 |
ທ່ານ ວັນນະໄລ ວຽງພະຈັນ ຄະນະສະເພາະກິດຂອງແຂວງ ໄດ້ລາຍງານວ່າ: ຜ່ານມາ ແຂວງ ໄດ້ເຄື່ອນໄຫວສະກັດກັ້ນ ແລະ ມີມາດຕະການຕໍ່ບຸກຄົນ, ກຸ່ມຄົນທີ່ລັກລອບຂຸດຄົ້ນຊັບພະຍາກອນແຮ່ທາດ, ພາຍຫຼັງ ມີ ຄໍາສັ່ງ ເລກທີ 06/ນຍ, ວ່າດ້ວຍການຕິດຕາມ, ກວດກາ ແລະ ແກ້ໄຂບັນຫາ ແຮ່ຄໍາ ຕົກຂ້ອນ, ຫີນ ແລະ ຊາຍ ຕາມບັນດາສາຍນໍ້າ, ຮ່ອງຫ້ວຍ ແລະ ການຄຸ້ມຄອງການຂຸດ ຄົ້ນແຮ່ທາດຕ່າງໆ ໃນຂອບເຂດທົ່ວປະເທດ ແລະ ທົ່ວແຂວງ ໂດຍໄດ້ຜັນຂະຫຍາຍມາເປັນຄໍາສັ່ງຂອງເຈົ້າແຂວງ ເລກທີ 06/ຈຂອປ, ເພື່ອເປັນບ່ອນອີງໃຫ້ແກ່ບັນດາພະແນກການ, ອົງການຈັດຕັ້ງທຽບເທົ່າ, ກອງ ບັນຊາການປກຊ-ປກຊ, ອົງການປົກຄອງເມືອງ ແລະ ບ້ານ ນໍາໄປໂຄສະນາເຜີຍແຜ່ ແລະ ຈັດຕັ້ງປະຕິບັດ ໃຫ້ຖືກຕ້ອງສອດຄ່ອງ ແລະ ແທດ ເໝາະກັບສະພາບຈຸດພິເສດຂອງແຂວງ.
ພ້ອມກັນນັ້ນ, ກໍ່ໄດ້ອອກຂໍ້ຕົກລົງ ຂອງເຈົ້າແຂວງ ເລກທີ 538/ຈຂອປ, ວ່າດ້ວຍການ ແຕ່ງຕັ້ງຄະນະສະເພາະກິດສະກັດກັ້ນການລັກລອບຂຸດຄົ້ນແຮ່ທາດ ໃນຂອບເຂດທົ່ວແຂວງອັດຕະປື ນໍາໃຊ້ປ່ຽນແທນ ຂໍ້ຕົກລົງ ສະບັບເລກທີ 1621/ຈຂອປ, ຜ່ານການ ເຄື່ອນໄຫວໄດ້ມີຜົນສໍາເລັດຫຼາຍດ້ານ ເຊັ່ນ: ພາກສ່ວນແຂວງ ໄດ້ເປີດກອງປະຊຸມເຜີຍແຜ່ຄໍາສັ່ງ ເລກທີ 06/ນຍ ແລະ ເລກທີ 06/ຈຂອປ ໃຫ້ສະມາຊິກພັກ - ພະນັກງານ ແລະ ໃຫ້ຜູ້ປະກອບການ, ນັກທຸລະກິດ, ຮ້ານຄ້າຂາຍແຮ່ທາດ ທີ່ຢູ່ໃນຂອບເຂດ ການຄຸ້ມຄອງ ຂອງພະແນກພະລັງງານ ແລະ ບໍ່ແຮ່ ໃນເມື່ອກ່ອນ ຈຳນວນ 2 ຄັ້ງ, ມີ ຜູ້ເຂົ້າຮ່ວມ 35 ທ່ານ, ພາກສ່ວນເມືອງ ໄດ້ຈັດຕັ້ງ ແລະ ເຜີຍແຜ່ຄຳສັ່ງດັ່ງກ່າວ ອອກມາເປັນຄໍາສັ່ງຂອງທ່ານເຈົ້າເມືອງ ເປັນອັນລະອຽດຕື່ມ ແລ້ວໄດ້ເປີດກອງປະຊຸມເຜີຍແຜ່ ເຊື່ອມຊຶມໃຫ້ໃຫ້ແກ່ຄະນະບໍລິຫານງານພັກເມືອງ, ຫົວໜ້າ ແລະ ຮອງຫ້ອງການອ້ອມຂ້າງເມືອງ, ປກສ, ປກຊ, ພະນັກງານ - ລັດຖະກອນ 5 ເມືອງ, ມີຜູ້ເຂົ້າຮ່ວມ 224 ຄົນ ແລະ ໄດ້ລົງເຜີຍແຜ່ ເຊື່ມອຊຶມໃຫ້ອົງການປົກຄອງບ້ານ, ປະຊາຊົນຢູ່ກຸ່ມບ້ານ.
ໃນໂອກາດດັ່ງກ່າວ, ທ່ານຮອງລັດຖະມົນຕີ ກະຊວງປ້ອງກັນປະເທດ ໄດ້ຊີ້ນໍາໃຫ້ຄະນະສະເພາະກິດຂອງແຂວງ ສືບຕໍ່ເຮັດວຽກງານໂຄສະນາເຜີຍແຜ່ຄຳສັ່ງ ແລະ ນິຕິກຳຕ່າງໆ ທີ່ຂັ້ນເທິງວາງອອກ ໃຫ້ທົ່ວສັງຄົມໄດ້ຮັບຮູ້, ເພື່ອເຮັດໃຫ້ມີສ່ວນຮ່ວມໃນການປົກປັກຮັກສາຊັບພະຍາກອນແຮ່ທາດ, ຄະນະສະເພາະກິດ 538 ຂອງແຂວງຕ້ອງໄດ້ສືບຕໍ່ເຄື່ອນໄຫວຕິດຕາມ, ກວດກາ ແລະ ສະກັດກັ້ນການ ລັກລອບຂຸດຄົ້ນແຮ່ທາດ ຢ່າງເປັນປົກກະຕິ ໂດຍໃຫ້ກຳລັງ ປກຊ ປະຈຳຢູ່ແຕ່ລະກອງຮ້ອຍຊາຍແດນໃນແຕ່ລະເມືອງ ສົມທົບກັບບ້ານ, ພະນັກງານຂອງລັດ ລົງກວດຄົ້ນຮ້າງຮ້ານຂາຍເຄື່ອງຕ່າງໆພາຍໃນແຂວງ, ເມືອງ ແລະ ບ້ານຂອງຕົນໃຫ້ເປັນປົກກະຕິ ເພື່ອເຮັດໃຫ້ການລັກລອບຂຸດຄົ້ນແຮ່ທາດຫຼຸດໜ້ອຍຖອຍລົງ.
(ຂ່າວ: ວ ຫລວງອາໄພ)
ຄໍາເຫັນ