ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ຊຸກຍູ້ວຽກງານປັບປຸງກົງຈັກການຈັດຕັ້ງ ຢູ່ແຂວງເຊກອງ

ທ່ານ ນາງ ເພັດດາວອນ ວາດສະຫງ່າ ໄດ້ລາຍງານໂດຍຫຍໍ້ກ່ຽວກັບການປັບປຸງກົງຈັກການຈັດຕັ້ງຂອງຫ້ອງວ່າການແຂວງ ໂດຍສະເພາະ ການໂອນວຽກງານພະແນກພາຍໃນ ມາຂຶ້ນກັບ ຫ້ອງວ່າການແຂວງ ໂດຍປະຕິບັດຕາມ ຄໍາແນະນໍາ ຂອງຄະນະເລຂາທິການສູນກາງພັກ ສະບັບເລກທີ 483/ຄລສພ, ລົງວັນທີ 4 ເມສາ 2025 ກ່ຽວກັບການປັບປຸງກົງຈັກການຈັດຕັ້ງ; ມາຮອດປັດຈຸບັນ ພາຍຫຼັງ ກອງປະຊຸມສະພາ ປະຊາຊົນແຂວງ ໄດ້ຮັບຮອງການປັບປຸງກົງຈັກການຈັດຕັ້ງ ຂອງອົງການປົກຄອງແຂວງ. ຫ້ອງວ່າການແຂວງ ໃນນາມ ຄະນະປັບປຸງກົງຈັກຂັ້ນແຂວງ ກໍຄືຄະນະປັບປຸງກົງຈັກການຈັດຕັ້ງ ຂອງຫ້ອງວ່າການແຂວງ ກໍໄດ້ມີການປະສານສົມທົບກັບຄະນະປັບປຸງກົງຈັກ ການຈັດຕັ້ງຂັ້ນແຂວງ ໂດຍສະເພາະຄະນະຈັດຕັ້ງແຂວງ ແລະ ຂະແໜງ ການສາຍຕັ້ງ ເພື່ອປັບປຸງ-ຊັບຊ້ອນບຸກຄະລາກອນຄືນໃໝ່. ພາຍຫຼັງ ທັງສອງການຈັດຕັ້ງໂຮມມາຂຶ້ນກັບ; ກົງຈັກການຈັດຕັ້ງ ປະກອບມີ 6 ຂະແໜງ, ມີພະນັກງານລັດຖະກອນ ທັງໝົດ 80 ທ່ານ ຍິງ 30 ທ່ານ. ຈາກນັ້ນ, ບັນດາການນໍາທັງສູນກາງ ແລະ ຂັ້ນແຂວງ ໄດ້ປະກອບຄໍາຄິດຄໍາເຫັນຕໍ່ວຽກງານປັບກົງຈັກການຈັດຕັ້ງ ເພື່ອກຳນົດພາລະບົດບາດ, ຂອບເຂດສິດ ແລະ ໂຄງປະກອບກົງຈັກການຕັ້ງ ໃຫ້ມີຄວາມຄ່ອງຕົວ ແລະ ແທດເໝາະກັບວຽກງານຕົວຈິງຂຶ້ນເທື່ອລະກ້າວ.

ໂອກາດນີ້, ທ່ານ ບົວຄົງ ນາມມະວົງ ໄດ້ເນັ້ນໃຫ້ຄະນະນໍາຫ້ອງວ່າການແຂວງເຊກອງ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານພາຍໃນຄວາມຮັບຜິດຊອບຂອງຕົນ ໃຫ້ມີຄວາມຮັບຮູ້ເຊື່ອມຊຶມກຳແໜ້ນແນວທາງນະໂຍບາຍຂອງພັກ-ລັດ ຕິດພັນກັບການຈັດຕັ້ງຜັນຂະຫຍາຍໃຫ້ກວ້າງຂວາງ ເພື່ອຫັນມາເປັນແຜນງານອັນລະອຽດໃນການຈັດຕັ້ງປະຕິບັດວຽກງານໃນຂະແໜງການຕົນໃຫ້ພັດທະນາຂຶ້ນເທື່ອກ້າວ. ສືບຕໍ່ປະຕິບັດໜ້າທີ່ການເມືອງວຽກງານວິຊາສະເພາະທີ່ຕົນຮັບຜິດຊອບໃຫ້ມີຜົນສໍາເລັດຕາມແຜນທີ່ວາງໄວ້, ສືບຕໍ່ປັບປຸງແບບແຜນນໍາພາ ແລະ ວິທີເຮັດວຽກ ປະຕິບັດແບບລວມສູນ ປະຊາທິປະໄຕ ເປັນໝູ່ຄະນະ, ເຮັດວຽກມີແຜນການ ມີໂຄງການອັນລະອຽດ ຕິດພັນກັບການຕິດຕາມກວດ ຊຸກຍູ້ການຈັດຕັ້ງປະຕິບັດວຽກງານເປັນປະຈໍາ, ເຮັດວຽກຕິດແທດກັບຮາກຖານຕົວຈິງ, ສືບຕໍ່ການປະສານງານຢ່າງກົມກຽວແຕ່ສູນກາງຮອດທ້ອງຖິ່ນ ເພື່ອເຮັດໃຫ້ວຽກງານມີຄວາມສະດວກ ຄ່ອງຕົວດີ ຂຶ້ນກວ່າເກົ່າ.

(ຂ່າວ: ພຸດທະສອນ)