ຮອງນາຍົກລັດຖະມົນຕີ ເຄື່ອນໄຫວເຮັດວຽກຢູ່ແຂວງສະຫວັນນະເຂດ

ຈຸດປະສົງເພື່ອທົບທວນຄືນການຈັດຕັ້ງຜັນຂະຫຍາຍທິດຊີ້ນໍາຜົນກອງປະຊຸມຂອງຄະນະກຳມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ທົ່ວປະເທດ ຄັ້ງທີ III ກ່ຽວກັບການແກ້ໄຂບັນຫາຂອງພາກທຸລະກິດ ໂດຍສະເພາະຢູ່ແຂວງສະຫວັນນະເຂດ ເປັນຕົ້ນບັນຫາການເກັບຄ່າບູລະນະໂຄງລ່າງພື້ນຖານ ຢູ່ດ່ານສາກົນແດນສະຫວັນ; ບັນຫາການເກັບຄ່າບໍລິການຜ່ານທ່າບົກສະຫວັນນະເຂດ ແລະ ບັນຫາອື່ນໆທີ່ປິ່ນອ້ອມ. ກອງປະຊຸມ ໄດ້ຮັບຟັງການລາຍງານຄວາມຄືບໜ້າໃນການແກ້ໄຂບັນດາບັນຫາທີ່ສົ່ງຜົນກະທົບຕໍ່ພາກທຸລະກິດ ທາງດ້ານການຄ້າ ແລະ ການຂົນສົ່ງ ຢູ່ແຂວງສະຫວັນນະເຂດ ຈາກກອງເລຂາຄະນະກຳມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ. ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ປະກອບຄຳເຫັນ ແລກປ່ຽນຊຶ່ງກັນ ແລະ ກັນ ຢ່າງກົງໄປກົງມາ, ສ້າງສັນ ແລະ ພາວະວິໄສ ຕໍ່ບັນດາບັນຫາທີ່ເກີດຂຶ້ນ ໃນໄລຍະຜ່ານມາ.

ໃນໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ໃຫ້ກຽດມີຄຳເຫັນຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍຕໍ່ຜູ້ເຂົ້າຮ່ວມກອງປະຊຸມທີ່ໄດ້ປະກອບສ່ວນແລກປ່ຽນຄໍາຄິດເຫັນ ຊຶ່ງໄດ້ຍົກໃຫ້ເຫັນບັນຫາ ແລະ ສະເໜີທິດທາງວິທີການແກ້ໄຂ ເພື່ອເຮັດໃຫ້ການຄ້າ ແລະ ການຂົນສົ່ງ ມີຄວາມສະດວກ, ຫຼຸດຜ່ອນຕົ້ນທຶນ ຂອງພາກທຸລະກິດ, ສ້າງສະພາບແວດລ້ອມທີ່ດີ ເພື່ອເອື້ອອໍານວຍໃຫ້ແກ່ການລົງທຶນ ແລະ ການດໍາເນີນທຸລະກິດ, ພ້ອມນີ້ຍັງໄດ້ກ່າວວ່າ: ວຽກງານອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ມີບົດບາດສໍາຄັນຕໍ່ການພັດທະນາເສດຖະກິດ-ສັງຄົມ ຊຶ່ງເປັນໜຶ່ງໃນວຽກຈຸດສຸມ ໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໃນປັດຈຸບັນ ໂດຍສະເພາະຄວາມພະຍາຍາມໃນການຫຼຸດຜ່ອນເວລາ ແລະ ຕົ້ນທຶນທາງດ້ານການຄ້າ ແລະ ການຂົນສົ່ງ, ໄລຍະຜ່ານມາ ສປປ ລາວ ໄດ້ເລີ່ມພັດທະນາການບໍລິການໂລຈີສຕິກ ແລະ ຂົນສົ່ງສິນຄ້າຫຼາຍຮູບແບບ ເພື່ອສະໜັບສະໜູນການຫັນຈາກ ປະເທດບໍ່ມີທາງອອກສູ່ທະເລ ເປັນປະເທດເຊື່ອມໂຍງດ້ວຍການການພັດທະນາດ່ານສາກົນ, ທ່າບົກ, ລົດໄຟລາວ-ຈີນ ເພື່ອອໍານວຍຄວາມສະດວກ ໃຫ້ການຂົນສົ່ງສິນຄ້ານໍາເຂົ້າ-ສົ່ງອອກ ແລະ ຜ່ານແດນ ໃຫ້ມີຕົ້ນທຶນທີ່ຕໍ່າ ກາຍເປັນຈຸດດຶງດູດການຄ້າ ແລະ ການລົງທຶນພາຍໃນ, ພາກພື້ນ ແລະ ສາກົນ. ອັນສຳຄັນ, ທ່ານຮອງນາຍົກໄດ້ເນັ້ນໜັກໃຫ້ເອົາໃຈໃສ່ບາງຈຸດ ເປັນຕົ້ນ:ໃຫ້ປັບປຸງພື້ນຖານໂຄງລ່າງ ດ່ານສາກົນແດນສະຫວັນ, ປັບປຸງບູລະນະ ແລະ ຂະຫຍາຍດ່ານສະຫວັນນະເຂດ-ລາວບາວໃຫ້ກວ້າງກວ່າເກົ່າ; ມອບໃຫ້ພາກສ່ວນກ່ຽວຂ້ອງ ປຶກສາຫາລືກັນ ເພື່ອຊອກຫາ ບໍລິສັດທີ່ມີທ່າແຮງ ມາບູລະນະເສັ້ນທາງເລກ 9 ໃຫ້ຮັບປະກັນຜົນສຳເລັດໂດຍໄວ; ກ່ຽວກັບຄ່າບໍລິການທ່າບົກສະຫວັນນະເຂດ ມອບໃຫ້ພາກສ່ວນກ່ຽວຂ້ອງກວດກາຢ່າງລະອຽດ ແລະ ແກ້ໄຂຢ່າງຮີບດ່ວນ; ໃຫ້ສືບຕໍ່ພັດທະນາພື້ນຖານໂຄງລ່າງຂອງແຂວງ ໃຫ້ເຊື່ອມຈອດ, ສະດວກສະບາຍ ໃນການຂົນສົ່ງລະຫວ່າງປະເທດ; ດ້ານວຽກງານກະສິກຳ ສະເໜີໃຫ້ແຂວງສະຫວັນນະເຂດສົມທົບກັນຄົ້ນຄວ້າເພີ່ມຄວາມສາມາດ ໃນການສະໜອງວັດຖຸດິບ ໃຫ້ບັນດາໂຮງງານໄດ້ຫຼາຍຂຶ້ນ ເຮັດໃຫ້ບັນດາໂຮງງານ ຫຼຸດຜ່ອນການນຳເຂົ້າວັດຖຸດິບຈາກຕ່າງປະເທດ, ທັງເປັນການສ້າງລາຍຮັບ ແລະ ຈຳກັດການນຳໃຊ້ເງິນຕາ ອອກນອກປະເທດ, ເຮັດໃຫ້ເສດຖະກິດຂອງແຂວງ ຂະຫຍາຍຕົວຢ່າງວ່ອງໄວ.

ໃນໂອກາດມາເຮັດວຽກຢູ່ແຂວງສະຫວັນນະເຂດ ໃນຄັ້ງນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະຍັງໄດ້ເຄື່ອນໄຫວຕິດຕາມ-ຊຸກຍູ້ ບັນດາໂຄງລ່າງພື້ນຖານເສດຖະກິດທີ່ສຳຄັນ ຢູ່ພາຍໃນແຂວງ ເປັນຕົ້ນຢູ່ດ່ານສາກົນສະຫວັນ-ລາວບາວ; ເຂດເສດຖະກິດພິເສດສະຫວັນ-ເຊໂນ ແລະ ໂຮງງານຜະລິດເຈ້ຍ ຊັນເປເປີ້.

ຂ່າວ ແລະ ພາບ: ກົມປະຊາສຳພັນ ຫສນຍ.