ນາຍົກລັດຖະມົນຕີ ຕ້ອນຮັບການນຳກະຊວງກະລາໂຫມຣາຊະອານາຈັກໄທ

ທ່ານນາຍົກລັດຖະມົນຕີໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການໃນຄັ້ງນີ້ ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບຖານບ້ານໃກ້ເຮືອນຄຽງທີ່ດີລະຫວ່າງສອງລັດຖະບານ ແລະ ປະຊາຊົນສອງຊາດກໍຄືສອງກອງທັບລາວ - ໄທ ໃຫ້ຈະເລີນງອກງາມຍິ່ງໆຂຶ້ນ. ພ້ອມນີ້, ໄດ້ສະເໜີໃຫ້ສອງກອງທັບລາວ - ໄທ ສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບດ້ວຍການແລກປ່ຽນຄະນະຜູ້ແທນຂັ້ນຕ່າງໆໃຫ້ເປັນປົກກະຕິ, ມີການແລກປ່ຽນບົດຮຽນ ແລະ ປະສົບການທາງດ້ານຕ່າງໆຊຶ່ງກັນ ແລະ ກັນ ໂດຍສະເພາະໃນຂົງເຂດວຽກງານສ້າງພະລາທິການຮັບໃຊ້ກອງທັບ; ສືບຕໍ່ປະສານສົມທົບໃນການສະກັດກັ້ນການສ້າງຄວາມບໍ່ສະຫງົບຢູ່ຕາມບໍລິເວນຊາຍແດນຂອງສອງປະເທດໂດຍສະເພາະສະກັດກັ້ນການລັກລອບເຂົ້າເມືອງຜິດກົດໝາຍ, ອາຊະຍາກຳຂ້າມຊາດ, ອາຊະຍາກຳທາງໂທລະຄົມມະນາຄົມ, ການຄ້າມະນຸດ, ການຄ້າຂາຍເຖື່ອນ, ການຂົນສົ່ງ ແລະ ຄ້າຂາຍສິ່ງເສບຕິດໂດຍປະສານກັນຜ່ານທາງການທູດ ແລະ ທຸກກົນໄກທີ່ມີຢູ່ໃນປັດຈຸບັນເພື່ອປະຕິບັດໜ້າທີ່ຢ່າງມີປະສິດທິຜົນ. ໃຫ້ຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄທລາວ-ໄທ, ໄທ-ລາວສືບຕໍ່ພົບປະກັນຕາມກົນໄກການຮ່ວມມື, ກໍຄືທຸກໆກົນໄກແຕ່ລະຂັ້ນໃຫ້ດໍາເນີນການຢ່າງມີປະສິດຕິຜົນ; ສືບຕໍ່ຊຸກຍູ້, ສະໜັບສະໜູນການປັກຫຼັກໝາຍຊາຍແດນຈຸດທີ່ຍັງຄົງຄ້າງໃຫ້ມີຄວາມຄືບໜ້າເປັນກ້າວໆເພື່ອປ້ອງກັນບັນຫາທີ່ເປັນຊ່ອງວ່າງໃຫ້ກຸ່ມຄົນບໍ່ດີສວຍໃຊ້ຈຸດທີ່ຍັງຄົງຄ້າງເຄື່ອນໄຫວກໍ່ຄວາມບໍ່ສະຫງົບຕາມບໍລິເວນຊາຍແດນຂອງສອງປະເທດ. ນອກນັ້ນໄດ້ຝາກຄວາມຢື້ຢາມຖາມຂ່າວໄປຍັງທ່ານນາຍົກລັດຖະມົນຕີແຫ່ງຣາຊະອານາຈັກໄທ.

ໂອກາດດັ່ງກ່າວ, ລັດຖະມົນຕີວ່າການກະຊວງກະລາໂຫມແຫ່ງຣາຊະອານາຈັກໄທໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງຂອງ ສປປ ລາວ; ພ້ອມທັງສະແດງຄວາມໝັ້ນໝາຍຈະສືບຕໍ່ປະສານສົມທົບ ແລະ ຮ່ວມມືຢ່າງໃກ້ຊິດກັບກະຊວງປ້ອງກັນປະເທດແຫ່ງ ສປປ ລາວ ເພື່ອຮ່ວມກັນແກ້ໄຂບັນຫາຄົງຄ້າງຕ່າງໆ, ແລກປ່ຽນບົດຮຽນແລະ ນໍາເອົາທິດຊີ້ນໍາຂອງທ່ານນາຍົກລັດຖະມົນຕີໄປຈັດຕັ້ງປະຕິບັດໃຫ້ປະກົດຜົນເປັນຮູບປະທຳ, ປະກອບສ່ວນເສີມສ້າງສາຍພົວພັນ ແລະ ການຮ່ວມມືໄທ-ລາວໃຫ້ເກີດດອກອອກຜົນຫຼາຍຂຶ້ນ. ນອກນັ້ນຍັງໄດ້ກ່າວສະແດງຄວາມເສຍໃຈຕໍ່ການຈາກໄປຂອງທ່ານ ໄຊສົມພອນ ພົມວິຫານ ອະດີດປະທານສະພາແຫ່ງຊາດລາວ.

(ຂ່າວ-ພາບ: ກົມປະຊາສຳພັນຫສນຍ)