 |
ໃນໂອກາດເຂົ້າຮ່ວມພິທີເປີດງານບຸນນະມັດສະການພະທາດຫຼວງ ແລະ ງານວາງສະແດງຮູບພາບ ແລະ ວາງສະແດງສິນຄ້າປະຈຳປີ 2025 ທີ່ຈັດຂຶ້ນໃນວັນທີ 1 ພະຈິກຜ່ານມາ, ທ່ານ ນາງ ນິດຕະຍາ ບຸດປະເສີດ ປະທານບ້ານວັດທະນະທຳນາຊາຍທອງ ເມືອງນາຊາຍທອງ ນະຄອນຫຼວງວຽງຈັນ ເປັນໜຶ່ງຜູ້ຮັກຫອມວັດທະນະ ທຳອັນດີງາມຂອງລາວເຮົາ ແຕ່ລະປີໄດ້ນໍາພາຊາວບ້ານວັດທະນະທໍານາຊາຍທອງມາເຂົ້າຮ່ວມງານບຸນດັ່ງກ່າວ ເພື່ອສືບສານປະເພນີວັດທະນະທຳດັ້ງເດີມຢູ່ໃນງານບຸນແຫ່ງນີ້ໃຫ້ຊາວລາວ ກໍຄືຊາວຕ່າງປະເທດໄດ້ເຫັນຄວາມງົດງາມວັດທະນະຂອງປວງຊົນລາວຊາວພຸດ ພ້ອມຮຽກຮ້ອງໃຫ້ປະຊາຊົນລາວບັນດາເຜົ່າຮ່ວມມືກັນອະນຸຮັກຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວ.
 |
ທ່ານ ນາງ ນິດຕະຍາ ບຸດປະເສີດ ໄດ້ສະແດງຄວາມຮູ້ສຶກຕໍ່ສື່ມວນຊົນວ່າ: ຕົນເອງມີຄວາມຮູ້ສຶກພາກພູມໃຈ ແລະ ປິຕິຍິນດີທີ່ພັກ ແລະ ລັດຖະບານ ພ້ອມດ້ວຍອົງການປົກຄອງນະຄອນຫຼວງວຽງຈັນໄດ້ສືບຕໍ່ຈັດງານບຸນນະມັດສະການພະທາດຫຼວງໃນທຸກໆປີ ເນື່ອງຈາກງານບຸນພະທາດຫຼວງເປັນຮີດຄອງປະເພນີອັນດີງາມທີ່ສະທ້ອນໃຫ້ເຫັນຄວາມເຊື່ອ ແລະ ຄວາມສັດທາຂອງປະຊາຊົນລາວທີ່ມີຕໍ່ພຸດທະສາສະໜາ. ປີນີ້ ກໍຄືທຸກປີໆ ຊາວບ້ານວັດທະນະທໍານາຊາຍທອງຕ່າງໃຫ້ຄວາມຮ່ວມມືໃນການສືບສານປະເພນີວັດທະນະທຳດັ້ງເດີມ ໂດຍການຫ້າງຫາກະກຽມຜາສາດເຜິ້ງເຂົ້າມາຮ່ວມບູຊານະມັດສະການພະທາດຫຼວງເພື່ອຄວາມເປັນສິຣິມຸງຄຸນ ແລະ ເພື່ອສືບຕໍ່ຈິດໃຈການເຄົາລົບພຸດທະສາສະໜາຂອງຊາວລາວໃຫ້ດຳລົງຢູ່ຄຽງຄູ່ກັບຊາດລາວຕະຫຼອດໄປ. ພິເສດໃນປີ 2025 ນີ້, ການຈັດງານມີຈຸດເດັ່ນ ແລະ ແຕກຕ່າງຈາກປີຜ່ານມາ ໂດຍພາກສ່ວນຈັດງານໄດ້ເນັ້ນໃຫ້ຜູ້ມາທ່ຽວງານບຸນນຸ່ງຖືສຸພາບຖືກກັບຮີດຄອງປະເພນີລາວ, ນຸ່ງຖືຊຸດລາວເພື່ອສະແດງໃຫ້ເຫັນເຖິງການອະນຸລັກວັດທະນະທຳການນຸ່ງຖື ແລະ ຄວາມພາກພູມໃຈໃນຄວາມເປັນລາວ ພ້ອມທັງໄດ້ຈັດວາງສະແດງສິນຄ້າທ້ອງຖິ່ນ ແລະ ຜະລິດຕະພັນຫັດຖະກຳລາວຈາກທົ່ວປະເທດເພື່ອສົ່ງເສີມສິນຄ້າລາວໃຫ້ເປັນທີ່ຮູ້ຈັກຢ່າງກວ້າງຂວາງທັງພາຍໃນ ແລະ ຕ່າງ ປະເທດ.
 |
ທ່ານນາງ ນິດຕະຍາ ບຸດປະເສີດ ຍັງໄດ້ຮຽກຮ້ອງໃຫ້ປະຊາຊົນລາວບັນດາເຜົ່າ ຈົ່ງຮ່ວມມືກັນອະນຸລັກຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວ ໂດຍການນຸ່ງຊຸດລາວທີ່ມີເອກະລັກສະເພາະຕົວງົດງາມ ທັງສະທ້ອນໃຫ້ເຖິງຄວາມຈະເລີນຮຸ່ງເຮືອງຂອງວັດທະນະທຳລາວສູ່ສາຍຕາແຂກຄົນຕ່າງປະເທດທີ່ມາພົບເຫັນ ເຮັດໃຫ້ຢາກນຸ່ງຕາມ.
ຄໍາເຫັນ