ຊາວໜຸ່ມລາວ-ຊາວໜຸ່ມນະຄອນເຫວ້ ສືບຕໍ່ເສີມຂະຫຍາຍຫຼາຍຂົງເຂດວຽກງານສໍາຄັນ

ສະຫາຍ ທອງລີ ສີສຸລິດ ໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງ ຕໍ່ການຮ່ວມມືຊາວໜຸ່ມລາວ-ຫວຽດນາມ ທີ່ນັບມື້ເຂັ້ມແຂງ ແລະ ມີຜົນງານເປັນຮູບປະທຳ, ພ້ອມຢືນຢັນວ່າຊາວໜຸ່ມເປັນພະລັງສຳຄັນໃນການຮ່ວມຂັບເຄື່ອນການພັດທະນາເສດຖະກິດ-ສັງຄົມ ແລະ ສືບຕໍ່ສາຍພົວພັນພິເສດຂອງສອງຊາດ. ພ້ອມນີ້, ໄດ້ສະເໜີ ສືບຕໍ່ເສີມຂະຫຍາຍ 4 ຂົງເຂດສຳຄັນປະກອບມີ: ການສຶກສາອົບຮົມມູນເຊື້ອມິດຕະພາບ, ການແລກປ່ຽນຄະນະຊາວໜຸ່ມ ແລະ ກິດຈະກຳວັດທະນະທຳ-ກິລາ, ການຮ່ວມມືຊາວໜຸ່ມລະດັບທ້ອງຖິ່ນ ແລະ ການຊຸກຍູ້ໂຄງການດ້ານການສຶກສາ-ພື້ນຖານໂຄງລ່າງ.

ໂອກາດນີ້, ສະຫາຍ ຈິ້ງ ມັ່ງ ລິງ ໄດ້ຕີລາຄາສູງຕໍ່ການຮ່ວມມືຊາວໜຸ່ມສອງປະເທດ ແລະ ຢືນຢັນເຖິງຄວາມສຳຄັນຂອງການສືບທອດສາຍພົວພັນລາວ-ຫວຽດນາມໃຫ້ຄົນຮຸ່ນໃໝ່. ພ້ອມນັ້ນ, ໄດ້ແລກປ່ຽນບົດຮຽນດ້ານການພັດທະນານະຄອນເຫວ້, ການພັດທະນາການທ່ອງທ່ຽວ ແລະ ການຂະຫຍາຍການພົວພັນກັບບັນດາແຂວງຂອງ ສປປ ລາວ, ທັງສອງຝ່າຍໄດ້ເຫັນດີເປັນເອກະພາບ ແລະ ຕົກລົງຮ່ວມກັນ 3 ບັນຫາສໍາຄັນ: 1) ສືບຕໍ່ສຶກສາອົບຮົມ ແລະ ສືບສານມູນເຊື້ອມິດຕະພາບລາວ-ຫວຽດນາມ; 2) ເສີມຂະຫຍາຍການແລກປ່ຽນ ແລະ ຮ່ວມມືຊາວໜຸ່ມໃນທຸກລະດັບ ໃຫ້ມີເນື້ອໃນເລິກເຊິ່ງ ແລະ ເປັນຮູບປະທຳ; ແລະ 3) ຮ່ວມກັນຊຸກຍູ້ໂຄງການດ້ານການສຶກສາ ແລະ ສ້າງໂຮງຮຽນໃນເຂດຫ່າງໄກ.

ການພົບປະຄັ້ງນີ້, ຖືເປັນອີກກ້າວສຳຄັນໃນການສືບສານມິດຕະພາບ ແລະ ຄວາມສາມັກຄີພິເສດລາວ-ຫວຽດນາມ ໂດຍສະເພາະການເສີມສ້າງບົດບາດຊາວໜຸ່ມໃຫ້ເປັນພະລັງສືບທອດ ແລະ ຂັບເຄື່ອນການຮ່ວມມືຂອງສອງຊາດໃຫ້ກ້າວໜ້າຢ່າງໝັ້ນຄົງ.