ຮອງປະທານປະເທດ ພົບປະໂອ້ລົມການນຳຫຼັກແຫຼ່ງແຂວງເຊກອງ

ວັນທີ 20 ຕຸລາ ນີ້, ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດໄດ້ໂອ້ລົມໃຫ້ທິດຊີ້ນຳຫຼາຍບັນຫາສຳຄັນໃຫ້ການນຳຫຼັກແຫຼ່ງແຂວງເຊກອງ,ໂດຍການຕ້ອນຮັບຂອງທ່ານ ເຫຼັກໄຫຼ ສີວິໄລ ເລຂາພັກແຂວງ ເຈົ້າແຂວງເຊກອງ ມີການນຳຫຼັກແຫຼ່ງຂອງແຂວງ ແລະ ຂະ ແໜງການກ່ຽວຂ້ອງເຂົ້າຮ່ວມ.
ພາຍຫຼັງໄດ້ຮັບຟັງການລາຍງານຜົນສຳເລັດການນຳພາ-ຊີ້ນຳ ແລະ ຈັດຕັ້ງປະຕິບັດວຽກງານທີ່ພົ້ນເດັ່ນໃນໄລຍະ 9 ເດືອນຜ່ານມາ ແລະ ວຽກຈຸດສຸມ 3 ເດືອນທ້າຍປີ2023 ຂອງແຂວງໂດຍຫຍໍ້ຈາກທ່ານ ເຫຼັກໄຫຼ ສີວິໄລ ໂດຍໄດ້ຍົກໃຫ້ເຫັນໄລຍະ 9 ເດືອນໃນປີ 2023 ຜ່ານມາ ແຂວງເຊກອງປະສົບຜົນສຳເລັດຫຼາຍດ້ານ ໂດຍສະເພາະມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສຸກ,ເສດຖະກິດມີການຂະຫຍາຍຕົວ ໃນນີ້, ໂຕເລກອັດຕາການຂະຫຍາຍຕົວຂອງເສດຖະກິດໃນປີ 2023 ຢູ່ໃນລະດັບ 5% ບັນລຸໄດ້ 2.657 ຕື້ກີບ, ສະເລ່ຍລາຍຮັບຕໍ່ຫົວຄົນບັນລຸໄດ້ 19 ລ້ານກວ່າກີບ, ການຈັດຕັ້ງປະຕິບັດການເກັບລາຍຮັບເຂົ້າງົບປະມານໄດ້ 206 ກວ່າຕື້ກີບ ທຽບໃສ່ແຜນປະຕິບັດໄດ້ 88%, ພ້ອມນັ້ນແຂວງເຊກອງຍັງມີທ່າແຮງໃນການລົງທຶນໃນຫຼາຍຂົງເຂດ ເປັນຕົ້ນແມ່ນການລົງທຶນໃນຂົງເຂດພະລັງງານໄຟຟ້າ, ການຜະລິດກະສິກຳເປັນສິນຄ້າ, ການພັດທະນາພື້ນຖານໂຄງລ່າງທາງດ້ານຄົມມະນາຄົມ ແລະການແກ້ໄຂຄວາມທຸກຍາກຂອງປະຊາຊົນ, ຂະນະທີ່ວຽກງານຂົງເຂດວັດທະນະທໍາ-ສັງຄົມ ແລະ ວຽກງານພັກພະນັກງານກໍໄດ້ຮັບການພັດທະນາດີຂຶ້ນຕາມລຳດັບ ແລະ ດຳເນີນໄປຖືກທິດ. ແນວໃດກໍດີ, ເພື່ອເຮັດໃຫ້ການຈັດຕັ້ງປະຕິບັດບັນດາແຜນການ ແລະ ວຽກຈຸດສຸມຕໍ່ໜ້າໃຫ້ມີຜົນສຳເລັດ, ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມ ແລະ ຊີ້ນຳຫຼາຍບັນຫາສໍາຄັນ ຊຶ່ງວຽກງານຈຸດສຸມທີ່ຕ້ອງໄດ້ເອົາໃຈໃສ່ແມ່ນ 2 ວຽກງານສຳຄັນເປັນຕົ້ນສືບຕໍ່ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ໂດຍສະເພາະການແກ້ໄຂອັດຕາການແລກປ່ຽນເງິນຕາພາຍໃນແຂວງໃຫ້ເຂົ້າສູ່ລະບົບ; ການພັດທະນາແຫຼ່ງທ່ອງທ່ຽວເປັນວຽກງານທີ່ສຳຄັນທີ່ສ້າງລາຍຮັບໃຫ້ເຂົ້າປະເທດກໍຄືທ້ອງຖິ່ນ. ສະນັ້ນ, ການນຳຂອງແຂວງ ແລະ ຂະ ແໜງການກ່ຽວຂ້ອງຕ້ອງກຳນົດແຜນຍຸດທະສາດໃນການພັດທະນາການທ່ອງທ່ຽວຕາມທ່າແຮງທີ່ມີ ດ້ວຍການສຸມໃສ່ພັດທະນາຢ່າງຈິງຈັງໃຫ້ກາຍເປັນການທ່ອງທ່ຽວແບບເຊື່ອມໂຍງລະຫວ່າງພາຍໃນ ແລະ ຕ່າງ ປະເທດເພື່ອສ້າງລາຍຮັບໃຫ້ປະຊາຊົນ, ເປັນການປະກອບສ່ວນຍູ້ແຮງພັດທະນາເສດຖະກິດ-ສັງຄົມຂອງຊາດກໍຄືທ້ອງຖິ່ນ. ພ້ອມນີ້, ທ່ານຍັງໄດ້ໃຫ້ທິດຊີ້ນຳ 3 ຂະແໜງການຄື: ຂົງເຂດແຜນການ ແລະ ການລົງທຶນ, ຂົງເຂດກະສິກຳ ແລະ ປ່າໄມ້ ແລະ ຂົງເຂດອຸດສາຫະກຳ ແລະ ການຄ້າ ໃຫ້ສືບຕໍ່ຈັດຕັ້ງປະຕິບັດພາລະບົດບາດຂອງຕົນ ໃນການຂັບເຄື່ອນເສດຖະກິດຂອງແຂວງ; ໃຫ້ການນຳບັນດາຂະແໜງການມີການປະສານສົມທົບ ແລະ ກຳນົດແຜນຍຸດທະສາດຢ່າງເປັນລະບົບ ເຮັດວຽກໃຫ້ມີແບບແຜນ ແລະ ເປັນລະບົບຕ່ອງໂສ້ໃນການວາງແຜນດຶງດູດການລົງທຶນທີ່ເປັນບຸລິມະສິດຕົ້ນຕໍ; ການສົ່ງເສີມປະຊາຊົນຜະລິດກະສິກຳ ແລະ ການສ້າງມູນຄ່າເພີ່ມໃຫ້ສິນຄ້າທີ່ຜະລິດໄດ້ພາຍໃນແຂວງ ເພື່ອຄ້ຳປະກັນທາງດ້ານສະບຽງອາຫານ ສາມາດຜະລິດກຸ້ມກິນ ແລະ ກາຍເປັນສິນຄ້າພາຍໃນແຂວງ ແລະ ສົ່ງອອກຕ່າງແຂວງ ຄຽງຄູ່ ກັບການຫຼຸດຜ່ອນການນຳເຂົ້າສິນຄ້າຈາກຕ່າງປະເທດ.
(ຂ່າວ-ພາບ: ວິລະກອນ ຄຳວິໄລ)