 |
ທ່ານ ລໍາທອງ ຍົນມະຫາໄຊ ຫົວໜ້າຫ້ອງການສົ່ງເສີມ ແລະ ຄຸ້ມຄອງການລົງທຶນແຂວງເຊກອງ ໄດ້ລາຍງານຕໍ່ກອງປະຊຸມເວທີເສວະນາ ກ່ຽວກັບການສ້າງເເລວທາງເສດຖະກິດ ລາວ-ຈີນ ໃນຍຸກໃໝ່ໄປພ້ອມກັບການສ້າງຄູ່ຮ່ວມມືພັດທະນາ ຈັດຂຶ້ນໃນວັນທີ 18 ກັນຍາຜ່ານມາ, ເນື່ອງໃນໂອກາດ ທີ່ແຂວງເຊກອງ ໄດ້ຕາງໜ້າໃຫ້ ສປປ ລາວ ເປັນເມືອງແຫ່ງສະເໜ່ ໃນງານວາງສະແດງສິນຄ້າ ຈີນ-ອາຊຽນ ຄັ້ງທີ 23 ປະຈໍາປີ 2026 ທີ່ນະຄອນໜານໜິງ ສປ ຈີນ ເພື່ອເປັນການດຶງດູດການຄ້າ-ການລົງທຶນ, ການທ່ອງທ່ຽວ ແລະ ການແລກປ່ຽນທາງດ້ານວັດທະນະທຳຂອງລາວ ສູ່ເວທີພາກພື້ນ ແລະ ສາກົນ.
ທ່ານ ລໍາທອງ ຍົນມະຫາໄຊ ກ່າວວ່າ: ແຂວງເຊກອງເປັນແຂວງທີ່ມີທ່າແຮງ ແລະ ມີຊັບພະຍາກອນທໍາມະຊາດທີ່ຫຼາກຫຼາຍ, ໂດຍສະເພາະ ແຮ່ທາດ, ພະລັງງານໄຟຟ້າ, ກະສິກໍາ, ພືດເສດຖະກິດ, ການລ້ຽງສັດ, ການແປຮູບ ແລະ ການຜະລິດສິນຄ້າ. ດ້ວຍທ່າແຮງດັ່ງກ່າວ, ແຂວງມີເປົ້າໝາຍພັດທະນາທ່າແຮງພື້ນຖານທີ່ສໍາຄັນ ເພື່ອພັດທະນາໃຫ້ເປັນສູນກາງດ້ານອຸດສາຫະກໍາແຮ່ທາດໃນອະນາຄົດ ແລະ ສ້າງໂອກາດໃໝ່ໃນການພັດທະນາ.
ພ້ອມນີ້, ແຂວງໄດ້ເອົາໃຈໃສ່ປັບປຸງກົນໄກ ແລະ ຂັ້ນຕອນອໍານວຍຄວາມສະດວກດ້ານການລົງທຶນ, ໂດຍສຸມໃສ່ການໃຫ້ຂໍ້ມູນແກ່ນັກລົງທຶນ, ຊີ້ແຈງຂັ້ນຕອນ ແລະ ອໍານວຍການອະນຸມັດໂຄງການໃຫ້ມີຄວາມສະດວກ ແລະ ວ່ອງໄວ ເພື່ອສ້າງສະພາບແວດລ້ອມທີ່ເໝາະສົມ ໃນການດຶງດູດນັກລົງທຶນໃໝ່ ຄວບຄູ່ກັບການນໍາໃຊ້ຊັບພະຍາກອນໃຫ້ເກີດມູນຄ່າເພີ່ມ ແນໃສ່ການສ້າງຖານການຜະລິດ, ເພີ່ມໂອກາດທາງການຄ້າ-ການລົງທຶນ ແລະ ສ້າງແຮງຂັບເຄື່ອນໃໝ່ໃຫ້ແກ່ການຂະຫຍາຍຕົວດ້ານເສດຖະກິດ-ສັງຄົມຂອງແຂວງ.
ທ່ານ ລໍາທອງ ຍົນມະຫາໄຊ ໃຫ້ຮູ້ຕື່ມວ່າ: ປັດຈຸບັນ, ທົ່ວແຂວງເຊກອງ ມີໂຄງການລົງທຶນ ຂອງພາກເອກະຊົນທັງໝົດ 141 ໂຄງການ ລວມມູນຄ່າ 10,268 ລ້ານໂດລາ (ໂຄງການລົງທຶນຈາກ ສປ ຈີນ 7 ໂຄງການ, ມູນຄ່າ 25 ລ້ານໂດລາ) ໂດຍຂະແໜງທີ່ມີການລົງທຶນຫຼາຍກວ່າໝູ່ແມ່ນຂະແໜງພະລັງງານ 54 ໂຄງການ, ມູນຄ່າ 8,272 ລ້ານໂດລາ, ຂະແໜງບໍ່ແຮ່ 30 ໂຄງການ, ມູນຄ່າ 1,045 ລ້ານໂດລາ, ຂະແໜງກະສິກຳ 43 ໂຄງການ, ມູນຄ່າ 915 ລ້ານໂດລາ, ຂະແໜງທ່ອງທ່ຽວ ແລະ ບໍລິການ 14 ໂຄງການ, ມູນຄ່າ 35 ລ້ານໂດລາ.
ຂ່າວ: ສັນຍາ
ຄໍາເຫັນ