ຫວຽດນາມ - ນູແວນເຊລັງ ອອກຖະແຫຼງການຮ່ວມການພົວພັນຮ່ວມມືຍຸດທະສາດ

ວິທະຍຸກະຈາຍສຽງຫວຽດນາມລາຍງານວ່າ: ເນື່ອງໃນໂອກາດການຢ້ຽມຢາມ ນູແວນເຊລັງ ຢ່າງເປັນທາງການ ຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໃນວັນທີ 9 – 11 ມີນາຜ່ານມາຕາມຄຳເຊີນຂອງທ່ານ ຄຣິສຕອບເຟີ ລູເຊິນ ນາຍົກລັດຖະມົນຕີ ນູແວນເຊລັງ, ຫວຽດນາມ ແລະ ນູແວນເຊລັງ ໄດ້ອອກຖະແຫຼງຂ່າວຮ່ວມ.
        ຂ່າວລະບຸວ່າ: ໃນການຖະແຫຼງຂ່າວ, ນາຍົກລັດຖະມົນຕີສອງທ່ານຢັ້ງຢືນຄືນໃໝ່ການພົວພັນມິດຕະພາບ ແລະ ຄູ່ຮ່ວມມືຍຸດທະສາດເລິກເຊິ່ງ, ໜັກແໜ້ນລະຫວ່າງ ຫວຽດນາມ ແລະ ນູແວນເຊລັງຊຶ່ງໄດ້ຮັບການປັບປຸງດ້ວຍການພົວພັນແລກປ່ຽນປະຊາຊົນຢ່າງແຂງແຮງ ແລະ ການຮ່ວມມືແໜ້ນແຟ້ນໃນບັນດາຂົງເຂດ ການເມືອງ - ການທູດ, ເສດຖະກິດ - ການຄ້າ - ການລົງທຶນ, ການສຶກສາ, ແຮງງານ, ວິທະຍາສາດ ແລະ ເຕັກໂນໂລຊີ. ນາຍົກລັດຖະມົນຕີສອງທ່ານໄດ້ປຶກສາຫາລືບັນດາໂອກາດເພີ່ມທະວີວົງເງິນການຄ້າສອງສົ້ນໂດຍໄວ, ມຸ່ງໄປເຖິງເປົ້າໝາຍ 3 ຕື້ໂດລາ ໃນປີ 2026 ຜ່ານການເພີ່ມທະວີບັນດາການເຄື່ອນໄຫວສົ່ງເສີມການຄ້າ, ປະຕິບັດບັນດາສັນຍາການຄ້າເສລີທີ່ມີຢູ່ແລ້ວ, ພ້ອມທັງຄົ້ນຄວ້າບັນດາມາດຕະການເພື່ອສ້າງເງື່ອນໄຂສະດວກໃຫ້ແກ່ການລົງທຶນສອງສົ້ນ.
        ນາຍົກລັດຖະມົນຕີສອງທ່ານໄດ້ຊົມເຊີຍແຜນການຮ່ວມມືຍຸດທະສາດກ່ຽວກັບການສຶກສາ ຫວຽດນາມ- ນູແວນເຊລັງໃນໄລຍະ 2023 – 2026, ສ້າງເງື່ອນໄຂໃຫ້ແກ່ການພົວພັນຮ່ວມມືລະຫວ່າງບັນດາຮາກຖານການບຳລຸງສ້າງຂັ້ນມະຫາວິທະຍາໄລລະຫວ່າງສອງປະເທດ, ຊ່ວຍເຫຼືອ ຫວຽດນາມ ປະຕິຮູບບັນດາຮູບແບບການສຶກສາຜ່ານບັນດາເຕັກໂນໂລຊີດີຈີຕອນ.