ຮອງນາຍົກລັດຖະມົນຕີ ຢ້ຽມຢາມເມືອງໝອກ

ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຜູ້ຊີ້ນໍາວຽກງານຂົງເຂດການປົກຄອງ ແລະ ວັດທະນະທໍາ-ສັງຄົມ ພ້ອມດ້ວຍຄະນະຈາກສູນກາງ ມິທ່ານ ບຸນຈັນ ສີວົງພັນ ເຈົ້າແຂວງ ຊຽງຂວາງ ພ້ອມດ້ວຍຄະນະ ລົງຢ້ຽມຢາມ ແລະ ເຮັດວຽກຢູ່ເມືອງໝອກ ແຂວງຊຽງຂວາງໃນວັນທີ 18 ກຸມພາ ຜ່ານມາ. ທ່ານ ພັນເອກ ມີສຸກ ຂັນທະຍົງທອງ ເຈົ້າເມືອງໆໝອກ ໄດ້ລາຍງານການພັດທະນາເສດຖະກິດ-ສັງຄົມຂອງເມືອງໃນໄລຍະຜ່ານມາ, ທົ່ວເມືອງມີ 28 ບ້ານ ມີ 4 ກຸ່ມ ມີ 1 ຈຸດສຸມພັດທະນາຂອງກະຊວງປ້ອງກັນປະເທດ, ມີ 2.590 ຄອບຄົວ ມີ16.430 ຄົນ ຍິງ 7.947 ຄົນ, ລາຍຮັບບັນລຸ 239,59 ຕື້ກີບ, ເສດຖະກິດຂະຫຍາຍຕົວ 5,25%, ທຽບໃສ່ແຜນການຫຼຸດຄາດໝາຍ 0,25%, ສະເລ່ຍໄດ້ 14.071.181 ກີບຕໍ່ຄົນຕໍ່ປີ ທຽບໃສ່ແຜນການປີປະຕິບັດໄດ້98,65%. 
ໂອກາດນີ້, ທ່ານ ຮອງນາຍົກລັດຖະມົນຕີ ໄດ້ເນັ້ນໜັກໃຫ້ການນໍາເມືອງເອົາໃຈໃສ່ຊີ້ນຳ-ນຳພາຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫົງບ, ວຽກງານປັບປຸງກໍ່ສ້າງພັກໃຫ້ປອດໄສເຂັ້ມແຂງໜັກແໜ້ນ, ວຽກງານສ້າງພະນັກງານນຳພາຄຸ້ມຄອງ, ສືບຕໍ່ຈັດຕັ້ງປະຕິບັດແຜນພັດທະນຍາເສດຖະກິດ-ສັງຄົມຂອງເມືອງ, ແຂວງໃຫ້ປະສົບຜົນສຳເລັດຕາມແຜນທີ່ກຳນົດໄວ້, ຄົ້ນຄ້ວານຳໃຊ້ ແລະ ເສີມຂະຫຍາຍທ່າແຮງບົ່ມຊ້ອນຂອງເມືອງໃຫ້ມີປະສິດທິຜົນສູງເພື່ອການສ້າງສາພັດທະນາໃຫ້ໄດ້ຮັບຜົນດີເປັນກ້າວໆ, ເອົາໃຈໃສ່ວຽກງານແຂ່ງຂັນຮັກຊາດແລະ ພັດທະນາ, ວຽກງານການແກ້ໄຊຄວາມທຸກຍາກ, ຄົ້ນຄ້ວາເຊື່ອມຊຶມບັນດານິຕິກຳຕ່າງໆ ຂອງຂັ້ນເທິງໃຫ້ເຂົ້າສູ່ລວງເລິກ, ຊຸກຍູ້ ສົ່ງເສີມວຽກງານການທ່ອງທ່ຽວ ໃນປີທ່ອງທ່ຽວລາວ 2024 ຢ່າງແຂງແຮງ, ວຽກງານການຮ່ວມມືກັບຕ່າງປະເທດໂດຍສະເພາະກັບບັນດາປະເທດເພື່ອນມິດຍຸດທະສາດ ແລະ ຄູ່ຮ່ວມພັດທະນາຢູ່ພາຍໃນທ້ອງຖິ່ນຂອງຕົນໃຫ້ມີປະສິດທິພາບ ແລະ ປະສິດທິຜົນສູງ. ໂອກາດ ທີ່ມາຢ້ຽມຢາມເມືອງໝອກໃນຄັ້ງນີ້, ຄະນະຜູ້ແທນກໍໄດ້ໄປຢ້ຽມຢາມຄອບຄົວຕົວແບບໃນການລ້ຽງງົວ, ທອມງົວຢູ່ບ້ານໝໍ້ ແລະ ເບິ່ງພື້ນທີ່ການປູກສາລີຂອງປະຊາຊົນບ້ານໝໍ້, ບ້ານຊຽງນາມອນ ແລະ ບ້ານຊຽງເໝັ້ນຕື່ມອີກ
(ຂ່າວ: ບຸນມີ ແສງທຸມມີ)