົ່າ, ໂດຍເລີ່ມຈາກການສືບຕໍ່ຄົ້ນຄວ້າ, ເຊື່ອມຊຶມ ແລະ ກຳແໜ້ນບັນດາມະຕິ, ຄໍາສັ່ງຂອງພັກ ແລະ ບັນດານິຕິກຳຕ່າງໆທີ່ກ່ຽວຂ້ອງ ທີ່ເປັນເຂັມຊີ້ທິດເຍືອງທາງໃຫ້ແກ່ວຽກງານຂອງພວກເຮົາເຊັ່ນ: ມະຕິກອງປະຊຸມວຽກງານການເມືອງແນວຄິດທົ່ວປະເທດ ຄັ້ງທີ V, ມະຕິກົມການເມືອງສູນກາງພັກ ສະບັບເລກທີ 206/ກມສພ, ວ່າດ້ວຍ ການຍົກສູງວຽກງານການເມືອງ-ແນວຄິດໃນໄລຍະໃໝ່, ຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 04/ຄລສພ ແລະ ຄໍາແນະນໍາ ສະບັບເລກທີ 08/ຄອສພ ວ່າດ້ວຍການເພີ່ມທະວີວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ, ໃນນັ້ນ, ເພື່ອເຮັດໃຫ້ບັນດາຄໍາສັ່ງ ແລະ ແນວທາງດັ່ງກ່າວ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ມີປະສິດທິຜົນສູງສຸດ, ພວກເຮົາຕ້ອງມີຄວາມເປັນເອກະພາບທາງດ້ານຈິດໃຈ, ຫັນເອົາເນື້ອໃນດັ່ງກ່າວມາເປັນແຜນງານ ແລະ ໜ້າວຽກລະອຽດຂອງແຕ່ລະພາກ ສ່ວນ, ພ້ອມນີ້, ໄດ້ເນັ້ນ 3 ບັນຫາສໍາຄັນເພື່ອນໍາໄປຄົ້ນຄວ້າ ແລະ ຜັນຂະຫຍາຍຕື່ມ ດ້ານກົນໄກການເກັບກໍາພວກເຮົາຈະເຮັດແນວໃດ ເພື່ອໃຫ້ການຕິດຕາມ ແລະ ເກັບກຳ ສະພາບແນວຄິດ-ຫາງສຽງສັງຄົມ ມີລັກສະນະກວ້າງຂວາງ, ທົ່ວເຖິງ ແລະ ວ່ອງໄວ ໂດຍສະເພາະແມ່ນການນໍາໃຊ້ເຄື່ອງມືທີ່ທັນສະໄໝເຂົ້າໃນການກັ່ນຕອງຂໍ້ມູນຂ່າວສານໃນໂລກອອນລາຍ, ດ້ານການສັງລວມຂໍ້ມູນພວກເຮົາຈະເຮັດແນວໃດ ເພື່ອໃຫ້ການສະຫຼຸບສັງລວມບັນຫາ ມີ ຄວາມຖືກຕ້ອງ, ຄົບຖ້ວນ, ກະທັດຮັດ ແລະ ເຂົ້າໃຈງ່າຍເພື່ອໃຫ້ຂໍ້ມູນນັ້ນສະທ້ອນເຖິງ “ສຽງຂອງ ມວນຊົນ" ຢ່າງແທ້ຈິງ ແລະ ດ້ານການວິເຄາະ ແລະ ວິໄຈ: ພວກເຮົາຈະເຮັດແນວໃດ ເພື່ອໃຫ້ການວິເຄາະ-ວິໄຈບັນຫາມີຄວາມເລິກເຊິ່ງ ແລະ ມີວິທະຍາສາດເພື່ອໃຫ້ຂໍ້ມູນເຫຼົ່ານັ້ນກາຍເປັນບ່ອນອີງທີ່ໜັກແໜ້ນ ແລະ ເປັນປະໂຫຍດໃຫ້ແກ່ການນໍາຂັ້ນເທິງໃນການພິຈາລະນາຕົກລົງ ແລະ ຊີ້ນຳແກ້ໄຂບັນຫາຢ່າງທັນການ. 

(ຂ່າວ-ພາບ: ສຳນານ)