 |
ກອງປະຊຸມຄັ້ງນີ້, ທັງສອງຝ່າຍໄດ້ລາຍງານການເຄື່ອນໄຫວວຽກງານໃນໄລຍະຜ່ານມາ ໂດຍສະເພາະຂອງສະພາປະຊາຊົນແຂວງສາລະວັນ ແລະ ສະພາປະຊາຊົນ ນະຄອນເຫວ້ ອັນທີ່ພົ້ນເດັ່ນສະພາບລວມ, ທີ່ຕັ້ງ, ຈຸດພິເສດ ແລະ ບົດຮຽນໃນການຮ່ວມມືໃນໄລຍະຜ່ານມາ ເປັນຕົ້ນ: ການຈັດຕັ້ງປະຕິບັດບົດບັນທຶກຊ່ວຍຈໍາ ວ່າດ້ວຍ: ການຮ່ວມມື ໄລຍະປີ 2022-2026 ລະຫວ່າງຄະນະຜູ້ແທນຂັ້ນສູງ ແຂວງສາລະວັນ ກັບຄະນະຜູ້ແທນຂັ້ນສູງ ນະຄອນເຫວ້ ລົງນາມ ຄັ້ງວັນທີ 27 ທັນວາ 2022.
ກແງປະຊຸມຄັ້ງນີ້, ຜູ້ແທນທັງ 2 ຝ່າຍໄດ້ແລກປ່ຽນການເຄື່ອນໄຫວຂອງສະພາປະຊາຊົນແຂວງ ກໍຄືຮູບແບບວິທີການ, ບາດກ້າວ, ຂັ້ນຕອນການເຄື່ອນໄຫວວຽກງານໃນ 3 ຫົວຂໍ້ທີ່ສໍາຄັນເປັນຕົ້ນ: ການຄົ້ນຄວ້າພິຈາລະນາ ແລະ ທາບທາມຮ່າງລັດຖະທຳມະນູນ ແລະ ກົດໝາຍທີ່ສະພາແຫ່ງຊາດ ສົ່ງໃຫ້ລົງໄປທາບທາມບັນດາເມືອງ ແລະ ປະຊາຊົນ ໄດ້ຈັດຕັ້ງປະຕິບັດຄືແນວໃດ, ການສ້າງ ແລະ ປັບປຸງນິຕິກຳໃຕ້ກົດໝາຍຢູ່ທ້ອງຖິ່ນ ມີບາດກ້າວຂັ້ນຕອນແນວໃດ; ການຕົກລົງບັນຫາສໍາຄັນພື້ນຖານຂອງຖິ່ນ ເປັນຕົ້ນ: ດ້ານການເມືອງ ແລະ ການປົກຄອງ, ດ້ານເສດຖະກິດ, ດ້ານການຈັດຕັ້ງ ແລະ ບຸກຄະລາກອນ, ລວມທັງກົງຈັກທີ່ສະພາທ້ອງຖິ່ນຮັບຮອງ; ການຕິດຕາມກວດກາ, ການຈັດຕັ້ງປະຕິບັດລັດຖະທຳມະນູນ, ກົດໝາຍ, ມະຕິຂອງກອງປະຊຸມສະພາ ແຫ່ງຊາດ, ມະຕິຄະນະປະຈຳສະພາແຫ່ງຊາດ, ມະຕິຂອງກອງປະຊຸມສະພາປະຊາຊົນແຂວງ, ມະຕິ ແລະ ຂໍ້ຕົກລົງ ຂອງຄະນະປະຈຳສະພາປະຊາຊົນແຂວງ.
ກອງປະຊຸມພົບປະຄັ້ງນີ້, ມີຄວາມໝາຍຄວາມສໍາຄັນເລິກເຊີ່ງ ທີ່ສະແດງເຖິງການຮັດແໜ້ນຄວາມສາມັກຄີແບບພິເສດ ທີ່ມີມູນເຊື້ອຍາວນານ ຂອງສອງພັກ-ສອງລັດກໍຄືສອງຊາດລາວ-ຫວຽດນາມ ໂດຍສະເພາະສະພາປະຊາຊົນ ແຂວງສາລະວັນ ກັບ ສະພາປະຊາຊົນ ນະຄອນເຫວ້.
(ພາບ-ຂ່າວ: ສ.ພະຈັນ)
ຄໍາເຫັນ