ຮອງປະທານສະພາແຫ່ງຊາດ ຢ້ຽມຢາມ ແລະ ເຮັດວຽກຢູ່ເມືອງນ້ຳບາກ

 ຮອງປະທານສະພາແຫ່ງຊາດ ພ້ອມດ້ວຍຄະນະ ໂດຍການຕ້ອນຮັບຂອງ ທ່ານ ຫຸມເພັງ ໂທທິທຳ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນ້ຳບາກ ປະທານກວດກາພັກ-ລັດເມືອງ ພ້ອມດ້ວຍການນຳຂອງເມືອງ.
ພິທີ ທ່ານ ຄຳສະໝອນ ເພັດດາລາ ຮອງເລຂາພັກເມືອງ ໄດ້ລາຍງານໂດຍຫຍໍ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ຕິດພັນກັບວຽກງານ 3 ສ້າງຂອງເມືອງໄລຍະຜ່ານມາ, ການຈັດຕັ້ງປະຕິບັດ ໂດຍລວມທົ່ວເມືອງ ຍັງມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ກົງຈັກການຈັດຕັ້ງຂອງເມືອງ ໄດ້ຮັບການປັບປຸງ ໄປຕາມທິດກະທັດຫັດ, ການຄຸ້ມຄອງລັດ, ຄຸ້ມຄອງສັງຄົມ ແມ່ນຫັນເຂົ້າສູ່ລະບຽບກົດໝາຍ, ດ້ານວຽກງານກໍ່ສ້າງພັກ-ພະນັກງານມີບາດກ້າວໃໝ່, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ພື້ນຖານໂຄ່ງລ່າງຢູ່ຊົນນະບົດ ໄດ້ຮັບການພັດທະນາ, ຂະບວນການຜະລິດ ຫັນເຂົ້າສູ່ການຜະລິດເປັນສິນຄ້າຫຼາຍຂຶ້ນ ຊີວິດການເປັນຢູ່ຂອງປະຊາຊົນດີຂຶ້ນເປັນກ້າວ; ຜ່ານການປະເມີນຕາມດຳລັດ 348 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ຂອງລັດຖະບານວາງອອກ ເມືອງນ້ຳບາກ ບັນລຸໄດ້ 74,40% ຂອງມາດຖານເມືອງພົ້ນທຸກ ແລະ ປະເມີນການສ້າງເມືອງເຂັ້ມແຂງຮອບດ້ານ ໃນ 5 ດ້ານ, 47 ຕົວຊີ້ບອກ ບັນລຸໄດ້ 85,10%. ໂອກາດນີ້, ທ່ານໄດ້ຕາງໜ້າໃຫ້ອົງການປົກຄອງເມືອງ ແລະ ປະຊາຊົນບັນດາເຜົ່າ ສະເໜີເຖິງລັດຖະບານ ໂດຍຜ່ານສະພາແຫ່ງຊາດ ຊອກຫາແຫຼ່ງທືນມາສ້ອມແປງເສັ້ນທາງ 2509 ແຕ່ສາມແຍກບ້ານຂັ້ນລຸ່ມ ຫາບ້ານຜາທອງ ເຂດແດນເມືອງ ນໍ້າບາກ ແຂວງຫຼວງພະບາງ ຫາເມືອງຂວາ ແຂວງຜົ້ງສາລີ, ລວມທັງການແບ່ງຂັ້ນຄຸ້ມຄອງລະຫວ່າງຂັ້ນແຂວງ ໃຫ້ເມືອງຮັບຜິດຊອບ ໃຫ້ມອບສິດຫຼາຍຂຶ້ນ; ຈາກນັ້ນ ບັນດາຫ້ອງການໄດ້ຂຶ້ນປະກອບຄຳເຫັນ ຕາມຄຳຖາມເຈາະຈີ້ມຂອງປະທານ ເປັນຕົ້ນ ການກໍ່ສ້າງພັກ-ພະນັກງານ, ດ້ານການປົກຄອງ ແລະ ຄຸ້ມຄອງບໍລິຫານລັດ, ດ້ານເສດຖະກິດ-ການເງິນ, ດ້ານຊັບພະຍາກອນທຳມະຊາດ ແລະ ສີ່ງແວດລ້ອມ, ດ້ານວັດທະນະທຳ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບສຸກ.
ຕອນທ້າຍ ທ່ານ ຄຳໃບ ດຳລັດ ໄດ້ເນັ້ນໜັກໃຫ້ເອົາໃຈໃສ່ສຶກສາອົບຮົມດ້ານການເມືອງ-ແນວຄິດ ຂອງພະນັກງານ-ລັດຖະກອນ ໃຫ້ມີຄວາມຮັບຮູ້ເຂົ້າໃຈເຖີງສະພາບຄວາມຫຍຸ້ງຍາກໃນສະພາບປັດຈຸບັນ, ສືບຕໍ່ປັບປຸງລະບົບການຈັດຕັ້ງແຕ່ລະຂັ້ນ ໃຫ້ແທດເໝາະກັບຄວາມເປັນຈີງ ຂອງໜ້າທີ່ວຽກງານໄລຍະໃຫມ່, ປັບປຸງຄຸນນະພາບການສຶກສາ ໃຫ້ມີປະສິດທິພາບ, ຊຸກຍູ້ການຜະລິດຂອງປະຊາຊົນໃຫ້ຫຼາຍ ກາຍເປັນສິນຄ້າ ແລະ ວຽກງານອື່ນໆ.
(ຂ່າວ-ພາບ: ພອນສັກ ສິງດາລັກ)