 |
ໃນພິທີທ່ານ ແສງສາທິດ ພິມເມືອງ ປະທານຄະນະກໍາມະການປົກຄອງເມືອງຈັນທະບູລີ ໄດ້ກ່າວເປີດພິທີບາງຕອນວ່າ: ການສະເຫຼີມສະຫຼອງງານບຸນອອກພັນສາປະວໍລະນາ ແລະ ບຸນຊ່ວງເຮືອແມ່ນເປັນງານບຸນປະເພນີປະຈຳຊາດລາວທີ່ສືບທອດກັນມາເປັນປະຈຳທຸກໆປີ ແລະ ງານດັ່ງກ່າວ ຈັດຂຶ້ນໃນທ່າມກາງບັນຍາກາດທີ່ປວງຊົນລາວທັງຊາດ ພວມອອກແຮງແຂ່ງຂັນສ້າງຜົນງານຂໍ່ານັບຮັບຕ້ອນ 3 ວັນປະຫວັດສາດ ຂອງຊາດ-ຂອງພັກຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ຢ່າງເປັນຂະບວນການຟົດຟື້ນ ເວົ້າລວມເວົ້າສະເພາະກໍເພື່ອຂໍ່ານັບຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ 8 ຂອງອົງຄະນະພັກນະຄອນຫຼວງວຽງຈັນ ພ້ອມກັນນີ້ຍັງເປັນການປົກປັກຮັກສາເສີມຂະຫຍາຍມູນເຊື້ອວັດທະນະທໍາຮີດຄອງປະເພນີອັນດີງາມຂອງຊາດ ແລະ ເປັນການສົ່ງເສີມສິນຄ້າຜະລິດຕະພັນພາຍໃນໃຫ້ເຂັ້ມແຂງທັງເປັນໂອກາດໃຫ້ປະຊາຊົນໄດ້ແລກປ່ຽນຊື້-ຂາຍ ແລະ ໄດ້ເຕົ້າໂຮມຄວາມສາມັກຄີຊຶ່ງກັນ ແລະ ກັນ ຊຶ່ງມື້ນີ້ຈະໄດ້ແຂ່ງຂັນເຮືອປະເພນີຍິງ 3 ລໍາ, ເຮືອປະເພນີຊາຍ 5 ລໍາ ແລະ ເຮືອສູດຊາຍ 55 ສີພາຍ 4 ລໍາ ລວມທັງໝົດມີ 12 ລຳ.
ການແຂ່ງຂັນຊ່ວງເຮືອ ຫຼັງມື້ບຸນອອກພັນສາ ຂອງທຸກໆປີນັ້ນ ແມ່ນເປັນກິລາທາງໜ້ານໍ້າ ປະເພດໜຶ່ງຈັດຂຶ້ນເພື່ອເປັນການສ້າງໂອກາດໃຫ້ປະຊາຊົນໄດ້ມາພົບປະເພື່ອນມິດສະຫາຍຍາດຕິພີ່ນ້ອງທີ່ມາຈາກທົ່ວສາລະທິດ ນອກຈາກນັ້ນຍັງເປັນໂອກາດໃຫ້ປະຊາຊົນໄດ້ເຕົ້າໂຮມຄວາມສາມັກຄີຊຶ່ງກັນ ແລະ ກັນ ໃນສະໄໝກ່ອນ ຍັງເປັນການສ້າງໃຫ້ມີສາຍສໍາພັນລະຫວ່າງ ຜູ້ປົກຄອງກັບຣາຊະດອນໂດຍການເອົາເຮືອມາຊ່ວງແຂ່ງຂັນລະຫວ່າງ ຜູ້ປົກຄອງກັບຣາຊະດອນນັ້ນແມ່ນເພື່ອຄວາມເຂົ້າອົກເຂົ້່າໃຈ ແລະ ມີຄວາມສະໝານສາມັກຄີ ລະຫວ່າງຣາຊະດອນກັບກະສັດ ປະຊາຊົນກັບລັດ ຫຼື ປະຊາຊົນກັບປະຊາຊົນດ້ວຍກັນ ແລະ ເປັນໂອກາດທີ່ດີທີ່ໜຸ່ມສາວຈະໄດ້ພົບປະສ້າງສັນໄດ້ເຫັນສີໄມ້ລາຍມືຂອງນັກກິລາສີພາຍ ໄດ້ເຫັນຄວາມສາມັກຄີ ພ້ອມພຽງຂອງເຫຼົ່າໜຸ່ມສີພາຍສະແດງຄວາມສາມາດອອກສູ່ມວນຊົນໄດ້ຊື່ນຊົມ ໄດ້ເຊຍກັນຢ່າງເບີກບານມ່ວນຊື່ນທັງເປັນການສ້າງເງື່ອນໄຂໃຫ້ຊາວຄ້າຂາຍໄດ້ແລກປ່ຽນບົດຮຽນ ແລະ ຜົນຜະລິດ ຊຶ່ງກັນ ແລະ ກັນ ພາຍຫຼັງແຕ່ລະຄອບຄົວໄດ້ສຸມໃສ່ການຜະລິດ ໃນໄລຍະເຂົ້າພັນສາ 3 ເດືອນ.
 |
ສຳລັບຜົນແຂ່ງຂັນຊ່ວງເຮືອປະເພນີທີ່ທ່າວັດຈັນ ເມືອງຈັນທະບູລີ ນວ ປະຈໍາປີ 2025 ມີຄື: ເຮືອປະເພນີຊາຍ ຊະນະເລີດໄດ້ແກ່ທະນາຄານຮ່ວມພັດທະນາ JDB ໄດ້ຮັບຂັນລາງວັນເງິນສົດ 1 ໜ່ວຍ ເງິນສົດ 40 ລ້ານກີບ ພ້ອມໄດ້ຮັບຂັນໝູນວຽນທີ 2 ເຮືອບໍລິສັດພັນທະມິດກຣຸບ ແຂວງໄຊຍະບູລີໄດ້ຮັບຂັນລາງວັນເງິນສົດ 1 ໜ່ວຍ ພ້ອມເງິນສົດ 30 ລ້ານກີບ, ທີ 3 ເຮືອບໍລິສັດອີຊູຊູລາວຈໍາປາເຮືອຊ່ວງ ໄດ້ຮັບຂັນລາງວັນເງິນສົດ 1 ໜ່ວຍ ພ້ອມເງິນສົດ 25 ລ້ານກີບ ສໍາລັບເຮືອປະເພນີຍິງຊະນະເລີດ ໄດ້ແກ່ ເຮືອບໍລິສັດ 3B ໄດ້ຮັບຂັນລາງວັນເງິນສົດ 1 ໜ່ວຍ ພ້ອມເງິນສົດ 40 ລ້ານກີບ, ທີ 2 ເຮືອຕາວັນໃຕ້ຟ້າ ໄດ້ຮັບຂັນເງິນສົດ 1 ໜ່ວຍ ພ້ອມເງິນສົດ 30 ລ້ານກີບ ໃນນັ້ນເຮືອສູດຊາຍ 55 ສີພາຍ ທີ 1 ເຮືອບໍລິສັດແສງຈະເລີນຊັບໄຊກຣຸບ ແຟມິລີ ໄດ້ຮັບຂັນເງິນສົດ 1 ໜ່ວຍ ເງິນສົດ 40 ລ້ານກີບ, ທີ2 ບໍລິສັດພັນທະມິດກຣຸບ ແຂວງໄຊຍະບູລີ ໄດ້ຮັບຂັນລາງວັນເງິນສົດ 1 ໜ່ວຍ ພ້ອມເງິນສົດ 30 ລ້ານກີບ, ທີ 3 ເຮືອທະນາຄານຮ່ວມພັດທະນາ JDB ໄດ້ຮັບຂັນລາງວັນເງິນສົດ 1 ໜ່ວຍ ພ້ອມເງິນສົດ 25 ລ້ານກີບ ໃນນັ້ນຍັງມີລາງວັນເຮືອໄຟງາມລາງວັນເຊີ້ງງາມຕື່ມອີກ.
ຂ່າວ-ພາບ: ຍຸພິນທອງ
ຄໍາເຫັນ