ໃນວັນທີ 23 ຕຸລາ 2025, ສອງສະມາຄົມມິດຕະພາບ ໄດ້ຈັດກອງປະຊຸມພົບປະຄັ້ງທີ XIV ທີ່ໂຮງແຮມ ເຊອູນ ກາເດີນ (SEOUL GARDEN) ນະຄອນຫຼວງເຊອູນ, ສ. ເກົາຫຼີ ໂດຍການເປັນປະທານຮ່ວມຂອງ ທ່ານ ຄຳສວຍ ແກ້ວດາລາວົງ ປະທານສະມາຄົມມິດຕະພາບ ລາວ - ສ. ເກົາຫຼີ ແລະ ທ່ານ ໂອ ມິງຮວັນ (OH MYUNG HWAN) ປະທານສະມາຄົມມິດຕະພາບ ສ. ເກົາຫຼີ - ລາວ, ມີທ່ານ ສົງການ ຫຼວງມູນິນທອນ ເອກອັກຄະລັດຖະທູດແຫ່ງ ສປປ ລາວ ປະຈຳ ສ. ເກົາຫຼີ ແລະ ບັນດາຄະນະບໍລິຫານງານສະມາຄົມມິດ ຕະພາບ ລາວ - ສ. ເກົາຫຼີ ແລະ ສ. ເກົາຫຼີ - ລາວ, ພະນັກງານທີ່ກ່ຽວຂ້ອງຂອງທັງສອງຝ່າຍ ທັງພາກລັດ ແລະ ເອກະຊົນ ເຂົ້າຮ່ວມ.
ກອງປະຊຸມ, ໄດ້ສະຫຼຸບຕີລາຄາການພົວພັນຮ່ວມມືກັນລະຫວ່າງ ສອງສະມາຄົມໃນໄລຍະ 1 ປີຜ່ານມາ ແລະ ວາງທິດທາງແຜນການໃນຕໍ່ໜ້າ, ຊຶ່ງຜ່ານມາສອງສະມາຄົມມິດຕະພາບ ໄດ້ມີຜົນສໍາເລັດອັນພົ້ນເດັ່ນ ໃນການຮ່ວມມືກັນ, ປະກອບສ່ວນຊ່ວຍເຫຼືອ ແລະ ພັດທະນາຢູ່ ສປປ ລາວ ໂດຍສະເພາະດ້ານພື້ນຖານໂຄງລ່າງການສຶກສາ, ສາທາລະນະສຸກ, ມະນຸດສະທໍາ, ຊຶ່ງສອງສະມາຄົມໄດ້ຊ່ວຍເຫຼືອສ້າງໂຮງຮຽນ, ສະໜອງຢາປົວພະຍາດ, ເຄື່ອງນຸ່ງຫົ່ມ, ອຸປະກອນການສຶກສາ ແລະ ອື່ນໆ ລວມມູນຄ່າທັງໝົດ 129,970 ໂດລາສະຫະລັດ ແລະ ສອງຝ່າຍເຫັນດີສືບຕໍ່ຮ່ວມມື, ເຄື່ອນໄຫວຮ່ວມກັນຕາມພາລະບົດບາດ ໂດຍສືບຕໍ່ໂຄສະນາເຜີຍແຜ່ສາຍພົວພັນ ແລະ ການຮ່ວມມືອັນດີງາມ ລະຫວ່າງສອງປະເທດໃຫ້ປະຊາຊົນສອງຊາດ ໄດ້ຮັບຮູ້ ແລະ ເຂົ້າໃຈຢ່າງເລິກຊຶ່ງ, ສະໜັບສະໜູນການໄປ-ມາຫາສູ່ ແລະ ພົວພັນຮ່ວມມືລະຫວ່າງປະຊາຊົນ ເພື່ອສ້າງຄວາມຮັກແພງ, ຄວາມໄວ້ເນື້ອເຊື່ອໃຈ ແລະ ສ້າງກິດຈະກໍາຮ່ວມກັນ ເພື່ອປະກອບສ່ວນເສີມຂະຫຍາຍ ແລະ ພັດທະນາສາຍພົວພັນມິດຕະພາບ, ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫຼີໃຫ້ນັບມື້ໄດ້ຮັບການພັດທະນາ ກ້າວເຂົ້າສູ່ລະດັບໃໝ່.
ໃນວັນດຽວກັນ, ທ່ານ ຄຳສວຍ ແກ້ວດາລາວົງ ໄດ້ຕາງໜ້າໃຫ້ລັດຖະບານແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ຄະນະບໍລິຫານງານ ຂອງສະມາຄົມມິດຕະພາບ ສ.ເກົາຫຼີ - ລາວ ໃຫ້ 3 ທ່ານ ເພື່ອເປັນການຍ້ອງຍໍຜົນງານ ຄຸນງາມຄວາມດີ ຕໍ່ການປະກອບສ່ວນເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສ. ເກົາຫຼີ ກໍຄືການປະກອບສ່ວນທຶນຮອນຊ່ວຍເຫຼືອສ້າງສາພັດທະນາ ສປປ ລາວ ເປັນຕົ້ນ ແມ່ນການສ້າງໂຮງຮຽນປະຖົມສົມບູນບ້ານຊຽງແລນາ ເມືອງປາກງື່ມ ນະຄອນຫຼວງວຽງຈັນ, ໂຮງຮຽນປະຖົມສົມບູນບ້ານຫ້ວຍລ້າ ເມືອງສັງທອງ ນະຄອນຫຼວງວຽງຈັນ ແລະ ໂຮງຮຽນປະຖົມສົມບູນບ້ານກ້ານ ເມືອງຊຳເໜືອ ແຂວງຫົວພັນ.
ນອກຈາກນີ້ ຄະນະຜູ້ແທນສະມາຄົມມິດຕະພາບ ລາວ - ສ.ເກົາຫຼີ ໄດ້ຢ້ຽມຢາມ ແລະ ທັດສະນະສຶກສາສະຖານ ທີ່ທ່ອງທ່ຽວປະຫັວດສາດຈຳນວນໜຶ່ງຂອງແຂວງໂຈລາ. ການຢ້ຽມຢາມຂອງຄະນະໃນຄັ້ງນີ້, ແມ່ນໄດ້ຮັບຜົນສຳເລັດຢ່າງສະຫງ່າງາມ.
(ຂ່າວ: ຣັດສະໝີ ດວງສັດຈະ)
ຄໍາເຫັນ