ຮອງປະທານປະເທດ ຕິດຕາມໂຄງການ​ພັດ​ທະ​ນາຢູ່ຄຳມ່ວນ

ໂອກາດດັ່ງກ່າວ, ຄະນະໄດ້ລົງຕິດຕາມໂຄງການປັບປຸງ ແລະ ບູລະນະສວນອານຸສາວະລີ ປະທານ ໄກສອນ ພົມວິຫານ ຢູ່ບ້ານໂພນສະອາດ ເມືອງທ່າແຂກ ທີ່ໄດ້ຮັບການສະໜັບສະໜູນທຶນຈາກບໍລິສັດ ລາວຄາຍຢວນ ມູນຄ່າ 4 ຕື້ກີບ, ຮັບເໝົາກໍ່ສ້າງໂດຍ ບໍລິສັດ TNNN ພັດທະນາເສດຖະກິດ, ການຄ້າ ແລະ ການລົງທຶນ ຈຳກັດຜູ້ດຽວ. ປັດຈຸບັນ ໂຄງການມີຄວາມຄືບໜ້າປະມານ 10% ແລະ ຄາດວ່າຈະສໍາເລັດໃນເດືອນເມສາ 2027. ເພື່ອພັດທະນາເປັນສວນສາທາລະນະທັນສະໄໝ, ເປັນບ່ອນພັກຜ່ອນຂອງປະຊາຊົນ ແລະ ຈຸດດຶງດູດນັກທ່ອງທ່ຽວ ຊ່ວຍຍົກລະດັບພູມີທັດຂອງເມືອງທ່າແຂກ.

ຈາກນັ້ນ ຄະນະໄດ້ລົງຕິດຕາມໂຄງການກໍ່ສ້າງສາຍສົ່ງໄຟຟ້າ 230 kV ແລະ ສະຖານີໄຟຟ້າ 230/115 kV ຂອງບໍລິສັດ (EDL-T) ຢູ່ບ້ານນາຕຸງ ເມືອງມະຫາໄຊ. ໂຄງການດັ່ງກ່າວມີຄວາມຄຄືບໜ້າຫຼາຍໜ້າວຽກເປັນຕົ້ນວຽກກໍ່ສ້າງສາຍສົ່ງມີຄວາມຄືບໜ້າ 26.5% ແລະ ວຽກກໍ່ສ້າງສະຖານີບັນລຸ 47.2%,.ໂຄງການນີ້ມີຄວາມສຳຄັນຕໍ່ການສະໜອງໄຟຟ້າໃຫ້ເຂດອຸດສາຫະກຳໃນພາກກາງ ແລະ ພາກໃຕ້ ລວມທັງຊ່ວຍເສີມສ້າງຄວາມໝັ້ນຄົງດ້ານພະລັງງານ.

ໂອກາດດຽວກັນ ຍັງໄດ້ຕິດຕາມການກໍ່ສ້າງໂຮງຮຽນສາມັນຊົນເຜົ່າ ທີ່ພວມດຳເນີນການກໍ່ສ້າງ ໂຄງການດັ່ງກ່າວ ຕັ້ງຢູ່ບ້ານໂພນສະອາດ, ມີເນື້ອທີ່ທັງລວມ 37,268 ຕາແມັດ, ມີມູນຄ່າ 183.2 ຕື້ດົງ. ໃນນັ້ນ, ປະກອບມີທຶນຊ່ວຍເຫຼືອຈາກລັດຖະບານ ສສ ຫວຽດນາມ ຈໍານວນ 179.7 ຕື້ດົ່ງ ແລະ ທຶນສົມທົບຈາກຝ່າຍ ລັດຖະບານ ສປປ ລາວ ຈໍານວນ 3.4 ຕື້ດົງ. ຮັບເໝົາກໍ່ສ້າງໂດຍບໍລິສັດລົງທຶນການຄ້າ ພີເອັດຊີ ຈໍາກັດ, ຄາດວ່າໂຄງການຈະສໍາເລັດກ່ອນວັນທີ 30 ສິງຫາ 2028.

ສ່ວນໂຄງການປັບປຸງທາງຫຼວງແຫ່ງຊາດ ເລກ 12 ແຕ່ເມືອງທ່າແຂກຫາດ່ານສາກົນນາເພົ້າ ມີຄວາມຍາວລວມທາງຫຼວງ ແລະ ທາງເວັ້ນເມືອງປະມານ 147.5 ກິໂລແມັດ, ໃຊ້ທຶນກູ້ຢືມດອກເບ້ຍຕ່ຳ ແລະ ທຶນຊ່ວຍເຫຼືອຈາກອົງການ NEDA ຂອງຣາຊະອານາຈັກໄທ ລວມມູນຄ່າ 1,833.747 ລ້ານບາດ. ໂຄງການມີກຳນົດກໍ່ສ້າງ ແຕ່ວັນທີ 15 ກໍລະກົດ 2025 ຫາວັນທີ 14 ມັງກອນ 2028. ປັດຈຸບັນ ມີຄວາມຄືບໜ້າສະເລ່ຍບັນລຸ 34.73% ທຽບໃສ່ແຜນການ 35.31%ໂດຍຍັງປະເຊີນບັນຫາທ້າທາຍປະກອບມີ ລາຄານ້ຳມັນ ແລະ ວັດສະດຸກໍ່ສ້າງສູງຂຶ້ນ, ຝົນຕົກໜັກ ແລະ ລົດບັນທຸກນ້ຳໜັກເກີນທີ່ສັນຈອນຜ່ານເສັ້ນທາງດັ່ງກ່າວປະມານ 1,300-1,500 ຄັນຕໍ່ວັນ ສົ່ງຜົນຕໍ່ສະພາບທາງ ແລະ ກະທົບຕໍ່ການກໍ່ສ້າງ.

ໂອກາດນີ້ ທ່ານ ນາງ ວຽງທອງ ສີພັນດອນໄດ້ຕີລາຄາສູງຕໍ່ຄວາມເອົາໃຈໃສ່ໃນການປະຕິບັດວຽກງານຂອງບໍລິສັດ, ທັງສະເໜີໃຫ້ການນໍາແຂວງຊ່ວຍຊຸກຍູ້ ປະສານງານ ຢ່າງກົມກຽວ, ລວມເຖິງການຈໍາກັດ ຄຸ້ມຄອງນໍ້າໜັກ ໃນການຂົນສົ່ງ ບໍ່ໃຫ້ສ້າງຄວາມເສຍຫາຍຕື່ມອີກຕໍ່ເສັ້ນທາງເລກ 12 ທີ່ກຳລັງສ້ອມແປງປັບປຸງ ແລະ ການອໍານວຍຄວາມສະດວກໃນດ້ານອື່ນໆທີ່ຕິດພັນກັບຄວາມຮັບຜິດຊອບຂອງອົງການຈັດຕັ້ງລັດ ເພື່ອເຮັດໃຫ້ໂຄງການກໍ່ສ້າງເສັ້ນທາງດັ່ງກ່າວບັນລຸຜົນສໍາເລັດຕາມຄາດໝາຍ.

ຂ່າວ : ມະນີວັນ