ຫສພ ປະກາດການຈັດຕັ້ງ ແລະ ເຊື່ອມຊຶມນິຕິກໍາຂອງພັກ-ລັດ

ໃນວາລະ ບັນດາຜູ້ເຂົ້າຮ່ວມ ໄດ້ຮັບຟັງ ການຜ່ານມະຕິຕົກລົງ ຂອງຄະນະເລຂາທິການສູນກາງພັກ ເລກທີ 122/ຄລສພ ລົງວັນທີ 5/6/2026 ວ່າດ້ວຍ ການແຕ່ງຕັ້ງຮອງຫົວໜ້າຫ້ອງວ່າການສູນກາງພັກ, ຄະນະເລຂາທິການສູນກາງພັກ ຕົກລົງ ແຕ່ງຕັ້ງ ສະຫາຍ ສົມບັດ ເພັງພະຈັນ ເປັນຮອງຫົວໜ້າ ຫສພ, ຂໍ້ຕົກລົງ ຂອງຫົວໜ້າ ຫສພ ເລກທີ 420/ຫສພ, ລົງວັນທີ 1 ກໍລະກົດ 2026 ວ່າດ້ວຍການແຕ່ງຕັ້ງຕໍາແໜ່ງບໍລິຫານໃຫ້ລັດຖະກອນ ຫສພ, ຫົວໜ້າ ຫສພ ຕົກລົງ ແຕ່ງຕັ້ງ ຈໍານວນ 3 ທ່ານ ຄື: ທ່ານ ຄໍາຫຼ້າ ໄຊສົມບັດ ຫົວໜ້າພະແນກ ຂຶ້ນເປັນ ຮອງຫົວໜ້າກົມ, ທ່ານ ນາງ ພັນໂນລາ ວົງປັນຍາ ຫົວໜ້າພະແນກ ຂຶ້ນເປັນ ຮອງຫົວໜ້າກົມຄົ້ນຄວ້າ-ສັງລວມ, ທ່ານ ນາງ ສີສະໄໝ ນາມແກ່ນທ້າວ ຫົວໜ້າພະແນກ ຂຶ້ນເປັນ ຮອງຫົວໜ້າກົມຄົ້ນຄວ້າ-ສັງລວມ.

ຈາກນັ້ນ, ທ່ານ ຜາຄໍາ ອິນແສງ ກໍາມະການສູນກາງພັກ ຮອງຫົວໜ້າ ຫສພ, ໄດ້ຂຶ້ນຜ່ານບົດສະຫຼຸບ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ທິດທາງແຜນການປະຈໍາປີ 2026, ທົ່ວອົງຄະນະພັກຫ້ອງວ່າການສູນກາງພັກ ມີໜ່ວຍພັກ ທັງໝົດ 12 ໜ່ວຍພັກ (ໃນນີ້ 1 ໜ່ວຍພັກເປັນໜ່ວຍພັກສ້າງຕັ້ງຂຶ້ນໃໝ່ ຄື: ໜ່ວຍພັກຫ້ອງການປະຕິຮູບລັດວິສາຫະກິດ), ມີ 11 ໜ່ວຍພັກແມ່ນໄດ້ສໍາເລັດແຜນການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີ 2025 ຊຶ່ງຜ່ານການຄົ້ນຄວ້າຈາກກອງປະຊຸມ ຄະນະຮັບຜິດຊອບປະເມີນຜົນເຫັນວ່າ ບັນດາໜ່ວຍພັກໄດ້ວາງທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນແຕ່ລະດ້ານ ແມ່ນມີຄວາມຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ, ສາມາດຍົກໃຫ້ເຫັນດ້ານດີ, ຜົນສໍາເລັດຂອງການນໍາພາ-ຊີ້ນໍາວຽກງານຖືກຕ້ອງຕາມລະບຽບຫຼັກການທີ່ກຳນົດໄວ້, ດັ່ງນັ້ນກອງປະຊຸມຈຶ່ງໄດ້ຕົກລົງຮັບຮອງເອົາ ຈໍານວນທັງໝົດ 11 ໜ່ວຍພັກ ຄື: ໜ່ວຍພັກກົມບໍລິຫານ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມກວດກາ, ໜ່ວຍພັກກົມຄົ້ນຄວ້າສັງລວມ, ໜ່ວຍພັກກົມເລຂານຸການ-ການນໍາ, ໜ່ວຍພັກກໍ່ສ້າງຮາກຖານການເມືອງ, ໜ່ວຍພັກກົມທ້ອງຖິ່ນຮາກຖານ, ໜ່ວຍພັກຂໍ້ມູນຂ່າວສານ ແລະ ສໍາເນົາເອກະສານຂອງພັກ, ໜ່ວຍພັກກົມການເງິນ, ໜ່ວຍພັກກົມຄຸ້ມຄອງເງິນບໍາລຸງພັກ ແລະ ໜ່ວຍພັກກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ. ຜົນຂອງກອງປະຊຸມຄະນະປະຈຳພັກ ຄັ້ງວັນທີ 30/3/2026 ໄດ້ຕົກລົງເຫັນດີຮັບຮອງເອົາ 3 ໜ່ວຍພັກ ທີ່ຄົບມາດຖານເງື່ອນໄຂເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ຄື: ໜ່ວຍພັກກົມກໍ່ສ້າງຮາກຖານການເມືອງ, ໜ່ວຍພັກກົມຄົ້ນຄວ້າສັງລວມ ແລະ ໜ່ວຍພັກກົມທ້ອງຖິ່ນ-ຮາກຖານ, ສໍາລັບ 5 ໜ່ວຍພັກແມ່ນເປັນໜ່ວຍພັກແຂງ ຄື: ໜ່ວຍພັກກົມບໍລິຫານ, ກົມຈັດຕັ້ງ, ກົມກວດກາ, ກົມເລຂານຸການ-ການນໍາ, ກົມຂໍ້ມູນຂ່າວສານ ແລະ ສໍາເນົາເອກະສານຂອງພັກ, ອີກ 3 ໜ່ວຍພັກແມ່ນເປັນໜ່ວຍພັກກາງ ຄື: ໜ່ວຍພັກກົມການເງິນ, ກົມຄຸ້ມຄອງເງິນບຳລຸງພັກ ແລະ ກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ, ໃນປີ 2025 ທົ່ວອົງຄະນະພັກຫ້ອງວ່າການສູນກາງພັກ ມີສະມາຊິກພັກທີ່ມີເງື່ອນໄຂປະເມີນທັງໝົດ 184 ສະຫາຍ ຍິງ 81 ສະຫາຍ, ຜົນການປະເມີນມີສະມາຊິກພັກແຂງ ຈໍານວນ 184 ສະຫາຍ ຍິງ 81 ສະຫາຍ ກວມ 100%.

ສາເຫດທີ່ພາໃຫ້ມີຜົນສໍາເລັດ ຍ້ອນມີນິຕິກຳເປັນບ່ອນອີງໃນການຈັດຕັ້ງປະຕິບັດວຽກງານ, ຍ້ອນຄວາມເອົາໃຈໃສ່ຂອງຄະນະປະຈຳພັກ, ຄະນະພັກຫ້ອງວ່າການສູນກາງພັກ ໃນການຊຸກຍູ້ບັນດາໜ່ວຍພັກ ພາຍໃນອົງຄະນະພັກ ຫສພ ໃຫ້ມີຄວາມຕື່ນຕົວ, ຕັ້ງໜ້າສູ້ຊົນກໍ່ສ້າງໜ່ວຍພັກຕົນໃຫ້ໄດ້ເປັນໜ່ວຍພັກນາມມະຍົດ, ສະມາຊິກພັກພາຍໃນໜ່ວຍເປັນສະມາຊິກພັກແຂງ ກວມອັດຕາລວມເປັນສ່ວນໃຫຍ່, ຄະນະບໍລິຫານງານພັກ ມີຄວາມເປັນເອກະພາບ, ຢຶດໝັ້ນ ແລະ ປະຕິບັດຕາມຫຼັກການລວມສູນປະຊາທິປະໄຕຢ່າງເຂັ້ມງວດ ແລະ ເປັນເຈົ້າການໃນການຈັດ ຕັ້ງປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ.

ຈາກນັ້ນ, ໃນວາລະກອງປະຊຸມ ຍັງໄດ້ຜ່ານມະຕິຕົກລົງ ຂອງຄະນະປະຈໍາພັກ ຫສພ ວ່າດ້ວຍການຮັບຮອງເອົາໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2026, ຜ່ານມະຕິຕົກລົງ ແລະ ສະເໜີລາຍຊື່ ບັນດາທ່ານທີ່ໄດ້ຮັບບັດສະມາຊິກພັກສົມບູນ ຊຸດທີ X, ມອບໃບຢັ້ງຢືນນາມມະຍົດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025, ຕາງໜ້າບັນດາໜ່ວຍພັກ ຈັບມືແຂ່ງຂັນ ການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກ ແໜ້ນ ແລະ ຍັງໄດ້ຮັບຟັງການເຜີຍແຜ່ບົດແນະນໍາກົດລະບຽບພັກສະໄໝທີ XII ແລະ ກົດໝາຍ ວ່າດ້ວຍການປົກຄອງທ້ອງຖິ່ນ (ສະບັບປັບປຸງ) ສະບັບເລກທີ 78/ສພຊ ລົງວັນທີ 20 ມີນາ 2025, ລະບຽບ ວ່າດ້ວຍ ການຄຸ້ມຄອງຈັດສັນປຶ້ມ ແລະ ເອກະສານຢູ່ພາຍໃນ ຫສພ, ຂໍ້ກໍານົດ ວ່າດ້ວຍ ການຄຸ້ມຄອງເອກະສານ ຂອງພັກປະຊາຊົນ ປະຕິວັດລາວ.

ໂອກາດດັ່ງກ່າວ, ທ່ານ ເພັດ ພົມພິພັກ ໄດ້ໂອ້ລົມ ຊຶ່ງມີນື້ອໃນບາງຕອນວ່າ: ໃນບົດຮຽນ ແລະ ພຶດຕິກຳຕົວຈິງໄດ້ຊີ້ໃຫ້ເຫັນຢ່າງຈະແຈ້ງວ່າ: ຢາກສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄະນະໜ່ວຍພັກຕ້ອງ ເພີ່ມທະວີການຊີ້ນໍາ-ນໍາພາຢ່າງເປັນລະບົບຄົບຊຸດ ຮຽກຮ້ອງໃຫ້ພວກເຮົາຕ້ອງເອົາໃຈໃສ່ຢ່າງຕັ້ງໜ້າ-ເພີ່ມທະວີປັບ ປຸງບັນດາວຽກງານຕົ້ນຕໍບາງດ້ານ ຄື: ເພີ່ມທະວີການເຮັດວຽກງານການເມືອງແນວຄິດພາຍໃນໜ່ວຍ ໃຫ້ມີຄວາມໜັກແໜ້ນ, ສ້າງຄວາມເປັນເອກະພາບພາຍໃນ ຫສພ ໃຫ້ມີຄວາມເຂັ້ມແຂງ, ສືບຕໍ່ເສີມຂະຫຍາຍ ມູນເຊື້ອໃຫ້ມີຄວາມສາມັກຄີ, ຄວາມເປັນປຶກແຜ່ນຢູ່ ຫສພ ກໍຄືພາຍໃນໜ່ວຍພັກ ບົນພື້ນຖານແນວທາງນະໂຍບາຍຂອງພັກ ແລະ ສິ່ງສໍາຄັນຂາດບໍ່ໄດ້ນັ້ນແມ່ນວຽກງານຕິດຕາມ-ກວດກາ ຕ້ອງໄດ້ເຮັດເປັນລະບົບ ແລະ ເຮັດເປັນປົກກະຕິ, ເພີ່ມທະວີປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ, ປັບປຸງຍົກລະດັບສະມາຊິກພັກ-ພະນັກງານ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ຖືເອົາການຍົກສູງຄຸນນະພາບໃນການນໍາພາຢ່າງຮອບດ້ານ ເປັນໜ້າທີ່ຍຸດທະສາດທາງດ້ານການຈັດຕັ້ງ ແລະ ແມ່ນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນ, ສະ ມາຊິກພັກທຸກສະຫາຍ ພະນັກງານທຸກຄົນ, ເພີ່ມທະວີຍົກສູງລະດັບຄວາມຮູ້, ຄວາມສາມາດ ທາງດ້ານທິດສະດີມາກ-ເລນິນ, ດ້ານວິຊາສະເພາະໃນທຸກໆດ້ານ ໃຫ້ແກ່ສະມາຊິກພັກ-ພະນັກງານໃຫ້ສູງຂຶ້ນເລື້ອຍໆ ເພື່ອແນໃສ່ ເຮັດສໍາເລັດໜ້າທີ່ການເມືອງຕາມພາລະບົດບາດທີ່ພັກໄດ້ມອບໝາຍໃຫ້.

(ຂ່າວ: ແສງຈັນ)