ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ, ມີແຂດຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນລິດ ເທບບຸນສູງ ວ່າການເຈົ້າເມືອງປາກຊ່ອງ ໄດ້ໃຫ້ຮູ້ວ່າ: ບຸນກາເຟ-ຊາ ພູພຽງບໍລະເວນ ປະຈຳປີ 2025 ມີຮ້ານວາງສະແດງສິນຄ້າ ທັງພາຍໃນແຂວງ ແລະ ຕ່າງແຂວງທັງໝົດ 70 ກວ່າຫົວໜ່ວຍ ລວມມູນຄ່າຜະລິດຕະພັນ ປະມານ 10 ຕື້ກີບ, ຄາດວ່າຈະມີເງິນໝູນວຽນໃນແຕ່ລະວັນ 1 ຕື້ກວ່າກີບ.
ການຈັດງານຄັ້ງນີ້, ເພື່ອສົ່ງເສີມການຜະລິດຂອງຊາວສວນກາເຟ-ຊາ ແລະ ຜົນຜະລິດກະສິກຳ ຂອງແຂວງຈໍາປາສັກ ແລະ ບັນດາແຂວງ, ລວມເຖິງຜູ້ປະກອບການທຸລະກິດກາເຟ-ຊາ ຈາກທົ່ວປະເທດ ໄດ້ຮັບຮູ້ເຂົ້າໃຈເຖິງປະຫວັດຄວາມເປັນມາຂອງກາເຟ-ຊາ ພູພຽງບໍລະເວນ, ຄວາມຫຼາກຫຼາຍດ້ານແນວພັນຊະນິດກາເຟ, ວິຖີຊີວິດຊາວສວນ ເມືອງປາກຊ່ອງ ທີ່ຕິດພັນກັບການສ້າງຄຸນຄ່າໃນການຜະລິດກາເຟ-ຊາ ຄຸນນະພາບ ແລະ ສ້າງຄ່ານິຍົມ ໃນໝູ່ຄົນຮຸ່ນໃໝ່ ໃຫ້ມີວັດທະນະທຳການດື່ມກາເຟ-ຊາ ພູພຽງບໍລະເວນ; ທັງເປັນການສ້າງຕ່ອງໂສ້ມູນຄ່າການຜະລິດ, ການສົ່ງເສີມການຕະຫຼາດ ແລກປ່ຽນການຊື້-ຂາຍ, ຈັບຄູ່ທຸລະກິດ ແລະ ການສົ່ງອອກ ນັບແຕ່ຊາວສວນຜູ້ຜະລິດ ຜ່ານຂະບວນເຕັກນິກການຄັດເລືອກຄຸນນະພາບເມັດກາເຟ-ຊາ, ການຂົ້ວ, ການປຸງແຕ່ງໃນຫຼາຍຂັ້ນຕອນ, ຈົນຮອດສິລະປະການຊົງກາເຟ ທີ່ເປັນເອກະລັກ ຮັກສາລົດຊາດສະເພາະ ກາເຟ-ຊາພູພຽງບໍລະເວນ ໂດຍສະເພາະ ຢູ່ເມືອງປາກຊ່ອງ ຜືນແຜ່ນດິນຄໍາ ແລະ ດິນພູໄຟ ສົມຄໍາຊ່າລື ຈາກສວນ-ສູ່ຈອກ ຂອງຜູ້ຊົມໃຊ້.
ບຸນກາເຟ-ຊາ ຂອງຊາວເມືອງປາກຊ່ອງ ແມ່ນໜຶ່ງໃນ 12 ກິດຈະກຳ ທີ່ກຳນົດເຂົ້າໃນກິດຈະກຳການທ່ອງທ່ຽວຂອງແຂວງຈຳປາສັກ ເຮັດໃຫ້ບັນຍາກາດການທ່ອງທ່ຽວພາຍໃນເມືອງ ມີຄວາມຄຶກຄື້ນ.
(ຂ່າວ: ປະພິດ ສີສົມບູນ; ພາບ: ເທດສະໜາ)
ຄໍາເຫັນ