ຫວຽດນາມ ສະຫຼຸບວຽກງານຊົນເຜົ່າທົ່ວປະເທດ 

ວິທະຍຸກະຈາຍສຽງຫວຽດນາມລາຍງານວ່າ: ອັດຕາຄອບຄົວທຸກຍາກຫຼາຍຂອງ ຫວຽດນາມ ມາຮອດທ້າຍປີ 2023 ຍັງເຫຼືອພຽງ 2,9% (ຫຼຸດລົງ 1,1%); ອັດຕາຄອບຄົວທຸກຍາກຢູ່ບັນດາເມືອງທຸກຍາກຍັງເຫຼືອພຽງປະມານ 33% (ຫຼຸດລົງກວ່າ 5,6%); ອັດຕາຄອບຄົວທຸກຍາກຊາວເຜົ່າສ່ວນໜ້ອຍຍັງເຫຼືອ 17,8% (ຫຼຸດລົງ 3,2%), ບັນລຸຄາດ  ໝາຍທີ່ສະພາແຫ່ງຊາດ, ລັດຖະບານມອບໝາຍໃຫ້. ນີ້ແມ່ນຂໍ້ມູນຂ່າວທີ່ໄດ້ຍົກອອກມາໃນກອງປະຊຸມທາງໄກທົ່ວປະເທດສະຫຼຸບວຽກງານຊົນເຜົ່າປີ 2023, ຜັນຂະຫຍາຍໜ້າທີ່ປີ 2024 ຂອງກຳມາທິການຊົນເຜົ່າ, ທີ່ໄດ້ຈັດຂຶ້ນໃນວັນທີ 02 ມັງກອນ, ຢູ່ ຮ່າໂນ້ຍ.
        ຕາມບົດລາຍງານໃນກອງປະຊຸມ, ການປະຕິບັດວຽກງານຊົນເຜົ່າປີ 2023 ບັນລຸໄດ້ໝາກຜົນສຳຄັນຫຼາຍຢ່າງ, ພິເສດແມ່ນໃນການຜັນຂະຫຍາຍ ນະໂຍບາຍຊົນເຜົ່າ ເພື່ອປະກອບສ່ວນພັດທະນາເສດຖະກິດ - ສັງຄົມ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບເຂດຊົນເຜົ່າສ່ວນໜ້ອຍ, ເຂດພູດອຍເວົ້າສະເພາະ ແລະ ທົ່ວປະເທດເວົ້າລວມ.
        ກ່າວຄຳເຫັນຊີ້ນຳກອງປະຊຸມ, ທ່ານເຈິນລຶວກວາງຮອງນາຍົກລັດຖະມົນຕີ ຫວຽດນາມ ເນັ້ນໜັກວ່າ:ປີ 2024, ບັນດາກະຊວງ, ຂະແໜງການ, ທ້ອງຖິ່ນ ຕ້ອງເອົາໃຈໃສ່ຢ່າງຖືກຕ້ອງເຖິງວຽກງານຊົນເຜົ່າ ຊາວເຜົ່າສ່ວນໜ້ອຍ ແລະ ເຂດພູດອຍ. ພ້ອມທັງ, ຕ້ອງສືບຕໍ່ປະຕິບັດວຽກງານໂຄສະນາເພື່ອໃຫ້ທຸກຂັ້ນ, ທຸກຂະແໜງການ, ພໍ່ແມ່ປະຊາຊົນເຂດຊົນເຜົ່າສ່ວນໜ້ອຍ ແລະ ເຂດພູດອຍຮ່ວມແຮງຮ່ວມໃຈຜັນຂະຫຍາຍການປະຕິບັດບັນດານະໂຍບາຍໃຫ້ບັນລຸປະສິດທິຜົນຢ່າງສູງ.