ກຳປູເຈຍ ດຶງດູດການລົງທຶນຫຼາຍກວ່າ 1,3 ພັນລ້ານໂດລາ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ສະພາເພື່ອການພັດທະນາແຫ່ງກຳປູເຈຍໄດ້ເປີດເຜີຍບົດລາຍງານໂດຍລະບຸວ່າ: ກຳປູເຈຍໄດ້ອະນຸມັດໂຄງການລົງທຶນໃນຊັບສິນຖາວອນໃນໄລຍະເດືອນມັງກອນ-ກຸມພາ ມູນຄ່າປະມານ1,39 ພັນລ້ານໂດລາ ຊຶ່ງເພີ່ມຂຶ້ນ500% ເມື່ອທຽບກັບໄລຍະເວລາດຽວກັນຂອງປີຜ່ານມາ.
    ບົດລາຍງານລະບຸວ່າ: ການລົງທຶນໃນຊັບສິນຖາວອນດັ່ງກ່າວປະມານ 545 ລ້ານໂດລາ ຫຼື 39%ຂອງເງິນທຶນທັງໝົດມາຈາກຈີນ ຂະນະທີ່ໂຄງການທີ່ໂດດເດັ່ນໄດ້ແກ່ ໂຮງງານຜະລິິດອຸປະກອນເອເລັກໂຕຣນິກ, ໂຮງງານປະກອບລົດຖີບ ແລະ ລົດຖີບໄຟຟ້າ, ໂຮງງານເຫຼັກ, ໂຮງງານເສື້ອຜ້າ ແລະ ຕ່ຳແຜ່ນ, ໂຮງງານແປຮູບໝາກໄມ້, ໂຮງແຮມ ແລະ ອື່ນໆ. ທ່ານ ເພັນ ໂສວິຊິດ ໂຄສົກກະຊວງການຄ້າຂອງກຳປູເຈຍກ່າວວ່າ: ຂໍ້ຕົກລົງຫຸ້ນສ່ວນທາງດ້ານເສດຖະກິດລະດັບພາກພື້ນ (RCEP), ຂໍ້ຕົກລົງການຄ້າເສລີກຳປູເຈຍ-ຈີນ (CCFTA) ແລະ ກົດໝາຍສະບັບໃໝ່ວ່າດ້ວຍການລົງທຶນຂອງກຳປູເຈຍຖືວ່າເປັນປັດໄຈສຳຄັນໃນການດຶງດູດນັກລົງທຶນຕ່າງປະເທດມາສູ່ກຳປູເຈຍຫຼາຍຂຶ້ນ.
    ທ່ານ ໂສວິຊິດ ກ່າວຕື່ມວ່າ: ຂໍ້ຕົກລົງທັງໝົດຂອງRCEP ແລະ CCFTA ປຽບເໝືອນແມ່ເຫຼັກດຶງດູດນັກລົງທຶນຕ່າງປະເທດມາສູ່ກຳປູເຈຍ ໂດຍການລົງທຶນໂດຍກົງຈາກຕ່າງປະເທດໂດຍສະເພາະຈາກຈີນ ຊ່ວຍກະຕຸ້ນການຂະຫຍາຍຕົວທາງດ້ານເສດຖະກິດ ແລະ ການຄ້າຂອງກຳປູເຈຍນຳມາຊຶ່ງເງິນທຶນເຕັກໂນໂລຊີ ແລະ ໂອກາດໃນການເຮັດວຽກ.