ຂ່າວລະບຸວ່າ: ໃນພິທີພົບປະທີ່ດຳເນີນພາຍຫຼັງພິທີຕ້ອນຮັບ, ທ່ານ ຟ້າມມິງຈິງ ໄດ້ຕີລາຄາສູງການເຂົ້າຮ່ວມຂອງບັນດາວິສາຫະກິດແຖວໜ້າ ແອັດສະປາຍ ທີ່ຕິດຕາມທ່ານ ເປໂດຣ ຊານເຊສ ໃນການຢ້ຽມຢາມ ຫວຽດນາມ ໃນຄັ້ງນີ້ ແລະ ເຊື່ອໝັ້ນວ່າ ບັນດາວິສາຫະກິດດັ່ງກ່າວຈະມີໂອກາດຊອກຮູ້, ສຶກສາຕະຫຼາດ ແລະ ພົບປະກັບບັນດາຄູ່ຮ່ວມມື ຫວຽດນາມ. ທ່ານ ຟ້າມມິງຈິງ ກ່າວວ່າ:ຫວຽດນາມ ຍາມໃດກໍຖືເປັນສຳຄັນ ແລະ ປາຖະໜາຢາກເພີ່ມທະວີການພົວພັນຮ່ວມມືຫຼາຍດ້ານກັບ ແອັດສະປາຍ. ພວກເຮົາໄດ້ມີການພົວພັນຄູ່ຮ່ວມມືຍຸດທະສາດໃນບັນດາປະເທດ ເອີຣົບ, ແອັດສະປາຍ ແມ່ນປະເທດທຳອິດທີ່ມີການພົວພັນຄູ່ຮ່ວມມືຍຸດທະສາດກັບ ຫວຽດນາມ, ແມ່ນເພື່ອນທີ່ໃຫ້ການສະໜັບສະໜູນ ແລະ ຊ່ວຍເຫຼືອດ້ວຍຄວາມຈິງໃຈ ໃນຂະບວນວິວັດແຫ່ງການປ່ຽນແປງໃໝ່ ແລະ ພັດທະນາປະເທດຊາດ. ຫວຽດນາມ ແລະ ແອັດສະປາຍ ມີຫຼາຍຈຸດທີ່ຄ້າຍຄືກັນ ເຊັ່ນ: ວັດທະນະທຳ, ທີ່ຕັ້ງຍຸດທະສາດ, ມູນເຊື້ອປະຫວັດສາດອັນສະຫງ່າອົງອາດ ຊຶ່ງແມ່ນພື້ນຖານສຳຄັນເພື່ອໃຫ້ສອງປະເທດສືບຕໍ່ຮ່ວມເດີນທາງ, ແບ່ງປັນ, ໜູນຊ່ວຍຊຶ່ງກັນ ແລະ ກັນ ໃນເສັ້ນທາງພັດທະນາ ແລະ ເປີດກວ້າງການຮ່ວມມືໃນອະນາຄົດ.
ທ່ານ ເປໂດຣ ຊານເຊສ ຢັ້ງຢືນວ່າ: ແອັດສະປາຍ ຍາມໃດກໍສະໜັບສະໜູນ ຫວຽດນາມ ໃນວິວັດແຫ່ງການພັດທະນາ ແລະ ສອງປະເທດ ອາດຈະມຸ່ງໄປເຖິງການພົວພັນຄູ່ຮ່ວມມືຍຸດທະສາດຮອບດ້ານ.
ພາຍຫຼັງການພົບປະ, ນາຍົກລັດຖະມົນຕີສອງທ່ານໄດ້ເປັນສັກຂີພິຍານພິທີລົງນາມໃນເອກະສານຮ່ວມມືຫຼາຍສະບັບ, ໃນນັ້ນ ມີບົດບັນທຶກຊ່ວຍຈຳກ່ຽວກັບການຮ່ວມມື ແລະ ປຶກສາຫາລືດ້ານການເມືອງລະຫວ່າງກະຊວງການຕ່າງປະເທດ ຫວຽດນາມ ແລະ ກະຊວງການຕ່າງປະເທດ, ສະຫະພາບເອີຣົບ ແລະ ການຮ່ວມມືແອັດສະປາຍ; ບົດບັນທຶກຊ່ວຍຈຳວ່າດ້ວຍການຮ່ວມມືດ້ານວັດທະນະທຳ ແລະ ກິລາ ລະຫວ່າງກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ກັບກະຊວງວັດທະນະທຳ, ການສອນວິຊາຊີບ ແລະ ກິລາ ແອັດສະປາຍ.
ຄໍາເຫັນ