ຫົວໜ້າ ຄອສພ ຢ້ຽມຢາມແຂວງ ໄຊຍະບູລີ

ໃນວັນທີ 24 ມີນາຜ່ານມາ, ທ່ານ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົມຮົມສູນກາງພັກ (ຄອສພ) ປະທານສະພາທິດສະດີສູນກາງພັກ ພ້ອມຄະນະໄດ້ລົງຢ້ຽມຢາມ ແຂວງ ໄຊຍະບູລີ, ໂດຍໃຫ້ການຕ້ອນຮັບຂອງທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ໄຊຍະບູລີ, ມີພາກສ່ວນກ່ຽວຂ້ອງຂອງແຂວງ ແລະ ເມືອງໃຫ້ການຕ້ອນຮັບ.
    ກ່ອນອື່ນການນໍາຂອງແຂວງແມ່ນໄດ້ນໍາພາທີມງານຂອງ ຄອສພ ລົງຢ້ຽມຢາມການລ້ຽງງົວທອມຂອງປະຊາຊົນ ບ້ານນາໂສມໃຫຍ່, ຢ້ຽມຢາມກຸ່ມຫັດຖະກໍາຕໍ່າຫູກ ບ້ານແສງຈະເລີນ, ໂຮງງານລ້າງໝາກຖົ່ງເຫຼືອງຟັກສົດຂອງນັກທຸລະກິດຈາກ ສປ ຈີນ, ໂຮງງານຜະລິດແປ້ງມັນຕົ້ນຂອງບໍລິສັດ ກ້າວໜ້າລາວ ຈໍາກັດ ຢູ່ບ້ານນາຊໍ່າ ແລະ ຢ້ຽມຢາມໂຮງງານຜະລິດເສັ້ນໝີ່ຂອງປະຊາຊົນ ບ້ານຖິ່ນ.
 ໂອກາດດັ່ງກ່າວ, ທ່ານ ຄໍາພັນ ເຜີຍຍະວົງ ກໍໄດ້ສະແດງຄວາມຍ້ອງຍໍຊົມເຊີຍມາຍັງປະຊາຊົນຜູ້ລ້ຽງ ຜູ້ຜະລິດເປັນສິນຄ້າ ແລະ ຜູ້ປະກອບການຊາວຈີນທີ່ມີຄວາມຕັດສິນໃຈໃນການລົງທຶນ, ພ້ອມທັງໄດ້ເນັ້ນໜັກໃຫ້ສືບຕໍ່ຄື: ສໍາລັບຜູ້ລ້ຽງແມ່ນໃຫ້ເອົາໃຈໃສ່ໃນການເບິ່ງແຍງສຸຂະພາບຂອງສັດ, ການໃຫ້ອາຫານທີ່ມີປະໂຫຍດໃຫ້ທາດໂປຼຕີນສູງ ເພື່ອໃຫ້ສັດໃຫຍ່ໄວ ແລະ ມີນໍ້າໜັກໄດ້ຕາມມາດຖານຂອງທ້ອງຕະຫຼາດ, ສໍາລັບຜູ້ຜະລິດເສັ້ນໝີ່ແມ່ນໃຫ້ເນັ້ນຄຸນນະພາບ, ເນັ້ນຄວາມສະອາດ, ຮັກສາສິ່ງແວດລ້ອມບໍ່ໃຫ້ມີຜົນກະທົບກັບປະຊາຊົນທີ່ຢູ່ໃກ້ຄຽງ ແລະ ໂຮງງານແປ້ງມັນຕົ້ນແມ່ນໃຫ້ສືບຕໍ່ຊຸກຍູ້ປະຊາຊົນຢູ່ແຕ່ລະເຂດ, ແຕ່ລະທ້ອງຖິ່ນໃຫ້ປູກມັນຕົ້ນປ້ອນໂຮງງານ ໂດຍໃຫ້ປູກໜູນວຽນແບບຕໍ່ເນື່ອງ ເພື່ອປ້ອງກັນບໍ່ໃຫ້ມັນຕົ້ນລົ້ນໂຮງງານ ແລະ ສາມາດຜະລິດແປ້ງໄດ້ຕະຫຼອດປີ, ພ້ອມດຽວກັນຕ້ອງເອົາໃຈໃສ່ຕໍ່ກັບສິ່ງເສດເຫຼືອບໍ່ໃຫ້ມີຜົນກະທົບຕໍ່ສິ່ງແວດລ້ອມ ແລະ ສືກສາຄວາມເປັນໄປໄດ້ເພື່ອສ້າງຕັ້ງໂຮງງານຜະລິດຫົວອາຫານສັດໄປພ້ອມ ເພື່ອລຸດຜ່ອນການນໍາເຂົ້າຫົວອາຫານສັດຈາກຕ່າງປະເທດ.
(ຂ່າວ-ພາບ: ອຸ່ນເຮືອນ ໂພທິລັກ)