ລັດຖະມົນຕີເສດຖະກິດຂອງອິນໂດເນເຊຍ ກ່າວວ່າ: ບໍລິສັດນໍ້າມັນຂອງລັດ ແລະ ບໍລິສັດກະສິກໍາ ຂອງປະເທດໄດ້ລົງນາມໃນຂໍ້ຕົກລົງເພື່ອຊຸກຍູ້ການຊື້ພະລັງງານ ແລະ ຜະລິດຕະພັນກະສິກໍາ ຂອງສະຫະລັດ ອາເມຣິກາ, ຂະນະທີ່ກຳລັງວາງແຜນເພື່ອຫຼີກລ່ຽງອັດຕາພາສີນຳເຂົ້າ 32% ຂອງ ທ່ານ ໂດໂນ ທຣໍາ.
ທ່ານ ທຣໍາ ໄດ້ກ່າວວ່າ: ການເກັບພາສີນຳເຂົ້າຈາກອິນໂດເນເຊຍ ໃນອັດຕາ 32% ນອກເໜືອຈາກພາສີພື້ນຖານ 10% ຖ້າຫາກບໍ່ສາມາດບັນລຸຂໍ້ຕົກລົງການຄ້າສະບັບໃໝ່ພາຍໃນວັນທີ 1 ສິງຫານີ້.
ທ່ານ ແອລັງກາ ຮາຕາຣໂຕ ລັດຖະມົນຕີເສດຖະກິດອິນໂດເນເຊຍ ຊຶ່ງເດີນທາງໄປນະຄອນຫຼວງວໍຊິງຕັນ ດີຊີ ເພື່ອເຈລະຈາການຄ້າ ກ່າວວ່າ: ບໍລິສັດນໍ້າມັນຂອງລັດ ໄດ້ລົງນາມໃນບົດບັນທຶກຄວາມເຂົ້າໃຈທີ່ສັນຍາວ່າຈະຊື້ຜະລິດຕະພັນພະລັງງານ ຈາກສະຫະລັດ ອາເມຣິກາ ເພີ່ມຂຶ້ນ, ໂດຍບໍ່ໄດ້ໃຫ້ລາຍລະອຽດເພີ່ມເຕີມ. ດ້ານບໍລິສັດກະສິກໍາ Sorini Agro Asia Corporindo ຊຶ່ງເປັນສະມາຊິກຂອງສະມາຄົມໂຮງສີສາລີອິນໂດເນເຊຍ ແລະ FKS Group ຍັງໄດ້ລົງນາມໃນບົດບັນທຶກຄວາມເຂົ້າໃຈເພື່ອເພີ່ມການຊື້-ຂາຍສິນຄ້າດັ່ງກ່າວດ້ວຍ.
ສະຖານທູດອິນໂດເນເຊຍປະຈຳ ນະຄອນຫຼວງວໍຊິງຕັນ ດີຊີ ກ່າວວ່າ: ຂໍ້ຕົກລົງດັ່ງກ່າວໄດ້ບັນລຸໃນລະຫວ່າງກອງປະຊຸມຢູ່ນະຄອນຫຼວງວໍຊິງຕັນ ດີຊີ ໃນວັນທີ 8 ກໍລະກົດ ຜ່ານມາ.
ກອງປະຊຸມດັ່ງກ່າວໄດ້ເຮັດໃຫ້ມີສັນຍາການຄ້າຫຼາຍສະບັບ, ໂດຍສະແດງໃຫ້ເຫັນວ່າການລົງນາມໃນບົດບັນທຶກຄວາມເຂົ້າໃຈຫຼາຍສະບັບ ຊຶ່ງຊ່ວຍເປີດໂອກາດໃຫ້ແກ່ການຮ່ວມມືໃໝ່ໆ ແລະ ເພີ່ມທະວີການພົວພັນດ້ານເສດຖະກິດລະຫວ່າງສອງປະເທດ.
ບໍລິສັດອາຫານ ຂອງ ສະຫະລັດ ອາເມຣິກາ ເຊັ່ນ: Cargill ຢືນຢັນໃນຖະແຫຼງການວ່າຂໍ້ຕົກລົງດັ່ງກ່າວລວມມີບົດບັນທຶກຄວາມເຂົ້າໃຈສໍາລັບການຊື້ສາລີ.
ຂໍ້ມູນຈາກຫ້ອງການຜູ້ຕາງໜ້າການຄ້າ ສະຫະລັດ ອາເມລິກາ ສະແດງໃຫ້ເຫັນວ່າ: ການຂາດດຸນການຄ້າຂອງ ສະຫະລັດ ອາເມລິກາ ກັບອິນໂດເນເຊຍແມ່ນ 17.9 ຕື້ໂດລາ ໃນປີ 2024, ເພີ່ມຂຶ້ນ 5.4% ເມື່ອທຽບໃສ່ປີກາຍ.
ຄໍາເຫັນ