 |
ທ່ານ ສຸກັນ ບຸນຍົງ ຮອງເລຂາພັກແຂວງ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງ, ການປັບປຸງການຈັດຕັ້ງຂັ້ນພະແນກການ, ຕິດພັນກັບການຈັດຕັ້ງປະຕິບັດ ວຽກງານກະກຽມ ແລະ ດຳເນີນກອງປະຊຸມໃຫຍ່ຜູ້ແທນອົງຄະນະພັກແຂວງຫຼວງພະບາງ ຄັ້ງທີ IX.ປັດຈຸບັນ ໄດ້ສໍາເລັດການດໍາເນີນກອງປະຊຸມໃຫຍ່ ອົງຄະນະພັກເມືອງ, ນະຄອນ ຫຼວງພະບາງ, ອົງຄະນະພັກກອງບັນຊາການ ແລະ ຮາກຖານພັກໃນທົ່ວແຂວງ; ຍັງ 1 ຮາກຖານຄື: ໜ່ວຍພັກສະພາປະຊາຊົນແຂວງ, ພ້ອມນັ້ນ ໄດ້ສໍາເລັດກອງປະຊຸມໃຫຍ່ ສະຫະພັນນັກຮົບເກົ່າແຂວງ, ກອງປະຊຸມໃຫຍ່ອົງການຈັດຕັ້ງມະຫາຊົນຂັ້ນແຂວງ; ສຳລັບກະກຽມຄວາມພ້ອມ ໃຫ້ແກ່ການດໍາເນີນກອງປະຊຸມໃຫຍ່ຜູ້ແທນ ອົງຄະນະພັກແຂວງ ຄັ້ງທີ IX ພວມດຳເນີນໄປຕາມຂັ້ນຕອນ, ເປັນຕົ້ນດ້ານເນື້ອໃນ ໄດ້ກະກຽມເອກະສານແຕ່ລະບົດສຳເລັດໂດຍພື້ນຖານ ແລະ ຈະມີການຈັດກອງປະຊຸມສຳມະນາວິທະຍາສາດ ເພື່ອລະດົມແນວຄວາມຄິດໃສ່ແຕ່ລະເອກະສານຕື່ມ, ພ້ອມນັ້ນ ໄດ້ມີການຈັດຕັ້ງການທາບທາມບຸກຄະລາກອນຕາມລະບຽບ, ປັດຈຸບັນພວມດຳເນີນໃນຮອບທີ່ 1.ສ່ວນດ້ານຂະບວນການ ໄດ້ເຄື່ອນໄຫວຕິດພັນກັບວຽກງານວິຊາສະເພາະຂອງແຕ່ລະຂົງເຂດ ທັງໄດ້ກະກຽມບັນດາຕົວແບບ ເພື່ອຂຶ້ນປະກອບຄຳເຫັນຕໍ່ກອງປະຊຸມ.
 |
ສຳລັບການກະກຽມສ້າງຕັ້ງຕາແສງຢູ່ແຂວງຫຼວງພະບາງ, ໃນເບື້ອງຕົ້ນໄດ້ກຳນົດໃຫ້ມີທັງໝົດ 56 ຕາແສງ ໃນ 11 ເມືອງ ແລະ ນະຄອນຫຼວງພະບາງ ທັງກຳນົດໃຫ້ມີພະນັກງານປະຈຳຕາແສງປະມານ 800 ຄົນ.
ໃນໂອກາດນີ້, ທ່ານ ບຸນທອງ ຈິດມະນີ ໄດ້ມີຄໍາເຫັນຊີ້ນໍາໃຫ້ຄະນະພັກ-ຄະນະນໍາຂອງແຂວງ ສືບຕໍ່ກະກຽມການດຳເນີນກອງປະຊຸມໃຫຍ່ຕາມແຜນການທີ່ກຳນົດໄວ້ ໂດຍເລັ່ງໃສ່ດ້ານເນື້ອໃນ, ດ້ານບຸກຄະລາກອນ ແລະ ດ້ານຂະບວນການ, ສ່ວນການປັບປຸງຈັດຕັ້ງການຊັບຊ້ອນບຸກຄະລາກອນ ຂັ້ນພະແນກການທີ່ມີການຍຸບ ແລະ ໂຮມເຂົ້າກັນ ຕ້ອງປະຕິບັດໃຫ້ສອດຄ່ອງຕາມທິດຊີ້ນຳຂອງສູນກາງ ຮັບປະກັນເຮັດໃຫ້ບຸກຄະລາກອນ ມີຄວາມອຸ່ນອ່ຽນທຸ່ນທ່ຽງ ຕໍ່ການປະຕິບັດວຽກງານ, ພ້ອມນີ້ ໃຫ້ສືບຕໍ່ກະກຽມການສ້າງຕັ້ງຕາແສງ ໂດຍມີການເຮັດທົດລອງ ແລະ ຖອດຖອນບົດຮຽນ ເພື່ອປັບປຸງບັນດາວຽກງານຄົງຄ້າງ ເຮັດໃຫ້ການສ້າງຕັ້ງຕາແສງມີຄວາມສອດຄ່ອງຕາມລະບຽບການ, ຕ້ອງຮັບປະກັນໄດ້ ການປະຕິບັດວຽກງານຂັ້ນຮາກຖານທີ່ມີຄວາມເຂັ້ມແຂງ.
(ຂ່າວ: ຫຼວງພະບາງ)
ຄໍາເຫັນ