ຢູ່ທີ່ເດີ່ນບິນທົ່ງໄຫຫີນ ຊຶ່ງຄະນະການນຳໄດ້ໄປ ຢ້ຽມຢາມ, ຊຸກຍູ້, ສົ່ງເສີມໂອ້ລົມ ພໍ່ແມ່ປະຊາຊົນບ້ານຫໍກາງ ເມືອງຜາໄຊ. ທ່ານ ສົມສະໝອນ ຜະລິຈັນ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ລາຍງານ ການປູກຝັງ-ລ້ຽງສັດ ທີ່ເປັນທ່າແຮງໃນການພັດທະນາ ຂອງປະຊາຊົນຊາວຊຽງຂວາງ ພົ້ນເດັ່ນກ່ວາໝູ່ແມ່ນ ການປູກເຂົ້າໄກ່ນ້ອຍ, ການລ້ຽງງົວ, ຄວາຍ, ມ້າ, ຜັກ, ປູກສາລີ, ໝາກເພັດນ້ອຍ, ກາເຟ ແລະ ຜັກທຽມ ຊຶ່ງສາມາດສະໜອງພາຍໃນແຂວງ ແລະ ສົ່ງອອກໄປຕ່າງແຂວງ ເປັນຕົ້ນແມ່ນນະຄອນຫຼວງວຽງຈັນ. ນອກນີ້ຍັງສົ່ງອອກໄປຕ່າງປະເທດ. ສ່ວນເຂົ້າໄກນ້ອຍ ແມ່ນສາມາດປູກໄດ້ຢູ່5ເມືອງຂອງແຂວງ, ມີ7ສາຍພັນຄື: ເຂົ້າໄກ່ນ້ອຍດຳ, ລາຍ, ເຫຼືອງ, ແດງດໍ, ແດງປີ, ແດງລາຍແຊກ ແລະ ແດງເມັດໃຫຍ່ ທົ່ວແຂວງມີເນື້ອທີ່ປູກເຂົ້າໄກ່ນ້ອຍ12.500ເຮັກຕາ ສາມາດຜະລິດໄດ້55,000ໂຕນ, ສົ່ງອອກ ສສ ຫວຽດນາມ5,000ໂຕນ. ນອກນັ້ນແມ່ນບໍລິໂພກພາຍໃນແຂວງ ແລະ ສົ່ງອອກສູ່ນະຄອນຫຼວງວຽງຈັນ.
ທ່ານ ສີວັນ ຫົວໜ້າກຸ່ມປູກເຂົ້າໄກ່ນ້ອຍ ບ້ານຫໍກາງ ໄດ້ລາຍງານການປູກເຂົ້າໄກ່ນ້ອຍ ຢູ່ພາຍໃນບ້ານ ຊຶ່ງໄດ້ຈັດຕັ້ງເປັນກຸ່ມ, ໄດ້ຕິດຕາມ ແລະ ເອົາໃຈໃສ່ແຕ່ມື້ເລີ່ມຕົ້ນ ຈົນເຖິງມື້ກ່ຽວຂຶ້ນເລົ້າ, ຕິດຕາມ ປະລິມານນ້ຳ, ຝຸ່ນ(ຝຸ່ນຄອກ), ສັດຕູພືດ, ອາກາດແລະ ການເກັບແນວພັນ ຊຶ່ງປະຊາຊົນ ບ້ານຫໍກາງ ປູກເຂົ້າໄກ່ນ້ອຍມີ4ສາຍພັນຄື: ເຂົ້າໄກ່ນ້ອຍດຳ, ເຫຼືອງ, ລາຍ ແລະ ເຂົ້າໄກ່ນ້ອຍແດງ 1ເຮັກຕາຜະລິດໄດ້3,8ໂຕນຫາ4ໂຕນ ຜະລິດໄດ້ແຕ່ລະດູດຽວ ເນື່ອງຈາກບ້ານບໍ່ມີນໍ້າພຽງພໍໃນລະດູແລ້ງ.
ໂອກາດນີ້, ທ່ານນາງ ປານີ ຢ່າທໍ່ຕູ້ ໄດ້ເນັ້ນໜັກໃຫ້ເອົາໃຈໃສ່ຮັກສາແນວພັນເຂົ້າໄກ່ນ້ອຍ, ຊັບຊ່າວ ຂະຫຍາຍເນື້ອທີ່, ຮັກສາຄຸນນະພາບ ຄຸນລັກຊະນະຂອງເຂົ້າ, ສົ່ງເຂົ້າແຕ່ລະສາຍພັນເພື່ອວິໄຈຢູ່ຕ່າງປະເທດ, ຖອດຖອນບົດຮຽນ ເຕັກນິກການປູກ, ກົນຈັກ ແລະ ການເກັບແນວພັນນຳຊ່ຽວຊານຫວຽດນາມ, ເຂົ້າໄກ່ນ້ອຍແມ່ນໄດ້ຮັບຄວາມນິຍົມຈາກທົ່ວໂລກ ຈົ່ງສົ່ງເສີມ ຊຸກຍູ້ການປູກໃຫ້ຫຼາຍຂຶ້ນ.
ໂອກາດທີ່ທ່ານມາຢາມແຂວງຊຽງຂວາງໃນຄັ້ງນີ້ ທ່ານໄດ້ໄປຮ່ວມພິທີສະເຫຼີມສະຫຼອງ ບຸນປະເພນີ ກິນຈຽງເຜົ່າມົ້ງ ປະຈຳປີ2024 ທີ່ເດີ່ນສະມາຄົມກິລາ-ວັນນະຄະດີພື້ນເມືອງ ແລະ ອານຸລັກຮີດຄອງບຸນປະເພນີກິນຈຽງແຂວງຊຽງຂວາງ.
(ຂ່າວ: ບຸນມີ ແສງທຸມມີ)
ຄໍາເຫັນ