ກະຊວງດັ່ງກ່າວລະບຸວ່າ: ອັດຕາສ່ວນໜີ້ສິນສາທາລະນະຕໍ່ GDP ມີທ່າອ່ຽງທີ່ຈະເພີ່ມຂຶ້ນເປັນ 121.7% ໃນປີ 2027 ຊຶ່ງສູງກວ່າສອງເທົ່າຂອງເພດານທີ່ສະຫະພາບເອີຣົບຕັ້ງໄວ້ບໍ່ເກີນ 60%.
ໜັງສືພິມລາຍວັນ Le Figaro ຂອງຝຣັ່ງ, ລາຍງານໂດຍອ້າງອີງຂໍ້ມູນຈາກສະຖາບັນສະຖິຕິ ແລະ ເສດຖະສາດແຫ່ງຊາດຝຣັ່ງ (INSEE) ວ່າ, ລະດັບໜີ້ສິນສາທາລະນະດັ່ງກ່າວແມ່ນສູງທີ່ສຸດນັບຕັ້ງແຕ່ປີ 1995 ເປັນຕົ້ນມາ.
ກະຊວງດັ່ງກ່າວໄດ້ເປີດເຜີຍກັບສື່ມວນຊົນທ້ອງຖິ່ນວ່າ: ການເພີ່ມຂຶ້ນຂອງໜີ້ສິນແມ່ນເປັນໄປຕາມກົນໄກທາງໂຕເລກ ຊຶ່ງເປັນຜົນສະທ້ອນຈາກການຂາດດຸນງົບປະມານທີ່ຍັງສູງຢ່າງຕໍ່ເນື່ອງ. ໂດຍໜັງສືພິມ Le Figaro ລະບຸຕື່ມວ່າ, ລັດຖະບານຝຣັ່ງຄາດຄະເນວ່າການຂາດດຸນງົບປະມານຈະບັນລຸ 5.4% ຂອງ GDP ໃນປີ 2026 ຊຶ່ງເພີ່ມຂຶ້ນຈາກ 5.1% ໃນປີ 2025.
ຫວ່າງມໍ່ໆມານີ້, ທ່ານ ຣາແລນ ເລສຄອດ ລັດຖະມົນຕີກະຊວງເສດຖະກິດ ແລະ ການເງິນຂອງຝຣັ່ງ ໄດ້ເປີດເຜີຍວ່າ: ລັດຖະບານໄດ້ຫຼຸດການຄາດຄະເນການເຕີບໂຕທາງເສດຖະກິດສຳລັບປີ 2026 ລົງເປັນ 0.5% ຈາກການຄາດຄະເນກ່ອນໜ້ານີ້ທີ່ 0.7%. ທ່ານກ່າວວ່າ: ເປົ້າໝາຍໃນການຮັກສາການຂາດດຸນງົບປະມານໃຫ້ຕໍ່າກວ່າ 5% ຂອງ GDP ພາຍໃນປີ 2026 ນັ້ນ ແມ່ນບໍ່ສາມາດບັນລຸໄດ້ອີກຕໍ່ໄປ, ທ່ານກ່າວຕື່ມວ່າ: ຝຣັ່ງຈະປະເຊີນກັບການຂາດດຸນງົບປະມານເກີນ 5% ໃນປີ 2026.
ຄໍາເຫັນ