ທ່ານ ແກ້ວວິໄລສັກ ແສນສັກດາ ຮອງຫົວໜ້າພະແນກວັດທະນະທຳ ແລະ ການທ່ອງທ່ຽວ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 12 ເມສາ ຜ່ານມາວ່າ: ເພື່ອເປັນການອະນຸລັກຮັກສາ, ສົ່ງເສີມວັດທະນະທຳ ແລະ ຮີດຄອງປະເພນີອັນດີງາມຂອງຊາດ ກໍຄືຂອງນະຄອນຫຼວງວຽງຈັນ ໃນການຫຼິ້ນບຸນກຸດສົງການປີໃໝ່ລາວ ພ.ສ 2569 ປະຈຳປີ 2026 ຢູ່ ນະຄອນຫຼວງວຽງຈັນ ໃຫ້ຖືກຕ້ອງສອດຄ່ອງ ແລະ ມີບັນຍາກາດເບີກບານມ່ວນຊື່ນ, ເພື່ອເປັນການຊຸກຍູ້ສົ່ງເສີມວຽກງານການທ່ອງທ່ຽວໃຫ້ມີບັນຍາກາດ ເພື່ອໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ມາທ່ຽວຫຼິ້ນ ຢູ່ ນະຄອນຫຼວງວຽງຈັນ ໃນໂອກາດບຸນປີໃໝ່ລາວໃຫ້ຄວາມຟົດຟື້ນ, ເພື່ອເຮັດໃຫ້ເຂດຄຸ້ມຕົວເມືອງເກົ່າກາຍເປັນຈຸດເດັ່ນທີ່ນັກທ່ອງທ່ຽວຮູ້ຈັກ ໃນການຫຼິ້ນບຸນປີໃໝ່ລາວ ທີ່ພັນກັບວັດທະນະທຳ ແລະ ຖືກຈັດເຂົ້າໃນປະຕິທິນການທ່ອງທ່ຽວຂອງ ນວ ກໍຄືລະດັບຊາດ, ຮັກສາໄດ້ການຫຼິ້ນບຸນປີໃໝ່ລາວ ດ້ວຍບັນຍາກາດເບີກບານມ່ວນຊື່ນ, ຖືກຕ້ອງສອດຄ່ອງ ຕາມຮີດຄອງປະເພນີ ແລະ ວັດທະນະທຳ ອັນດີງາມຂອງຊາດ.
ດັ່ງນັ້ນ, ທາງວັດທະນະທຳ, ວັດວາອາລາມ ແລະ ສະຖານທີ່ທ່ອງທ່ຽວທີ່ສຳຄັນ ຈົ່ງພ້ອມກັນປະຕິບັດເອົາພະພຸດທະຮູບລົງຫົດສົງ ຖືກຕ້ອງຕາມຮີດຄອງປະເພນີ ເປັນລະບຽບຮຽບຮ້ອຍ, ຮັກສາໄດ້ຄວາມສະຫງົບ, ປອດໄພ ຄວາມເປັນລະບຽບຮຽບຮ້ອຍ ແລະ ສະອາດຈົບງາມປາສະຈາກຂີ້ເຫຍື້ອ ສິ່ງເສດເຫຼືອ, ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຊົມບັນດາກິດຈະກຳທີ່ທາງຄະນະຮັບຜິດຊອບກະກຽມ ຢູ່ນະຄອນຫຼວງວຽງຈັນໃຫ້ຫຼາຍເທົ່າທີ່ຫຼາຍໄດ້.
ແຜນຈັດກິດຈະກໍາບຸນປີໃໝ່ລາວ ພ.ສ 2569 ທີ່ນະຄອນຫຼວງວຽງຈັນ: 1. ເຂດຄຸ້ມເມືອງເກົ່າວັດຈັນ ເມືອງຈັນທະບູລີ ໄດ້ແບ່ງອອກເປັນ 2 ກິດຈະກຳຫຼັກຄື: ກິດຈະກຳທາງສາສາໜາ ແລະ ກິດຈະກຳການທ່ອງທ່ຽວ ລາຍລະອຽດຂອງກິດຈະກຳມີດັ່ງນີ້: ວັນທີ 14 ເມສາ 2026 ຕອນເຊົ້າຈະມີກິດຈະກຳທາງສາສະໜາ ຢູ່ທີ່ວັດສີເມືອງ ເມືອງສີສັດຕະນາກ ແລະ ມີພິທີທາງສາສະໜາ ເອົາພະພຸດທະຮູບລົງຫົດສົງ, ອັງເຊີນຂຶ້ນລາດຊະລົດ ທີ່ວັດອົງຕື້ ເມືອງຈັນທະບູລີ, ພິທີແຫ່ພະພຸດທະຮູບມິງເມືອງຂອບເຂດຄຸ້ມເມືອງເກົ່າ ເມືອງຈັນທະບູລີ ໃນເວລາ 13:00 ໂມງ ແລະ ນອກນັ້ນ, ບັນດາສະຖານທີ່ສຳຄັນ ເປັນຕົ້ນວັດວາອາລາມທົ່ວນະຄອນຫຼວງວຽງຈັນ ກໍໄດ້ມີກິດຈະກຳທາງສາສະໜາເອົາພຣະພຸດທະຮູບລົງຫົດສົງ ຢ່າງເປັນຂະບວນຟົດຟື້ນ.
2. ວັນທີ 15 ເມສາ 2026: ກິດຈະກຳສົງພະຕາມວັດວາອາຣາມຕ່າງໆ (ເວລາ 8 ໂມງ 00 ຫາ 18 ໂມງ 00), ກິດຈະກຳຫຼິ້ນນໍ້າ ຢູ່ເສັ້ນທາງເສດຖາທິລາດ, ສະຖານທີ່ສຳຄັນ ແລະ ແຫຼ່ງທ່ອງທ່ຽວຕ່າງໆ ພາຍໃນນະຄອນຫຼວງວຽງຈັນ (ເວລາ 12 ໂມງ 00 ຫາ 18 ໂມງ 00)
3. ວັນທີ 16 ເມສາ 2026: ກິດຈະກຳໃສ່ບາດທີ່ວັດອົງຕື້ (7: 00 ມ ຫາ 9:00 ມ) ຢູ່ເຂດຖະໜົນເສດຖາທິລາດ ແລະ ຕາມວັດທົ່ວໄປ, ກິດຈະກຳຕົບພະຊາຍຕາມວັດວາອາຣາມຕ່າງໆ.
ນອກນັ້ນ, ບັນດາສະຖານທີ່ທ່ອງທ່ຽວທີ່ສຳຄັນຕ່າງໆພາຍໃນນະຄອນຫຼວງວຽງຈັນ ເຊັ່ນ:
- ພະທາດຫຼວງວຽງຈັນ, ຫໍພະແກ້ວ, ພິພິທະພັນສີສະເກດ ແມ່ນເອົາພະພຸດທະຮູບລົງໃຫ້ປວງຊົນ, ນັກທ່ອງທ່ຽວ ໄດ້ຫົດສົງ ແລະ ບໍ່ໄດ້ເກັບຄ່າບໍລິການໄລຍະບຸນປີໃໝ່ລາວ.
- ສະຖານທີ່ສຳຄັນຕ່າງໆ ກໍເປີດບໍລິການໃຫ້ເຂົ້າທ່ຽວຊົມປົກກະຕິ, ມີກິດຈະກຳໄວ້ຮອງຮັບບັນດາທ່ານນັກທ່ອງທ່ຽວຕາມປະເພນີຢ່າງຟົດຟື້ນ ເຊັ່ນ: ພິພິທະພັນຮ່ວມສະໃໝ ເຂດໜອງເຊືອມ ກໍຫຼຸດຄ່າບໍລິການໄລຍະປີໃໝ່ລາວຈາກ 120,000 ກີບ/ຄົນ, ເຫຼືອ 30,000 ກີບ/ຄົນ ແລະ ມີກິດຈະກຳລະຫຼິ້ນນ້ຳກາງແຈ້ງ, ມີຮ້ານອາຫານໄວ້ຄອຍບໍລິການ, ນ້ຳປ່ຽນຈໍລະປາ ເຂດເມືອງປາກງື່ມ ແລະ ສວນວັດທະນະທຳຊຽງຄວນ ກໍບໍລິການປົກກະຕິ ແລ ຍັງມີການຫຼິ້ນຢູ່ບັນດາສະຖານທີ່ ສຳຄັນຢູ່ບັນດາເມືອງພາຍໃນ ນະຄອນຫຼວງວຽງຈັນຢ່າງຟົດຟື້ນ ແລະ ມ່ວນຊື່ນ
ທ່ານໃຫ້ຮູ້ຕື່ມວ່າ: ໃນຄະນະຮັບຜິດຊອບງານບຸນປີໃໝ່ລາວ ກໍຄືພະແນກ ວທ ນະຄອນຫຼວງວຽງຈັນຮຽກຮ້ອງມາຍັງບັນດາທ່ານ, ປວງຊົນ, ນັກທ່ອງທ່ຽວ ທັງພາຍໃນ ແລະ ຕ່າງປະເທດ ມາຮ່ວມທ່ຽວຊົມກິດຈະກຳຕ່າງໆ ຢູ່ນະຄອນຫຼວງວຽງຈັນ ໃນປີນີ້ດ້ວຍ, ຮຽກຮ້ອງໃຫ້ບັນດາທ່ານປວງຊົນ, ນັກທ່ອງທ່ຽວ ການໄປຫົດສົງພະພຸດທະຮູບຢູ່ບັນດາວັດວາອາລາມ ໃຫ້ນຸ່ງຖືເປັນເອກະລັກຂອງຄົນລາວ ນຸ່ງສິ້ນ ແລະ ຜູ້ຊາຍກໍນຸ່ງຖືສຸພາບຮຽບຮ້ອຍໄປຫົດພະພຸດທະຮູບຕາມວັດວາອາລາມໃຫ້ຖືກຮີດຄອງປະເພນີດ້ວຍ, ນ້ຳທີ່ເອົາມາຫົດສົງກໍໃຫ້ເປັນນໍ້າອົບນ້ຳຫອມ ບໍ່ໃຫ້ນຳໃຊ້ນ້ຳທີ່ເປື້ອນ, ພ້ອມກັນຮັກສາຄວາມສະອາດຈົບງາມຢ່າງເອົາໃຈໃສ່, ພ້ອມທັງການສະຫຼອງພົບປະສ້າງສັນກໍໃຫ້ພໍດີພໍເໝາະ ເພື່ອຫຼີກລ່ຽງການດື່ມເມົາລະຂັບ (ຫຼີກລ່ຽງການເກີດອຸບັດເຫດດ້ວຍ) ຂໍໃຫ້ທຸກທ່ານໃນໄລຍະບຸນປີໃໝ່ລາວ ປີ 2026 ຈົ່ງເບີກບານມ່ວນຊື່ນ ມີຄວາມຜາສູກດ້ວຍ.
ຂໍອວຍພອນໄຊອັນປະເສີດ ມາຍັງການນຳພັກ-ລັດ ແລະ ທຸກພາກສ່ວນທັງພາກລັດ, ເອກະຊົນ ທົ່ວສັງຄົມທຸກທົ່ວໜ້າຈົ່ງມີແຕ່ຄວາມສຸກຄວາມຈະເລີນ, ສຸພາບແຂງແຮງ ມີຜົນສຳເລັດໃຫຍ່ຫຼວງກວ່າເກົ່າ ຈົ່ງພ້ອມກັນເຮັດສຳເລັດໜ້າທີ່ຢ່າງສະຫງ່າງາມ ແລະ ຂໍໃຫ້ມີຄວາມຜາສຸກທາງກາຍ ແລະ ຈິດໃຈ ຕະຫຼອດປີໃໝ່ ພສ 2569 ແລະ ຕະຫຼອດໄປ ດ້ວຍເທີດ.
(ຂ່າວ: ຕຸໄລເພັດ)
ຄໍາເຫັນ