 |
ສະຫາຍ ເພັດ ພົມພິພັກ ກ່າວວ່າ: ກອງປະຊຸມຄັ້ງນີ້, ເພື່ອກະກຽມຄວາມພ້ອມຮອບດ້ານໂດຍສະເພາະພະນັກງານຂອງຫ້ອງວ່າການສູນກາງພັກ ທີ່ຈະລົງໄປຊ່ວຍຊຸກຍູ້ການກະກຽມເນື້ອໃນເອກະສານກອງປະຊຸມໃຫຍ່ ອົງຄະນະພັກກະຊວງ, ອົງການ ແລະ ທ້ອງຖິ່ນ ໃຫ້ກໍາແໜ້ນເນື້ອໃນຈິດໃຈຄໍາເຫັນຊີ້ນໍາຂອງຂັ້ນເທິງ ໂດຍສະເພາະຄໍາສັ່ງວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ເລກທີ 411/ຄລສພ, ລົງວັນທີ 8 ສິງຫາ 2023 ຂອງຄະນະເລຂາທິການສູນກາງພັກ, ບົດແນະນໍາ ກ່ຽວກັບການກະກຽມເນື້ອໃນຮ່າງລາຍງານການເມືອງ ຂອງອົງຄະນະພັກແຕ່ລະຂັ້ນ ເລກທີ 05/ຫສພ, ລົງວັນທີ 31 ຕຸລາ 2023 ຂອງຫ້ອງວ່າການສູນກາງພັກວາງອອກໃຫ້ເລິກເຊິ່ງ, ເພື່ອສ້າງຄວາມເຂົ້າໃຈ ແລະ ຄວາມເປັນເອກະພາບຕໍ່ພາລະບົດບາດ, ສິດ, ໜ້າທີ່ຄວາມຮັບຜິດຊອບຂອງຫ້ອງວ່າການສູນພັກກາງພັກ ກໍຄືຄະນະຮັບຜິດຊອບທີ່ຈະລົງຊ່ວຍຊຸກຍູ້ການກະກຽມເນື້ອໃນເອກະສານກອງປະຊຸມໃຫຍ່ອົງຄະນະພັກກະຊວງ, ອົງການ ແລະ ທ້ອງຖິ່ນ ໃຫ້ໄປຖືກທິດ ແລະ ລວງດຽວກັນ, ເພື່ອຍົກສູງຄຸນນະພາບໃນການປະຕິບັດໜ້າທີ່ຂອງຄະນະຮັບຜິດຊອບທີ່ຈະລົງຊ່ວຍຊຸກຍູ້ການກະກຽມເນື້ອໃນກອງປະຊຸມໃຫຍ່ອົງຄະນະພັກບັນດາກະຊວງ, ອົງການ ແລະ ທ້ອງຖິ່ນ ໃຫ້ມີປະສິດທິພາບ ແລະ ປະສິດທິຜົນ ຕາມລະດັບຄາດໝາຍ ຂອງຂັ້ນເທິງ.
ສະຫາຍ ເພັດ ພົມພິພັກ ຍັງໄດ້ກ່າວຕື່ມວ່າ: ປັດຈຸບັນທົ່ວພັກ, ທົ່ວລັດ ທົ່ວສັງຄົມ ກໍາລັງສຸມໃສ່ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃນໄລຍະທ້າຍສະໄໝ ແລະ ການສະ ເຫຼີມສະຫຼອງ 3 ວັນປະຫວັດສາດ, ໃນນັ້ນບັນດາກະຊວງ, ອົງການ ແລະ ທ້ອງຖິ່ນ ພວມອອກແຮງແຂ່ງຂັນຈັດຕັ້ງປະຕິບັດມະຕິກອງປະຊຸມໃຫຍ່ໄລຍະທ້າຍສະໄໝ ແລະ ກະກຽມກອງປະຊຸມໃຫຍ່ຂອງຕົນຂຶ້ນໃນມໍ່ໆນີ້ ໂດຍສະເພາະມີບາງກະຊວງ, ອົງການ ແລະ ທ້ອງຖິ່ນ ມີແຜນຈະດໍາເນີນກອງປະຊຸມໃຫຍ່ໃນລະຫວ່າງເດືອນສິງຫາ ຫາ ທ້າຍປີ 2025 ນີ້ (ຍົກເວັ້ນບາງອົງການຂອງພັກ ແລະ ອົງການຈັດຕັ້ງມະຫາຊົນ ທີ່ຈະເປີດຫຼັງກອງປະຊຸມໃຫຍ່ ຄັ້ງທີ XII ຂອງພັກ). ສະນັ້ນ, ຫ້ອງວ່າການສູນກາງພັກ ພວກເຮົາໃນຖານະທີ່ເປັນອົງການເສນາທິການ ຊ່ວຍໃນການກະກຽມເນື້ອໃນກອງປະຊຸມໃຫຍ່ 3 ຂັ້ນ ໂດຍສະເພາະການຮ່າງລາຍງານການເມືອງຂອງອົງຄະນະພັກແຕ່ລະຂັ້ນ ຊຶ່ງພວກເຮົາ ກໍໄດ້ເປັນເຈົ້າການໃນຮ່າງບົດແນະນໍາເລກທີ 05/ຫສພ ຂຶ້ນມາ ເພື່ອແນະນໍາ ແລະ ສ້າງຄວາມຮັບຮູ້ເຂົ້າໃຈເປັນເອກະພາບ ຕໍ່ບັນຫາຈໍານວນໜຶ່ງ ກ່ຽວກັບໂຄງສ້າງ ແລະ ເນື້ອໃນຮ່າງລາຍງານການເມືອງ, ນອກນັ້ນ ກໍຍັງມີເອກະສານປິ່ນອ້ອມຈໍານວນໜຶ່ງ ເປັນຕົ້ນແຜນດໍາເນີນງານ, ມະຕິ ແລະ ເອກະສານອື່ນໆ ທີ່ເຮົາອາດຈະໄດ້ເບິ່ງຊ່ວຍ ໂດຍອີງໃສ່ຄວາມຮຽກຮ້ອງຕ້ອງການຕົວຈິງ ຂອງອົງຄະນະພັກແຕ່ລະບ່ອນ.
ກອງປະຊຸມໃນຄັ້ງນີ້ໄດ້ຜ່ານຫົວຂໍ້ກ່ຽວກັບການຮ່າງລາຍງານການເມືອງ ຈາກນັ້ນບັນດາຜູ້ເຂົ້າຮ່ວມກອງປະຊຸມປະກອບຄໍາເຫັນໃສຮ່າງບົດລານງານການເມືອງດັ່ງກ່າວເພື່ອໃຫ້ບັນລຸໄດ້ຕາມລະດັບຄາດໝາຍທີ່ກຳນົດໄວ້.
(ຂ່າວ-ພາບ: ສຳນານ)
ຄໍາເຫັນ