ຮອງປະທານປະເທດ ເນັ້ນໃຫ້ແຂວງວຽງຈັນເອົາໃຈໃສ່ຫຼາຍບັນຫາ

ໃນໂອກາດທີ່ສະຫາຍ ບຸນທອງ ຈິດມະນີ ກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນໃນລະຫວ່າງວັນ8-9 ເມສາຜ່ານມານີ້, ມີສະຫາຍ ຄຳພັນ ສິດທິດຳພາ ກໍາມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີຮອງເລຂາພັກແຂວງ, ບັນດາສະຫາຍໃນຄະນະປະຈຳພັກ, ກຳມະການພັກ, ພະນັກງານຫຼັກແຫຼ່ງພ້ອມດ້ວຍພະນັກງານ-ລັດຖະກອນພາຍໃນແຂວງຮ່ວມຕ້ອນຮັບ.
       ໃນໂອກາດທີ່ສະຫາຍ ຮອງປະທານປະເທດໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນໃນຄັ້ງ ສະຫາຍໄດ້ເນັ້ນໜັກຫຼາຍບັນຫາດັ່ງນີ້: 1. ສືບຕໍ່ເຄື່ອນໄຫວເຮັດວຽກງານການເມືອງ-ແນວຄິດ ແກ່ບັນດາພະນັກງານ, ສະມາຊິກພັກ, ທະຫານ, ຕຳຫຼວດ ລວມເຖິງພໍ່ແມ່ປະຊາຊົນບັນດາເຜົ່າໃຫ້ແຂງແຮງ, ເລິກເຊິ່ງ ແລະ ທົ່ວເຖິງກວ່າເກົ່າ, ຖືວຽກງານນີ້ເປັນກົກ ຕິດພັນກັບຂະບວນການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ, ປັບປຸງລະບົບການເມືອງຢູ່ຮາກຖານ, ລະບອບແບບແຜນວິທີເຮັດວຽກ ແລະ ການແກ້ໄຂບັນຫາຕ່າງໆທີ່ເກີດຂຶ້ນໃນກົງຈັກພັກ-ພະນັກງານຢູ່ຮາກຖານແຕ່ລະບ່ອນ ເພື່ອສ້າງຄວາມເຂັ້ມແຂງ ແລະ ເພີ່ມຄວາມເຊື່ອໝັ້ນຕໍ່ການນໍາພາ ຂອງຄະນະພັກແຕ່ລະຂັ້ນ ຕໍ່ມະຫາຊົນໃຫ້ສູງຂຶ້ນ. 2. ຖືວຽກງານພັດທະນາເສດຖະກິດເປັນໃຈກາງ, ປະຕິບັດນະໂຍບາຍ ຊຸກຍູ້ ສົ່ງເສີມເສດຖະກິດຂອງປະຊາຊົນ ໃຫ້ແຂງແຮງກວ່າເກົ່າ ໂດຍສະເພາະ ນະໂຍບາຍການພັດທະນາຕາມແລວເສດຖະກິດ 443 ຂອງແຂວງ ທີ່ກໍານົດອອກໃຫ້ປະກົດຜົນເປັນຈິງ ເພື່ອຍົກລະດັບເສດຖະກິດຂອງແຂວງ ກໍຄືຍົກລະດັບລາຍຮັບຂອງປະຊາຊົນໃຫ້ສູງຂຶ້ນກວ່າເກົ່າ, ເອົາໃຈໃສ່ສົ່ງເສີມບັນດາຫົວໜ່ວຍທຸລະກິດຂະໜາດນ້ອຍ, ຂະໜາດກາງ ແລະ ຈຸລະວິສາຫະກິດ ກໍຄືການຈັດຕັ້ງກຸ່ມການຜະລິດ ຂອງຄອບຄົວປະຊາຊົນ ຢູ່ຮາກຖານ ໃຫ້ມີການຂະຫຍາຍຕົວທີ່ເຂັ້ມແຂງ. 3. ນຳໃຊ້ທ່າແຮງດ້ານເສັ້ນທາງຄົມມະນາຄົມທີ່ສະດວກສະບາຍທີ່ແຂວງມີ, ສ້າງເງື່ຶອນໄຂເຂົ້າໃນການກະຕຸກຊຸກຍູ້ການພັດທະນາເສດຖະກິດຂອງແຂວງໃຫ້ດີຂຶ້ນ, ສຸມໃສ່ການຜະລິດເປັນສິນຄ້າເພື່ອສົ່ງອອກໃຫ້ຫຼາຍໆ. ພ້ອມນັ້ນ, ກໍໃຫ້ເອົາໃຈໃສ່ການກໍ່ສ້າງ ແລະ ຍົກລະດັບເສັ້ນທາງເຂົ້າເຖິງບັນ ດາບ້ານເຂດຫ່າງໄກສອກຫຼີກ ໃຫ້ທຽວໄດ້ສະດວກ, ດີກວ່າເກົ່າ ເພື່ອແກ້ໄຂຄວາມແຕກໂຕນກັນລະຫວ່າງຕົວເມືອງ ກັບ ຊົນນະບົດ ໃຫ້ໃກ້ຄຽງກັນທີ່ສຸດ. 4. ສຸມໃສ່ຈັດຕັ້ງປະຕິບັດບັນດາຄາດໝາຍສະຫັດສະວັດ ຂອງການພັດທະນາ ແລະ ຄາດໝາຍການພັດທະນາແບບຍືນຍົງ ຕາມແຜນທີ່ວາງໄວ້, ສືບຕໍ່ພັດທະນາດ້ານການຮຽນ-ການສອນໃຫ້ສູງຂຶ້ນ ພ້ອມທັງຊຸກຍູ້ໃຫ້ພໍ່ແມ່ປະຊາຊົນ ຊຸກຍູ້ສົ່ງເສີມລູກຫຼານເຂົ້າຮຽນຢ່າງເປັນປົກກະຕິ, ສຸມໃສ່ແກ້ໄຂບັນຫາການປະລະການຮຽນ-ການສອນຢູ່ຂັ້ນຮາກຖານ. ໃຫ້ຖືເອົາການປັບປຸງກໍ່ສ້າງ ແລະ ການພັດທະນາຄົນເປັນຫຼັກ. 5. ເພີ່ມທະວີການຫັນເອົາພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ເຮັດວຽກງານ 3 ສ້າງ. ເປົ້າໝາຍສ້າງໃຫ້ກາຍເປັນຮຸ່ນສືບທອດ ທີ່ມີຄວາມໜັກແໜ້ນທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ມີປະສົບການນໍາພາເຮັດວຽກຕົວຈິງ ຢູ່ຮາກຖານ,  ພ້ອມນີ້ ຕ້ອງໄດ້ເລືອກເຟັ້ນເອົາຜູ້ທີ່ມີຄວາມຮູ້ຄວາມສາມາດ, ມີຄວາມຮັບຜິດຊອບສູງ, ມີຄວາມເສຍສະຫຼະຮັບໃຊ້ປະຊາຊົນ ແລະ ເພື່ອສ່ວນລວມແທ້ໆ. ການຫັນພະນັກງານລົງຮາກຖານ ຕ້ອງຕິດພັນກັບການກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງພັກ. 6. ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ຕິດພັນກັບການຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ ແລະ ບັນຫາຫຍໍ້ທໍ້ອື່ນໆໃນສັງຄົມ ລວມທັງຄວາມເປັນລະບຽບຮຽບຮ້ອຍຕາມຊາຍແດນ, ສົມທົບແໜ້ນກັບກໍາລັງຫຼວງ, ເອົາໃຈໃສ່ສ້າງກໍາລັງທ້ອງຖິ່ນ ລວມທັງກອງຫຼອນ ໃຫ້ເຂັ້ມແຂງ ຕາມທິດນໍາການສ້າງທ່າສະໜາມສາມຂັ້ນ ເພື່ອຄໍ້າປະກັນຄວາມສະຫງົບ ແລະ ຄວາມປອດໄພຂອງສັງຄົມ ແຕ່ຮາກຖານຂຶ້ນມາ, ສ້າງຄວາມເຊື່ອໝັ້ນໃຫ້ປະຊາຊົນ ພ້ອມທັງປຸກລະດົມທຸກຊັ້ນຄົນ ເຂົ້າຮ່ວມວຽກງານນີ້ ຢ່າງຕັ້ງໜ້າ. 7. ຖືສໍາຄັນການກໍ່ສ້າງພັກ ແລະ ປັບປຸງຕົນເອງຕາມ 5 ຫຼັກການນໍາພາ ແລະ 3 ທິດນໍາ ເປັນຂອດຕັດສິນໃນວຽກງານປັບປຸງພັກ; ເພີ່ມທະວີວຽກງານຕິດຕາມ, ກວດກາ ແລະ ເດັດດ່ຽວແກ້ໄຂພະຍາດອາດຍາສິດ, ປະກົດການຫຍໍ້ທໍ້, ສໍ້ລາດບັງຫຼວງຂອງບຸກຄົນໃນຄະນະພັກ ແລະ ສະມາຊິກພັກ, ຮັບປະກັນໃຫ້ເປັນແບບຢ່າງນໍາໜ້າຂອງຜູ້ເປັນຫົວໜ້າໃນອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ໃນແຕ່ລະຂັ້ນ; ຊີ້ນຳການທົບທວນ ແລະ ປະເມີນຄືນການຈັດຕັ້ງປະຕິບັດມະຕິກອງປະຊຸມໃຫຍ່ຂອງຄະນະພັກແຕ່ລະຂັ້ນ ໂດຍສະເພາະ ກອງປະຊຸມໃຫຍ່ຂອງອົງຄະນະພັກຂັ້ນເມືອງ, ແຂວງ ຕິດພັນກັບການປັບປຸງພັກ, ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຢູ່ແຕ່ລະຂັ້ນໃຫ້ມີຄຸນນະພາບ.
    (ຂ່າວ: ແຂວງວຽງຈັນ)