ຂ່າວລະບຸວ່າ: ການປຶກສາຫາລືໃນກອງປະຊຸມ ຜູ້ຕາງໜ້າບັນດາກະຊວງໃຫ້ຮູ້ວ່າ, ຫວຽດນາມ ໄດ້ເລີ່ມເຂົ້າຮ່ວມບັນດາຂັ້ນຕອນທີ່ມີຄຸນຄ່າສູງຂອງຂະແໜງເຄິ່ງຊັກນຳໄຟຟ້າທົ່ວໂລກຄື: ຜະລິດວັດຖຸອຸປະກອນ, ວັດຖຸດິບ ແລະ ເຄື່ອງອາໄຫຼ່ເຄິ່ງຊັກນຳໄຟຟ້າ, ພ້ອມທັງມຸ່ງໄປເຖິງເປົ້າໝາຍຈະມີໂຮງງານຜະລິດຊິບແຫ່ງທຳອິດ ໂດຍກຸ່ມບໍລິສັດ ໂທລະຄົມມະນາຄົມກອງທັບ - Viettel ຮັບຜິດຊອບ.
ໃນກອງປະຊຸມ, ທ່ານ ຟ້າມມິນຈິງ ເນັ້ນໜັກວ່າ: ການພັດທະນາປັນຍາປະດິດ (AI) ບົນພື້ນຖານຂໍ້ມູນຂອງພູມປັນຍາຄົນຫວຽດນາມ ແມ່ນອີງໃສ່ຂະແໜງອຸດສາຫະກຳເຄິ່ງຊັກນຳໄຟຟ້າເປັນສ່ວນໃຫຍ່. ສະນັ້ນ, ບັນດາຜູ້ແທນຕ້ອງສຸມໃສ່ໄຈ້ແຍກ, ຕີລາຄາບັນດາບຸລິມະສິດຍຸດທະສາດ ເພື່ອຊຸກຍູ້ການພັດທະນາອຸດສາຫະກຳເຄິ່ງຊັກນຳໄຟຟ້າ, ໂດຍສະເພາະແມ່ນໃນການບຳລຸງສ້າງຊັບພະຍາກອນມະນຸດ, ການພັດທະນາພື້ນຖານໂຄງລ່າງ, ການດຶງດູດການລົງ ທຶນ… ພ້ອມກັນນັ້ນ, ກໍຕ້ອງສະເໜີຮູບແບບການຮ່ວມມືລະຫວ່າງພາກລັດ, ໂຮງຮຽນ, ວິສາຫະກິດ ໃນການພັດທະນາຂະແໜງເຄິ່ງຊັກນຳໄຟຟ້າ, ເພື່ອໃຫ້ຫວຽດນາມສາມາດບຸກທະລຸ, ບືນຕົວຂຶ້ນໃນຂະແໜງດັ່ງກ່າວໂດຍໄວ.ທ່ານເນັ້ນໜັກຕື່ມອີກວ່າ: ຊິບເຄື່ອງຊັກນຳໄຟຟ້າແມ່ນຕ່ອງໂສ້ສຳຄັນ ໃນການພັດທະນາການປະຕິວັດອຸດສາຫະກຳ 4.0, ພິເສດແມ່ນການຮັບໃຊ້ໃຫ້ແກ່ການພັດທະນາພື້ນຖານຂໍ້ມູນຂ່າວສານ ແລະ ປັນຍາປະດິດ (AI).
ທ່ານນາຍົກລັດຖະມົນຕີ ຊີ້ແຈ້ງວ່າ ຫວຽດນາມ ບໍ່ອາດຢືນຢູ່ນອກການປະຕິວັດ ຖ້າຢາກກໍ່ສ້າງພື້ນຖານເສດຖະກິດເປັນເອກະລາດ, ເປັນເຈົ້າຕົນເອງ. ທ່ານຮຽກຮ້ອງຕ້ອງສູ້ຊົນຢ່າງຊ້າສຸດແມ່ນປີ 2027 ສາມາດອອກແບບ, ປະດິດສ້າງ, ກວດກາ ແລະ ທົດລອງຊິບເຄິ່ງຊັກນຳໄຟຟ້າຈຳນວນໜຶ່ງ.
ເພື່ອປະຕິບັດສຳເລັດເປົ້າໝາຍນີ້, ທ່ານນາຍົກລັດຖະມົນຕີສະເໜີໃຫ້ພັດທະນາລະບົບນິເວດເຄິ່ງຊັກນຳໄຟຟ້າແບບກວມລວມ, ຮອບດ້ານ, ຄົບຊຸດ, ແທດຈິງ, ມີປະສິດທິຜົນ. ສ້າງກົນໄກ, ນະໂຍບາຍໃຫ້ສົມບູນແບບ, ພິເສດແມ່ນກົນໄກ, ນະໂຍບາຍບຸລິມະສິດ, ແກ້ໄຂບັນດາຈຸດອຸດຕັນກ່ຽວກັບພື້ນຖານໂຄງລ່າງ, ລະບອບລະບຽບການ. ນະໂຍບາຍບຸລິມະສິດຫັນປ່ຽນຈາກການດຶງດູດເງິນລົງທຶນມາເປັນນະໂຍບາຍໃຫ້ບຸລິມະສິດຖ່າຍທອດເຕັກໂນໂລຊີ.
ຄໍາເຫັນ