ຮອງນາຍົກລັດຖະມົນຕີ ເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງທີ 21

 ເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງທີ 21 ແລະ ກອງປະຊຸມສຸດຍອດການຄ້າ-ການລົງທຶນ ຈີນ-ອາຊຽນ ຄັ້ງທີ 21 ທີ່ນະຄອນໜານໜິງ ເຂດປົກຄອງຕົນເອງ ຊົນເຜົ່າຈ້ວງກວາງຊີ ສປ ຈີນ ພາຍໃຕ້ຄຳຂວັນ: “ເຊີດຊູນໍ້າໃຈໄມຕີຈິດ ແລະ ຄວາມຈິງໃຈ, ຢຶດໝັ້ນຜົນປະໂຫຍດ ເພື່ອການພັດທະນາຮ່ວມກັນ ເສີມສ້າງອະນາຄົດອັນໃໝ່ ທີ່ຮຸ່ງເຮືອງສີວິໄລ, ສະໜັບສະໜູນການພັດທະນາເຂດການຄ້າເສລີອາຊຽນ-ຈີນ ສະບັບທີ 3 ແລະ ສ້າງພາກພື້ນໃຫ້ມີການຂະຫຍາຍຕົວຢ່າງມີຄຸນນະພາບສູງ” .
ນັບແຕ່ປີ 2004 ເປັນຕົ້ນມາ, ງານວາງສະແດງສິນຄ້າ ຈີນ-ອາຊຽນ ໄດ້ກາຍເປັນງານປະຈໍາປີ ທີ່ຍິ່ງໃຫຍ່ລະດັບສາກົນ ທີ່ໄດ້ຮັບຄວາມສົນໃຈຈາກລັດຖະບານ ຂອງປະເທດສະມາຊິກອາຊຽນ ໂດຍໄດ້ມີບັນດາການນໍາຂັ້ນສູງຂອງພາກລັດ ແລະ ພາກທຸລະກິດທີ່ກ່ຽວຂ້ອງ ຈາກອາຊຽນ ແລະ ສປ ຈີນ ເຂົ້າຮວມຢ່າງກວ້າງຂວາງ. ຕະຫຼອດໄລຍະເວລາ 20 ປີຜ່ານມາ ງານວາງສະແດງສິນຄ້າ ຈີນ-ອາຊຽນ ບໍ່ພຽງແຕ່ປະກອບສ່ວນສໍາຄັນເຂົ້າໃນການສົ່ງເສີມການຮ່ວມມືທາງດ້ານການຄ້າ ແລະ ການລົງທຶນ ລະຫວ່າງ ຈີນ-ອາຊຽນ ເທົ່ານັ້ນ, ຫາກຍັງໄດ້ເພີ່ມທະວີຮັດແໜ້ນສາຍພົວພັນຮ່ວມມືລະຫວ່າງ ຈີນ-ອາຊຽນ ໃຫ້ນັບມື້ກວ້າງຂວາງ ທາງດ້ານວັດທະນະທໍາ ກໍຄືສົ່ງເສີມການໄປມາຫາສູ່ກັນ ລະຫວ່າງ ປະຊາຊົນໃນພາກພື້ນອາຊຽນ-ຈີນ ໃຫ້ນັບມື້ນັບຂະຫຍາຍຕົວຂຶ້ນເລື້ອຍໆ.
ໂອກາດນີ້, ທ່ານ ຕິ່ງ ຊື້ ຊຽງ ຮອງນາຍົກລັດຖະມົນຕີ ແຫ່ງ ສປ ຈີນ ໄດ້ມີຄໍາເຫັນເປີດພິທີງານວາງສະແດງ ຢ່າງເປັນທາງການ ໂດຍໄດ້ກ່າວບາງຕອນສໍາຄັນຕໍ່ທິດທາງການຮ່ວມມື ລະຫວ່າງ ຈີນ ແລະ ອາຊຽນ ໃຫ້ມີຄວາມສະໜິດສະໜົມຮັກແພງ ຄືພີ່ນ້ອງກັນ, ຮ່ວມມືກັນດ້ວຍຄວາມຈິງໃຈ ເພື່ອສ້າງຄວາມເຊື່ອໝັ້ນຊຶ່ງກັນ ແລະ ກັນ ແລະ ຮ່ວມມືກັນຍາວນານ ເພື່ອນໍາເອົາຜົນປະໂຫຍດມາຮ່ວມກັນ ແລະ ເຊື່ອມໂຍງກັນທາງດ້ານໂຄງລ່າງພື້ນຖານ ກໍຄືລະບົບ ແລະ ປັດໃຈການຜະລິດ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ແຫ່ງ ສປປ ລາວ ກໍໄດ້ມີຄຳເຫັນ ໂດຍໄດ້ເນັ້ນໃຫ້ເຫັນເຖິງການພົວພັນຮ່ວມມື ເປັນຄູ່ຮ່ວມຍຸດທະສາດຮອບດ້ານ ລະຫວ່າງ ອາຊຽນ ແລະ ສປ ຈີນ ໃນປີ 2021 ອັນໄດ້ສະແດງໃຫ້ເຫັນເຖິງຄວາມໝາຍໝັ້ນອັນແຮງກ້າຂອງອາຊຽນ ແລະ ສປ ຈີນ ທີ່ຈະສືບຕໍ່ເສີມຂະຫຍາຍການຮ່ວມມື ໃຫ້ເຂົ້າສູ່ລ່ວງເລິກ ແລະ ລວງກວ້າງ ແລະ ເປັນຮູບປະທໍາໃຫ້ຫຼາຍຂຶ້ນ ໂດຍສະເພາະການເປີດເສລີທາງດ້ານການຄ້າ ແລະ ການລົງທຶນ, ການຮ່ວມມືທາງດ້ານອຸດສາຫະກໍາໃນຂົງເຂດໃໝ່ ເຊັ່ນ: ການຄ້າທາງດ້ານດີຈີຕອນ, ການຄ້າທາງດ້ານເອເລັກໂຕຣນິກ, ເສດຖະກິດດີຈີຕອນ ແລະ ເສດຖະກິດສີຂຽວ ຊຶ່ງເຫັນວ່າ ສອດຄ່ອງ ກັບສັນຍາການຄ້າເສລີອາຊຽນ-ຈີນ ສະບັບປັບປຸງ ຄັ້ງທີ 3 ໄດ້ເປັນຢ່າງດີ ໂດຍສະເພາະ ໃນທ່າມກາງສະພາບເສດຖະກິດໂລກ ທີ່ຍັງສືບຕໍ່ມີຄວາມອ່ອນໄຫວໃນປັດຈຸບັນ ໄດ້ຮຽກຮ້ອງໃຫ້ອາຊຽນ ແລະ ສປ ຈີນ ຕ້ອງໄດ້ເພີ່ມທະວີການຮ່ວມມືກັນ ດ້ວຍຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ, ເຄົາລົບ ແລະ ມີນໍ້າໃຈໄມຕີຈິດຕໍ່ກັນ ບົນພື້ນຖານຕ່າງຝ່າຍຕ່າງມີຜົນປະໂຫຍດ ຊຶ່ງເປັນສັນຍາລັກສະແດງເຖິງຄວາມຈະເລີນເຕີບໂຕ ແລະ ຄວາມສີວິໄລ ໂດຍຜ່ານການຮ່ວມມື ແລະ ການເປັນຫຸ້ນສ່ວນກັນຢ່າງແທ້ຈິງ. ການຮ່ວມມືອາຊຽນ-ຈີນ ບໍ່ໄດ້ຈໍາກັດພຽງແຕ່ໃນຂອບການຄ້າ-ການລົງທຶນເທົ່ານັ້ນ ຫາກແຕ່ຍັງໄດ້ກວມເອົາການພົວພັນຮ່ວມມື ຂົງເຂດວັດທະນະທໍາ, ການທ່ອງທ່ຽວ ແລະ ອື່ນໆ ໃຫ້ໄດ້ຮັບການເສີມຂະຫຍາຍຫຼາຍຂຶ້ນ; ພິເສດ ແມ່ນຂໍ້ລິເລີ່ມໜຶ່ງແລວ-ໜຶ່ງເສັ້ນທາງ ຊຶ່ງຖືເປັນການປະກອບສ່ວນອັນສໍາຄັນ ເຂົ້າໃນການສົ່ງເສີມການເຊື່ອມຈອດ ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວໃນພາກພື້ນ. ສໍາລັບ ສປປ ລາວ, ພາຍຫຼັງການເປີດນໍາໃຊ້ເສັ້ນທາງລົດໄຟລາວ-ຈີນ ໃນປີ 2021 ຜ່ານມາ ບໍ່ພຽງແຕ່ໄດ້ກາຍເປັນທ່າແຮງອັນສໍາຄັນ ໃນການອໍານວຍຄວາມສະດວກໃຫ້ແກ່ການຄ້າ, ການລົງທຶນ, ການຄົມມະນາຄົມຂົນສົ່ງເທົ່ານັ້ນ, ແຕ່ຍັງເປັນການສົ່ງເສີມວຽກງານດ້ານການເຊື່ອມໂຍງເຊື່ອມຈອດ ໃນພາກພື້ນ ໂດຍສະເພາະສົ່ງເສີມດ້ານການທ່ອງທ່ຽວ ແລະ ການໄປມາ ຫາສູ່ຂອງປະຊາຊົນລາວ ແລະ ຈີນ ກໍຄື ອາຊຽນ ແລະ ຈີນ ໃຫ້ມີຄວາມສະດວກສະບາຍ ແລະ ວ່ອງໄວຍິ່ງຂຶ້ນ. ພ້ອມດຽວກັນ, ກໍໄດ້ເຊີນຊວນບັນດາຄະນະຜູ້ແທນຈາກບັນດາປະເທດຕ່າງໆ ທີ່ເຂົ້າຮ່ວມງານວາງສະແດງສິນຄ້າຄັ້ງນີ້ ເດີນທາງໄປຢ້ຽມຢາມ ແລະ ທ່ອງທ່ຽວ ສປປ ລາວ ເພື່ອທ່ຽວຊົມຄວາມສວຍງາມທາງທໍາມະຊາດ, ວັດທະນະທໍາ, ຮີດຄອງປະເພນີອັນດີງາມທີ່ຫຼາກຫຼາຍ ກໍຄື ສະຖານທີ່ທາງປະຫວັດສາດຂອງ ສປປ ລາວ ໃນໂອກາດ ທີ່ ສປປ ລາວ ເປັນປະທານອາຊຽນ ກໍຄືປີທ່ອງທ່ຽວລາວ 2024 ນີ້.
ພາຍຫຼັງສໍາເລັດການເຂົ້າຮ່ວມ ພິທີເປີດງານວາງສິນຄ້າ ຈີນ-ອາຊຽນ, ທ່ານຮອງນາຍົກລັດຖະ ມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຊົມຮ້ານວາງສະແດງສິນຄ້າຂອງລາວ, ຊຶ່ງໃນປີນີ້ແມ່ນແຂວງຫົວພັນ ໄດ້ຖືກຄັດເລືອກ ເປັນເມືອງແຫ່ງສະເໜ່. ນອກຈາກຄະນະຜູ້ແທນທາງການແລ້ວ ຍັງມີພາກສ່ວນທຸລະກິດຂອງ ສປປ ລາວ ເຂົ້າຮ່ວມ, ຊຶ່ງການເຂົ້າຮ່ວມຂອງພາກທຸລະກິດລາວໃນປີນີ້ ໄດ້ມີຮ້ານວາງສະແດງທັງໝົດ 78 ຮ້ານ ຈາກ 55 ບໍລິສັດ, ຜະລິດຕະພັນສິນຄ້າ ສ່ວນໃຫຍ່ທີ່ໄດ້ນຳສິນຄ້າໄປວາງສະແດງປະກອບມີ: ຜະລິດຕະພັນໄມ້ແກະສະຫຼັກ, ເຄື່ອງເຟີນີເຈີ, ເຄື່ອງປະດັບ, ເຄື່ອງຫັດຖະກຳ, ເຄື່ອງອຸດສາຫະກຳ ແລະ ການໂຄສະນາການທ່ອງທ່ຽວ. ພ້ອມກັນນັ້ນ ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ເຂົ້າຮ່ວມກອງປະຊຸມສຸດຍອດການຄ້າ ແລະ ການລົງທຶນ ຈີນ-ອາຊຽນ ຄັ້ງທີ 21 ຕື່ມອີກ.
ໃນໂອກາດເດີນທາງເຂົ້າຮ່ວມງານວາງສິນຄ້າ ຈີນ-ອາຊຽນ ຄັ້ງນີ້, ທ່ານຮອງນາຍົກລັດຖະມົນຕີ ແຫ່ງ ສປປ ລາວ ຍັງໄດ້ໃຫ້ສຳພາດຕໍ່ສື່ມວນຊົນຈີນ; ໄດ້ໄປຢ້ຽມຢາມບໍລິສັດຂໍ້ມູນຂ່າວສານ ຈີນ-ອາຊຽນ ຈຳກັດ ແລະ ໄດ້ ຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ປະທານ ບໍລິສັດ ຫົວເຫວີຍ ຕື່ມອີກ.
(ຂ່າວ-ພາບ: ກົມປະຊາສຳພັນ, ຫສນຍ)