ສຳມະນາ ກ່ຽວກັບການມີສ່ວນຮ່ວມຂອງປະຊາຊົນ ເພື່ອການບໍລິຫານ-ຄຸ້ມຄອງທີ່ກວມລວມ

ທ່ານ ສັນຍາ ປຣະເສີດ ກ່າວວ່າ: ໃນນາມສະພາແຫ່ງຊາດ ແຫ່ງ ສາທາລະນະລັດ ປະຊາທິ ປະໄຕ ປະຊາຊົນລາວ, ຂ້າພະເຈົ້າຂໍສະແດງຄວາມຂອບໃຈຢ່າງເລິກເຊິ່ງຕໍ່ສະມັດຊາລັດຖະສະພາປະເທດທີ່ໃຊ້ພາສາຝຣັ່ງ (APF) ແລະ ສູນລັດຖະສະພາອາຊີ (PCAsia) ທີ່ໄດ້ໃຫ້ການຮ່ວມມືອັນດີເລີດໃນການຮ່ວມມືຈັດກອງປະຊຸມສໍາມະນາສຳຄັນໃນຄັ້ງນີ້ກັບສະພາແຫ່ງຊາດລາວ.

ຫົວຂໍ້ຂອງການຝຶກອົບຮົມ ແມ່ນມີຄວາມໝາຍສຳຄັນ ແລະ ເຫັນໄດ້ເຖິງຄວາມຈຳເປັນໃນສະພາບປັດຈຸບັນຂອງພາກພື້ນອາຊີຕາເວັນອອກສ່ຽງໃຕ້ ເຊັ່ນດຽວກັນກັບບັນດາປະເທດອື່ນໆໃນທົ່ວໂລກ, ລັດຖະສະພາມີພາລະກິດຮ່ວມກັນ ຄືການເປັນສຽງແທນຂອງປະຊາຊົນ ແລະ ສ້າງຄວາມໝັ້ນຄົງໃຫ້ແກ່ພື້ນຖານຂອງປະຊາທິປະໄຕ ຜ່ານການເປີດກວ້າງ, ການມີສ່ວນຮ່ວມ ແລະ ຄວາມຕອບສະໜອງທີ່ທັນເວລາ.

ໃນໂລກທີ່ກຳລັງປ່ຽນແປງຢ່າງໄວນີ້, ການເສີມສ້າງ ແລະ ຮັກສາຄວາມໄວ້ວາງໃຈລະຫວ່າງປະ ຊາຊົນກັບຜູ້ແທນທີ່ຖືກເລືອກຕັ້ງ ແມ່ນສິ່ງທີ່ສຳຄັນຫຼາຍທີ່ສຸດ. ການມີສ່ວນຮ່ວມຂອງປະຊາຊົນຢ່າງແທ້ຈິງ, ການເຂົ້າເຖິງຂໍ້ມູນໄດ້ດີ ແລະ ການຕັດສິນໃຈຢ່າງມີສ່ວນຮ່ວມ ບໍ່ແມ່ນພຽງແຕ່ຫຼັກການຂອງປະຊາທິ ປະໄຕ, ແຕ່ຍັງເປັນເງື່ອນໄຂທີ່ຈຳເປັນຕໍ່ສັນຕິພາບ, ຄວາມໝັ້ນຄົງ ແລະ ການພັດທະນາຢ່າງຍືນຍົງ. ການຝຶກອົບຮົມນີ້ເປັນເວທີປາໄສທີ່ມີຄຸນຄ່າ ເພື່ອໃຫ້ພວກເຮົາໄດ້ແລກປ່ຽນປະສົບການ, ແບ່ງປັນວິທີການທີ່ສ້າງສັນ ແລະ ຮຽນຮູ້ບົດຮຽນຮ່ວມກັນໃນການສົ່ງເສີມການປະຕິບັດລັດຖະສະພາທີ່ເປີດກວ້າງ.

ສະພາແຫ່ງຊາດລາວໄດ້ໃຫ້ຄວາມສຳຄັນກັບການໃຫ້ລັດຖະສະພາເຂົ້າໃກ້ຊິດກັບປະຊາຊົນ. ໃນໄລຍະຫຼາຍປີຜ່ານມາ, ພວກເຮົາໄດ້ຈັດໃຫ້ມີການຢ້ຽມຢາມເຂດເລືອກຕັ້ງແບບສະໝໍ່າສະເໝີ ແລະ ຈັດ ການໂອ້ລົມສົນທະນາກັບປະຊາຊົນ ເພື່ອໃຫ້ສຽງຂອງແມ່ຍິງ, ຊາວໜຸ່ມ ແລະ ກຸ່ມປະຊາຊົນທີ່ອ່ອນໄຫວ ໄດ້ຮັບການຮັບຟັງ ແລະ ຖືກນຳໄປພິຈາລະນາ ໃນການເຮັດວຽກຂອງພວກເຮົາ.

ພວກເຮົາຍັງໄດ້ຂະຫຍາຍຊ່ອງທາງການສື່ສານຜ່ານທາງໂທລະພາບ, ວິທະຍຸ ແລະ ແພລດຟອມ ດິຈິຕອນ, ເພື່ອໃຫ້ການອະພິປາຍໃນສະພາ ແລະ ຂໍ້ມູນກົດໝາຍເຂົ້າເຖິງໄດ້ງ່າຍຂຶ້ນສຳລັບປະຊາຊົນ. ຄຽງຄູ່ກັນນັ້ນ, ພວກເຮົາໄດ້ສົ່ງເສີມການສົນທະນາໃຫ້ມີປະສິດທິພາບຫຼາຍຂຶ້ນ ລະຫວ່າງສະມາຊິກສະພາແຫ່ງຊາດ, ອົງການແຫ່ງລັດ ແລະ ຊຸມຊົນທ້ອງຖິ່ນ, ເພື່ອໃຫ້ກົດໝາຍ ແລະ ນະໂຍບາຍຕ່າງໆ ສາມາດຕອບສະໜອງຕໍ່ຄວາມຕ້ອງການຂອງສັງຄົມໄດ້ຢ່າງແທ້ຈິງ.

ພວກເຮົາເຊື່ອໝັ້ນວ່າ ການເສີມສ້າງການມີສ່ວນຮ່ວມຂອງປະຊາຊົນ ແລະ ການສົ່ງເສີມລັດຖະສະພາແບບເປີດກວ້າງ ຈະຊ່ວຍເສີມຄວາມຊອບທຳທາງປະຊາທິປະໄຕ ແລະ ສ້າງລະບົບການບໍລິຫານທີ່ມີຄວາມຮ່ວມມື ແລະ ຕອບສະໜອງໄດ້ຢ່າງທັນເວລາ.

ນອກຈາກນີ້, ການຝຶກອົບຮົມດັ່ງກ່າວ ຍັງເປັນໂອກາດອັນດີທີ່ຈະສຳຫຼວດເຄື່ອງມືທີ່ໃຊ້ໄດ້ຈິງ ເຊັ່ນ: ແພລັດຟອມດີຈີຕອນ, ຂໍ້ມູນທີ່ເປີດກວ້າງ ແລະ ການຮ້ອງທຸກອອນລາຍ, ເພື່ອໃຫ້ປະຊາຊົນເຂົ້າໃກ້ຂະບວນການ ຂອງລັດຖະສະພາຫຼາຍຂຶ້ນ. ມັນຍັງເປັນໂອກາດໃຫ້ພວກເຮົາຮຽນຮູ້ຈາກປະສົບການພາກພື້ນ ແລະ ສາກົນ ແລະ ນຳໄປປະຕິບັດ ເພື່ອມາປັບໃຊ້ໃຫ້ເໝາະສົມກັບແຕ່ລະປະເທດ. ທີ່ສຳຄັນກວ່ານັ້ນ, ມັນຈະຊ່ວຍເສີມສ້າງຄວາມຮ່ວມມືລະຫວ່າງລັດຖະສະພາ ແລະ ຈັດຕັ້ງຄູ່ຮ່ວມງານທີ່ຍືນຍົງກັບອົງການພາກສັງຄົມ ແລະ ກຸ່ມຊຸມຊົນ. ເຊື່ອວ່າ ການປຶກສາຫາລືໃນສອງມື້ຂ້າງໜ້ານີ້ ຈະໃຫ້ໝາກຜົນທີ່ເປັນຮູບປະທຳ ແລະ ຈະເພີ່ມພູນຄວາມພະຍາຍາມຮ່ວມກັນໃນການເສີມຄວາມໝັ້ນຄົງທາງປະຊາທິປະໄຕ ແລະ ການພັດທະນາການຮວມມື, ທັງໃນພາຍໃນອາຊຽນ ແລະ ນອກພາກພື້ນ.

(ຂ່າວ-ພາບ: ແສງຈັນ)