ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 17 ມັງກອນ ຜ່ານມາ, ຕາມເວລາທ້ອງຖິ່ນ ຢູ່ ດາວອດສ ປະເທດ ສະວິດ, ໃນຂອບເຂດການປະຕິບັດງານເຂົ້າຮ່ວມເວທີປາໄສເສດຖະກິດໂລກ (WEF - Davos 2024), ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເປັນປະທານການໂອ້ລົມສົນທະນາ “ຫວຽດນາມ - ສະຖານທີ່ນັດພົບແຖວໜ້າ ອາຊຽນ ກ່ຽວກັບການລົງທຶນແບບຍືນຍົງ”
ຂ່າວລະບຸວ່າ: ໃນການໂອ້ລົມສົນທະນາ ທ່ານ ພາສຄາສ ເກີເກນ ປະທານກິດຕິມະສັກ ອົງການບັນດາການນຳວິສາຫະກິດໜຸ່ມທົ່ວໂລກ (YPO) ແລະ ບັນດາຜູ້ແທນໄດ້ສະແດງຄວາມປະທັບໃຈກ່ຽວກັບ ຫວຽດນາມ ບັນລຸໄດ້ ໝາກຜົນທີ່ໜ້າປະທັບໃຈໃນການພັດທະນາເສດຖະກິດ - ສັງຄົມ ໃນສະພາບການໂລກທີ່ປະສົບກັບຄວາມຫຍຸ້ງຍາກຫຼາຍຢ່າງໃນປີ 2023, ດ້ວຍຍອດຜະລິດຕະພັນພາຍໃນປະເທດ (GDP) ເພີ່ມຂຶ້ນ 5,05%; ໄພເງິນເຟີ້ໄດ້ຮັບການຄວບຄຸມ, ການດຶງດູດເງິນລົງທຶນໂດຍກົງຈາກຕ່າງປະເທດ ບັນລຸລະດັບສູງ.
ໃນການໂອ້ລົມສົນທະນາ, ທ່ານ ຟ້າມມິງຈິງ ໄດ້ແບ່ງປັນບາງປັດໄຈທີ່ມີລັກສະນະພື້ນຖານເພື່ອໃຫ້ ຫວຽດນາມ ກາຍເປັນສະຖານທີ່ລົງທຶນທີ່ປອດໄພ, ປອດໃສ, ຍືນຍົງ. ທ່ານໄດ້ເນັ້ນໜັກເຖິງ ຫວຽດນາມ ໄດ້ມີການພົວພັນທາງການທູດ ກັບ 190 ປະເທດ, ໃນນັ້ນມີການພົວພັນຄູ່ຮ່ວມມືຍຸດທະສາດຢ່າງຮອບດ້ານ ຫຼື ຄູ່ຮ່ວມມືຍຸດທະສາດກັບ 5 ປະເທດກຳມະການຖາວອນສະພາຄວາມໝັ້ນຄົງ ສປຊ ແລະ ຫຼາຍປະເທດຂຶ້ນກັບກຸ່ມບັນດາພື້ນຖານເສດຖະກິດພັດທະນາ ແລະ ຫາກໍພົ້ນເດັ່ນຂຶ້ນແຖວໜ້າໂລກ (G20); ເຊັນສັນຍາການຄ້າເສລີ (FTA) 16 ສະບັບ ກັບ 60 ປະເທດ. ທ່ານຖືວ່າ: ນີ້ແມ່ນການຮັບປະກັນຄຳໝັ້ນສັນຍາຂອງ ຫວຽດນາມ ໃນການເປີດປະຕູ ແລະ ເຊື່ອມໂຍງເຂົ້າກັບເສດຖະກິດສາກົນ.
ຄໍາເຫັນ