ສອງປະເທດ ລາວ-ຈີນ, ຈີນ-ລາວ ເປັນປະເທດທີ່ມີສາຍພູ, ສາຍນ້ຳ ຕິດຈອດກັນ, ມີວັດທະນາທຳທີ່ໃກ້ຄຽງກັນ, ມີຜົນປະໂຫຍດຮ່ວມກັນ ແລະ ໄດ້ຮ່ວມຊາຕາກຳນຳກັນ. ລາວ-ຈີນ ເປັນປະເທດທີ່ມີລະບອບສັງຄົມນິຍົມ ທີ່ໃກ້ຄຽງກັນ ບໍ່ສາມາດຕັດແຍກຈາກກັນໄດ້.
ນັບແຕ່ປີ 2016 ເປັນຕົ້ນມາ, ສອງຝ່າຍ ໄດ້ສະເໜີຂໍ້ລິເລີ່ມ ໃນການກໍ່ສ້າງຄູ່ຮ່ວມຊາຕາກຳນຳກັນ. ເດືອນພຶດສະພາ 2016, ໃນເວລາທີ່ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ດຳເນີນການຢ້ຽມຢາມ ສປ ຈີນ ຢ່າງເປັນທາງການ. ສອງຝ່າຍ ໄດ້ລະບຸເຂົ້າໃນຖະແຫຼງການຮ່ວມ ລາວ-ຈີນ ເປັນຄັ້ງທຳອິດວ່າ: “ສອງປະເທດ ເປັນຄູ່ຮ່ວມຊາຕາກຳ ທີ່ມີຄວາມໝາຍຍຸດທະສາດ”. ເດືອນພະຈິກ ປີ 2017, ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 19 ຂອງ ພັກກອມມູນິດຈີນ ໄດ້ສຳເລັດລົງ, ສະຫາຍ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ປະທານປະເທດ ແຫ່ງ ສປ ຈີນ ໄດ້ເລືອກເອົາ ສປປ ລາວ ເປັນໜຶ່ງໃນຈຸດໝາຍຂອງການຢ້ຽມຢາມຕ່າງປະເທດຄັ້ງທຳອິດຂອງຕົນ. ໃນການພົບປະລະຫວ່າງການນຳສູງສຸດ ຂອງ ສອງພັກ, ສອງລັດ ໃນຄັ້ງນັ້ນ, ສອງຝ່າຍ ໄດ້ຢືນຢັນຄືນອີກເທື່ອໜຶ່ງ ເຖິງຄວາມຮັບຮູ້ຮ່ວມກັນ ຊຶ່ງເປັນການເພີ່ມຄວາມໜັກແໜ້ນໃຫ້ແກ່ການສ້າງເປັນຄູ່ຮ່ວມຊາຕາກຳ ລາວ-ຈີນ. ໃນເດືອນພຶດສະພາ ປີ 2018, ໃນໂອກາດທີ່ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ຢ້ຽມຢາມ ສປ ຈີນ, ການນຳສູງສຸດຂອງສອງພັກ, ສອງລັດ ໄດ້ຕົກລົງເປັນເອກະພາບກັນ ກ່ຽວກັບການເລີ່ມຕົ້ນສ້າງ “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ”. ປີ 2023, ສອງຝ່າຍ ລາວ-ຈີນ ໄດ້ເຊັນ “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ (2024-2028)” ສະບັບໃໝ່ ຊຶ່ງໄດ້ກຳນົດການແລກປ່ຽນຮ່ວມມືຂອງສອງຝ່າຍ ໃນຂົງເຂດຕ່າງໆຢ່າງຈະແຈ້ງເຊັ່ນ: ດ້ານການເມືອງ,ເສດຖະກິດ, ຄວາມປອດໄພ, ວັດທະນາທຳ-ສັງຄົມ, ລະບົບນິເວດ ແລະ ອື່ນໆ. ໃນນັ້ນ, ອັນພົ້ນເດັ່ນທີ່ສຸດແມ່ນເສັ້ນທາງລົດໄຟ ລາວ-ຈີນ ແລະ ຖືເປັນເສັ້ນທາງທີ່ເຊື່ອມຕໍ່ລະຫວ່າງຈີນ ກັບບັນດາປະເທດອາຊຽນ. ການເປີດນຳໃຊ້ເສັ້ນທາງລົດໄຟ ລາວ-ຈີນ ໄດ້ຂຽນປະຫວັດໜ້າໃໝ່ ໃນການສ້າງຄູ່ຮ່ວມຊາຕາກຳ ລາວ-ຈີນ, ຈີນ-ລາວ.
ໃນຕໍ່ໜ້າ, ສອງຝ່າຍ ລາວ-ຈີນ ຄວນຈະສືບຕໍ່ຄົ້ນຄວ້າປະຫວັດສາດໄປມາຫາສູ່ກັນ, ບຸກເບີກປັດໄຈ “ສີແດງ” (ປະຕິວັດ) ທີ່ມີຢູ່ລຽບຕາມເສັ້ນທາງລົດໄຟ ລາວ-ຈີນ, ເພື່ອເພີ່ມຄວາມໄວ້ເນື້ອເຊື່ອໃຈ ແລະ ຮອງຮັບຊຶ່ງກັນ ແລະ ກັນ. ສືບຕໍ່ຢຶດຖືວິໄສທັດການຕ່າງປະເທດຕ່າງໆເຊັ່ນ: “ຫຼັກການ 5 ປະການຢູ່ຮ່ວມກັນໂດຍສັນຕິ” ແລະ “ສະໜິດສະໜົມ ຈິງອົກຈິງໃຈ ໃຫ້ຜົນປະໂຫຍດ ໂອບເອື້ອອາລີ”, ເພື່ອກໍ່ສ້າງຈິດສຳນຶກຄູ່ຮ່ວມຊາຕາກຳແບບ “ສະແຫວງຫາຄວາມຄ້າຍຄືກັນ, ສະຫງວນຄວາມແຕກຕ່າງກັນ” ແລະ “ໄວ້ເນື້ອເຊື່ອໃຈກັນ, ໃຫ້ຜົນປະໂຫຍດແກ່ກັນ”, ເພື່ອຊຸກຍູ້ໃຫ້ພາລະກິດສັງຄົມນິຍົມເຕີບໂຕ ແລະ
ພັດທະນາ. ສອງຝ່າຍ ລາວ-ຈີນ ຄວນຈະຖືເອົາການແລກປ່ຽນຮ່ວມມືດ້ານເສດຖະກິດ-ການຄ້າ ເປັນໜ້າວຽກບຸລິມະສິດ, ເປັນເຈົ້າການໃນການຊອກຫາຊ່ອງທາງໃນການຫັນເປັນທັນສະໄໝ ສອດຄ່ອງກັບຜົນປະ
ໂຫຍດຂອງສອງຝ່າຍ, ຮ່ວມກັນປົກປ້ອງ ແລະ ຂະຫຍາຍຜົນສຳເລັດອັນພົ້ນເດັ່ນຂອງການຄ້າເສລີ ເພື່ອເພີ່ມພູນຄູນສ້າງຄວາມແນ່ນອນ ໃຫ້ແກ່ການຄ້າໃນພາກພື້ນ ແລະ ທົ່ວໂລກ. ສອງຝ່າຍ ລາວ-ຈີນ ຕ້ອງເອົາໃຈໃສ່ໃນການກໍ່ສ້າງຄູ່ຮ່ວມຊາຕາກຳ ລາວ-ຈີນ, ຈີນ-ລາວ, ລົງເລິກການຮ່ວມມືພາຍໃຕ້ກອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ຂອງ 6 ປະເທດ, ເພື່ອສົ່ງເສີມການກໍ່ສ້າງປະຊາຄົມຮ່ວມຊາຕາກຳ ແມ່ນ້ຳລ້ານຊ້າງ-ແມ່ນ້ຳຂອງ, ຄຽງບ່າຄຽງໄຫຼ່ໃນການກໍ່ສ້າງປະຊາຄົມອາຊຽນ ແລະ ຊຸກຍູ້ການຮ່ວມມືໃຕ້-ໃຕ້, ເພື່ອປົກປ້ອງ ແລະ ຊຸກຍູ້ສັນຕິພາບອັນຍາວນານ ແລະ ຄວາມຈະເລີນຮຸ່ງເຮືອງໝັ້ນຄົງຂອງພາກພື້ນ ກໍຄືຂອງທົ່ວໂລກ.
ຄໍາເຫັນ