 |
ໂອກາດນີ້, ທ່ານ ພົຕ ບຸນມີ ແສງຄໍາຢອງ ໄດ້ໃຫ້ຮູ້ວ່າ: ວັນທີ 5 ເມສາ 1961 ແມ່ນວັນສ້າງຕັ້ງກໍາລັງ ປກສ ຊຶ່ງມາຮອດປີ 2026 ນີ້ ພໍດີຄົບຮອບ 65 ປີ ແຫ່ງການສ້າງຕັ້ງກໍາລັງ ປກສ ປະຊາຊົນ ໂດຍແມ່ນພັກປະຊາຊົນປະຕິວັດລາວເປັນຜູ້ກໍ່ຕັ້ງ-ນໍາພາຕາມຫຼັກການເດັດຂາດ ໂດຍກົງ ແລະ ຮອບດ້ານ, ເປັນກໍາລັງປະກອບອາວຸດປະຕິວັດທີ່ແຫຼມຄົມຂອງພັກ, ມີຄວາມຈົງຮັກພັກດີ ແລະ ສັດຊື່ບໍລິສຸດຕໍ່ພັກ, ຕໍ່ລັດ, ຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ ທັງແມ່ນກໍາລັງທີ່ມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາ ຊົນຢ່າງແທ້ຈິງ. ການກຳເນີດຂອງກຳລັງ ປກສ ປະຊາຊົນ ແມ່ນສຸດທີ່ມີຄວາມໝາຍສຳຄັນ, ເປັນເຫດການທາງການ ເມືອງອັນໃຫຍ່ຫຼວງໃນປະຫວັດສາດຂອງຊາດລາວເຮົາ; ນັບແຕ່ມື້ສ້າງຕັ້ງເປັນຕົ້ນມາ ກຳລັງ ປກສ ປະຊາຊົນໄດ້ເອົາ ໃຈໃສ່ປະຕິບັດ 3 ໜ້າທີ່ 4 ການພົວພັນ ທັງເຄື່ອນໄຫວປ້ອງກັນ, ຝຶກແອບຮ່ຳຮຽນ, ປັບປຸງກໍ່ສ້າງກຳລັງ, ເພີ່ມພູນຜະລິດຜົນ, ສ້າງພະລາທິການກັບທີ່, ລົງຂົນຂວາຍກໍ່ສ້າງຮາກຖານ ຊຶ່ງໄດ້ຮັບຄວາມຮັກແພງ, ອຸ້ມຊູຊ່ວຍເຫຼືອຈາກປະຊາຊົນໄດ້ເປັນຢ່າງດີ ເຮັດໃຫ້ກຳລັງ ປກສ ມີຄວາມເຕີບໃຫຍ່ເຂັ້ມແຂງເປັນກ້າວໆມາ, ບັນດາກຳລັງວິຊາສະເພາະໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ, ເພື່ອຮັບປະກັນເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ເປັນລະບຽບຮຽບຮ້ອຍໂດຍພື້ນຖານ, ຕ້ານ-ສະກັດກັ້ນອາຊະຍາກຳທຸກປະເພດ ແລະ ແກ້ໄຂປະກົດການຫຍໍ້ທໍ້ຕ່າງໆຢ່າງແຂງແຮງ ອັນພົ້ນເດັ່ນໄດ້ເປັນເຈົ້າການຫັນເອົາກຳລັງລົງກໍ່ສ້າງຮາກຖານການເມືອງຢູ່ບັນດາເຂດຈຸດສຸມ, ຫຼໍ່ແຫຼມ ເຮັດໃຫ້ຮາກຖານມີຄວາມສະຫງົບ, ຕີຕ້ານ ແລະ ແກ້ໄຂບັນຫາໜໍ່ແໜງຄວາມບໍ່ສະຫງົບຢ່າງເປັນເຈົ້າການ, ມີຄວາມຄ່ອງແຄ້ວ ແລະ ຮັບປະກັນ ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄດ້ຮັບໝາກຜົນຕົວຈິງ ເຮັດໃຫ້ບັນຫາຢາເສບຕິດໄດ້ຮັບການສະ ກັດກັ້ນ, ແກ້ໄຂຢ່າງຕໍ່ເນື່ອງ, ແກ້ໄຂກຸ່ມແກ້ງສໍ້ໂກງຊັບທາງໂທລະຄົມ (ຄໍເຊັນເຕີ, ສະແກມເມີ) ສະກັດກັ້ນ-ແກ້ໄຂບັນຫາການຄ້າມະນຸດ, ການສວຍໃຊ້ສື່ສັງຄົມອອນລາຍໃນທາງບໍ່ຖືກຕ້ອງ ແລະ ປະກົດການຫຍໍ້ທໍ້ຕ່າງໆໃນສັງຄົມ; ເອົາໃຈໃສ່ໃນການປ້ອງກັນ 3 ວັນປະຫວັດສາດ, ວັນສະຖາປະນາ ສປປ ລາວ ຄົບຮອບ 50 ປີ, ກອງປະຊຸມໃຫຍ່ ຄັ້ງທີ XII ຂອງພັກ, ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ X, ສະມາຊິກສະພາປະຊາຊົນແຂວງ ຊຸດທີ V ແລະ ງານມະຫະກຳກິລາແຫ່ງຊາດ ຄັ້ງທີ XII ມີຄວາມສະຫງົບປອດໄພ 100%. ພ້ອມນັ້ນ, ຍັງໄດ້ເພີ່ມທະວີການພົວພັນຮ່ວມມືກັບກໍາລັງ ປກສ ບັນດາປະເທດເພື່ອນມິດຍຸດທະສາດ, ບັນດາປະເທດກຸ່ມອາຊຽນ ແລະ ບັນດາປະ ເທດຕ່າງໆໃນພາກພື້ນ ແລະ ໃນທົ່ວໂລກ ເຮັດໃຫ້ກຳລັງ ປກສ ປະຊາຊົນລາວມີບົດບາດພົ້ນເດັ່ນຂຶ້ນໃນເວທີສາກົນ.
ຂ່າວ: ສົມຫວັງ
ຄໍາເຫັນ