ທ່ານພົນເອກ ຟານວັນຢາງ ກ່າວຄຳເຫັນໃນກອງປະຊຸມຄົບຄະນະຄັ້ງທີ 1 ວ່າ: ໂລກພວມຜ່ານຜ່າການປ່ຽນແປງທີ່ມີລັກສະນະບາດລ້ຽວ, ສັບສົນ ແລະ ຍາກທີ່ຈະຄາດຄະເນໄດ້. ສັນຕິພາບ, ສະຖຽນລະພາບ ແມ່ນຄວາມຄາດຫວັງລວມຂອງປະຊາຄົມສາກົນ.

ຫວຽດນາມ ຍົກສູງ ແລະ ປາຖະໜາຢາກຊຸກຍູ້ລັດທິຫຼາຍຝ່າຍ ກໍໝາຍຄວາມວ່າ ຢາກສ້າງຄວາມເປັນລະບຽບຮຽບຮ້ອຍສາກົນໂດຍມີຄວາມຍຸຕິທຳ, ກວມລວມ ອີງໃສ່ກົດໝາຍ ແລະ ລະບອບລະບຽບສາກົນ. ເພື່ອໃຫ້ມີຄວາມເປັນລະບຽບຮຽບຮ້ອຍສາກົນຢ່າງຍຸຕິທຳ, ກວມລວມຄືແນວນັ້ນ ຕ້ອງມີສະຖຽນລະພາບຍຸດທະສາດ ຊຶ່ງຢູ່ທີ່ນັ້ນ, ສະພາບແວດລ້ອມແຫ່ງສັນຕິພາບໄດ້ຮັບການຮັບປະກັນ, ບັນດາປະເທດມີຄວາມສະເໝີພາບ, ເຄົາລົບຊຶ່ງກັນ ແລະ ກັນ, ຮ່ວມມືກັນເພື່ອຕ່າງຝ່າຍຕ່າງມີຜົນປະໂຫຍດ, ແກ້ໄຂບັນດາບັນຫາ ໂດຍຜ່ານການສົນທະນາ, ອີງໃສ່ການເຄົາລົບກົດໝາຍ ແລະ ລະບອບລະບຽບການສາກົນ, ກົດບັດສະຫະປະຊາຊາດ, ບັນດາຄຳໝັ້ນສັນຍາຢູ່ພາກພື້ນ.

ເພື່ອພ້ອມກັນປັບປຸງພື້ນຖານຄວາມເປັນລະບຽບຮຽບຮ້ອຍສາກົນ, ສ້າງຄວາມສະຖຽນລະພາບຍຸດທະສາດ, ທ່ານພົນເອກ ຟານວັນຢາງ ຢືນຢັນວ່າ: ຍາມໃດ ຫວຽດນາມ ກໍເຄົາລົບ ແລະ ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ; ພ້ອມກັນນັ້ນປາຖະໜາຢາກຍູ້ແຮງວິວັດການເຈລະຈາເຊັນກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ດ້ວຍປະສິດທິພາບ, ປະສິດທິຜົນທີ່ແທ້ຈິງ ແລະ ສາມາດເປັນໄປໄດ້. ໃນບັນຫາທະເລຕາເວັນອອກ, ຫວຽດນາມ ຢຶດໝັ້ນ ແກ້ໄຂບັນດາບັນຫາໂດຍສັນຕິວິທີ, ອີງໃສ່ການເຄົາລົບກົດໝາຍສາກົນ, ໃນນັ້ນມີ ສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ 1982 (UNCLOS 1982).