ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ ທ່ານ ນາງ ແອນນາ ຮາມມາແກຣນ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາ ແໜ່ງເປັນເອກອັກຄະຣາຊະທູດວິສາມັນຜູ້ມີອໍານາດເຕັມ ແຫ່ງ ຣາຊະອານາຈັກຊູແອດປະຈຳ ສປປ ລາວ; ສອງຝ່າຍໄດ້ຕີລາຄາສູງການພົວພັນຮ່ວມມືອັນດີງາມ ລະຫວ່າງ ສປປ ລາວ ແລະ ຊູແອດ ເປັນເວລາກວ່າ 6 ທົດສະວັດ ຜ່ານມາ. ພ້ອມດຽວກັນນີ້, ທ່ານຮອງນາຍົກລັດຖະມົນຕີ ໄດ້ສະ ແດງຄວາມຂອບໃຈຢ່າງຈິງໃຈຕໍ່ການຊ່ວຍເຫຼືອເພື່ອການພັດທະນາໂດຍຜ່ານຂອບການຮວມມື ຂອງສະຫະພາບເອີຣົບ (EU) ຊຶ່ງໄດ້ກາຍເປັນການປະກອບສ່ວນອັນສໍາຄັນ ແລະ ໜັກແໜ້ນຕໍ່ເປົ້າໝາຍການພັດທະນາເສດຖະກິດ-ສັງຄົມຂອງ ສປປ ລາວ ລວມທັງການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ. ນອກຈາກນັ້ນ, ກໍຍັງໄດ້ແຈ້ງໃຫ້ທ່ານທູດຊາບກ່ຽວກັບ ຄວາມພ້ອມໃນການອອກຈາກສະຖານະພາບ ປະເທດດ້ອຍພັດທະນາພ້ອມທັງສະແດງຄວາມຫວັງເປັນຢ່າງຍິ່ງວ່າ ສະຫະພາບເອີຣົບ ຈະສືບຕໍ່ໃຫ້ການສະໜັບສະໜູນ ສປປ ລາວ ໃນດ້ານຕ່າງໆທີ່ກ່ຽວຂ້ອງ ພາຍຫຼັງທີ່ຫຼຸດພົ້ນການອອກຈາກສະຖານະພາບປະເທດດ້ອຍພັດທະນາຢ່າງເປັນທາງການ ໃນທ້າຍປີ 2026 ແລະ ໄດ້ສະເໜີໃຫ້ ຊູແອດພິຈາລະນາສືບຕໍ່ໃຫ້ການຮ່ວມມື, ສະໜັບສະໜູນ ແລະ ຊຸກຍູ້ສົ່ງເສີມໃຫ້ບັນດານັກທຸລະກິດຫັນມາລົງທຶນຢູ່ ສປປ ລາວໃຫ້ຫຼາຍຍິ່ງຂຶ້ນໂດຍສະເພາະໃນຂົງເຂດພະລັງງານສະອາດ, ການທ່ອງທ່ຽວ ແລະ ຂະແໜງອື່ນໆທີ່ທັງສອງຝ່າຍມີທ່າແຮງຮ່ວມກັນ ລວມທັງການໄປມາຫາສູ່ ລະຫວ່າງ ປະຊາຊົນຂອງສອງປະເທດ.
ໃນໂອກາດດຽວກັນນີ້, ທ່ານນາງ ແອນນາ ຮາມມາແກຣນ ກໍໄດ້ສະແດງຄວາມຂອບໃຈ ຕໍ່ຄຳເວົ້າອັນຈົບງາມ ແລະ ການຕ້ອນຮັບອັນອົບອຸ່ນ ພ້ອມທັງສະແດງຄວາມໝາຍໝັ້ນທີ່ຈະປະຕິບັດ ໜ້າທີ່ການທູດຂອງຕົນຢ່າງສຸດຄວາມສາມາດ ເພື່ອສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ສປປ ລາວ ແລະ ຊູແອດ ໃຫ້ໄດ້ຮັບການສືບຕໍ່ເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.
(ຂ່າວ: ກຕທ)
ຄໍາເຫັນ