ຫວຽດນາມເປັນອັນດັບທີ 2 ຢູ່ອາຊີ - ປາຊີຟິກ ໃນການດຶງດູດນັກລົງທຶນອະສັງຫາລິມະຊັບ

ຂ່າວສານຫວຽດນາມລາຍງານວ່າ: ບໍລິສັດໃຫ້ບໍລິການ ແລະ ການລົງທຶນດ້ານອະສັງຫາລິມະຊັບອາເມຣິກາ (CBRE) ຫາກໍປະກາດຜົນການສຳຫຼວດຄວາມເຊື່ອໝັ້ນ ແລະແຜນການຂອງນັກລົງທຶນ ຢູ່ໃນພາກພື້ນອາຊີ-ປາຊີຟິກໃນປີ 2024.
ຂ່າວລະບຸວ່າ: ຕາມການສຳຫຼວດ, ຫວຽດນາມ ແມ່ນຕະຫຼາດອະສັງຫາລິມະຊັບທີ່ດຶງດູດບັນດານັກລົງທຶນ ເປັນອັນດັບທີ 2ຢູ່ອາຊີ - ປາຊີຟິກ ໃນປີ 2024, ຖັດຈາກຕະຫຼາດອິນເດຍແລະນຳໜ້າໄທ.ຖືວ່າເປັນສັນຍານທີ່ດີ, ສະແດງໃຫ້ເຫັນຄວາມສາມາດບົ່ມຊ້ອນດ້ານເສດຖະກິດທີ່ພວມພັດທະນາຢ່າງຕັ້ງໜ້າຂອງຫວຽດນາມ ກໍຄືທ່າອ່ຽງຂອງຊາວຕ່າງປະເທດທີ່ຕ້ອງການຊື້ເຮືອນຢູ່ຫວຽດນາມ ນັບມື້ນັບເພີ່ມຂື້ນ.CBRE ຢູ່ຫວຽດນາມ ໃຫ້ຮູ້ວ່າ:ປັດຈຸບັນ, ແຫຼ່ງທຶນລົງທຶນເຂົ້າຫວຽດນາມ ສ່ວນຫຼາຍແມ່ນມາຈາກບັນດານັກລົງທຶນອາຊີທີ່ຄຸ້ນເຄີຍເຊັ່ນ: ສິງກະໂປ, ຍີ່ປຸ່ນ, ຮົງກົງ (ຈີນ), ສ ເກົາຫຼີ. ນອກຈາກນັ້ນ, ບັນດານັກການເງິນ-ລົງທຶນສ່ວນບຸກຄົນຈຳນວນຫຼາຍ ກໍເລີ່ມເອົາໃຈໃສ່ເຖິງຕະຫຼາດອະສັງຫາລິມະຊັບຫວຽດນາມ. ຕາມໂຕເລກສະຖິຕິຂອງກະຊວງກໍ່ສ້າງ ຫວຽດນາມ ໃຫ້ຮູ້ວ່າ:ໃນອະນາຄົດຈະມີຜູ້ຕ້ອງການຊື້ເຮືອນຢູ່ ຫວຽດນາມ ປະມານ 4 ລ້ານຄົນ, ໃນນັ້ນມີຊາວຕ່າງປະເທດ ແລະ ຊາວຫວຽດນາມຢູ່ຕ່າງປະເທດ.
ປີ 2024 ຕະຫຼາດອະສັງຫາລິມະຊັບຂອງຫວຽດນາມ ຈະຂະຫຍາຍຕົວຢ່າງຕັ້ງໜ້າ ດ້ວຍການເພີ່ມຂຶ້ນຢ່າງແຂງແຮງຂອງນັກລົງທຶນທັງພາຍໃນ ແລະ ຕ່າງປະເທດ. ຄວາມຕ້ອງການສູງ ແລະ ຄວາມສາມາດບົ່ມຊ້ອນດ້ານການພັດທະນາທີ່ພົ້ນເດັ່ນ ເຮັດໃຫ້ຕະຫຼາດອະສັງຫາລິມະຊັບຫວຽດນາມ ເປັນຈຸດລົງທຶນທີ່ໜ້າສົນໃຈສຳລັບກະແສເງິນສົດ.
ຕາມຜົນການສໍາຫຼວດຂອງ Statista (ຊຶ່ງເປັນແພັລຟອມອອນລາຍຂອງ ເຢຍລະມັນ ທີ່ມີຄວາມຊ່ຽວຊານໃນການເກັບກໍາຂໍ້ມູນສະຖິຕິ ແລະ ການສະແດງຂໍ້ມູນ)ໄດ້ໃຫ້ຮູ້ວ່າ:ຕະຫຼາດອະສັງຫາລິມະຊັບຫວຽດນາມ ມີມູນຄ່າ 4,41 ຕື້ໂດລາໃນປີ 2024. ໃນປີດຽວກັນ, ຕະຫຼາດອະສັງຫາລິມະຊັບໄທມີມູນຄ່າ 2,51 ຕື້ໂດລາ.