ແລະ ມີປະສິດທິຜົນຈາກບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆຂອງ ລາວ-ຫວຽດນາມຈຶ່ງເຮັດໃຫ້ການຮ່ວມມື ດ້ານເສດຖະກິດ-ການລົງທຶນ ການເງິນ,ທະນາຄານຂອງສອງປະເທດ ລາວ-ຫວຽດນາມນັບມື້ດີຂຶ້ນ.
ສະເພາະດ້ານການລົງທຶນໃນ ປີ 2024 ຜ່ານມາ,ລາວ-ຫວຽດນາມ ໄດ້ບັນລຸໝາກຜົນຢ່າງຕັ້ງໜ້າ,ມີບາງໂຄງການຂະຫຍາຍຕົວຂຶ້ນເຊັ່ນ: ໂຄງການໄຟຟ້າ ພະລັງງານລົມ ເຈືອງເຊີນ, ໂຄງການພະລັງງານລົມ ສະຫວັນ 1, ຊຶ່ງເປັນກໍາລັງແຮງໃນການຊຸກຍູ້ບັນດາໂຄງການອື່ນໆ ເຂົ້າມາລົງທຶນຢູ່ລາວ.
ມາຮອດປັດຈຸບັນ,ວິສາຫະກິດຫວຽດນາມມາລົງທຶນຢູ່ລາວ ມີທັງໝົດ 260 ໂຄງການ, ມູນຄ່າທຶນຈົດທະບຽນທັງໝົດ 5.54 ຕື້ໂດລາ; ທຶນນໍາມາຈັດຕັ້ງປະຕິບັດໂຄງການຄິດໄລ່ມາຮອດປັດຈຸບັນ ບັນລຸປະມານ 2.8 ຕື້ໂດລາ ຊຶ່ງໃນນັ້ນ, ຫຼາຍໂຄງການລົງທຶນຂອງວິສາຫະກິດຫວຽດນາມ ຢູ່ລາວ ເຄື່ອນໄຫວຢ່າງມີປະສິດທິຜົນ,ທປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ເພີ່ມລາຍຮັບ ໃຫ້ແກ່ແຮງງານຫຼາຍພັນຄົນ,ສ້າງແຫຼ່ງລາຍຮັບໃຫ້ແກ່ງົບປະມານແຫ່ງລັດຂອງລາວ,ເປັນຕົ້ນແມ່ນຂົງເຂດໂທລະຄົມ, ທະນາຄານ,ປູກຝັງ ແລະ ປຸງແຕ່ງຢາງພາລາ,ຜະລິດ-ປຸງແຕ່ງທັນຍາຫານ,ສະບຽງອາຫານ,ນົມ ແລະ ອື່ນໆ.
ສໍາລັບການຮ່ວມມືດ້ານການຄ້າສອງຝ່າຍລາວ-ຫວຽດນາມ ໃນປີ 2024 ບັນລຸໄດ້ໝາກຜົນຢ່າງຕັ້ງໜ້າສືບຕໍ່ກາຍເປັນ ຈຸດພົ້ນເດັ່ນໃນການພົວພັນຮ່ວມມືສອງປະເທດ.ສະເພາະມູນຄ່າການຄ້າສອງຝ່າຍ ໃນ 10 ເດືອນຕົ້ນປີ 2024 ສາມາດບັນລຸທຽບເທົ່າ 1.7 ຕື້ໂດລາເພີ່ມຂຶ້ນ 25.5% ທຽບໃສ່ໄລຍະດຽວກັນປີ 2023, ໃນນັ້ນ ມູນຄ່າລາວນໍາເຂົ້າສິນຄ້າຈາກຫວຽດນາມ ບັນລຸ 492 ລ້ານໂດລາ,ເພີ່ມຂຶ້ນ 24% ທຽບໃສ່ໄລຍະດຽວກັນປີ 2023; ມູນຄ່າສົ່ງອອກສິນຄ້າຈາກລາວໄປຫວຽດນາມ ບັນລຸ 1 ຕື້ໂດລາ ເພີ່ມຂຶ້ນ 26.2% ທຽບໃສ່ໄລຍະດຽວກັນປີ 2023.ສອງຝ່າຍລົງນາມສັນຍາການຄ້າ ລາວ-ຫວຽດນາມ ສະບັບໃໝ່ໃນເດືອນເມສາ2024, ສືບຕໍ່ສ້າງກອບນິຕິກໍາບຸລິມະສິດການຄ້າສະເພາະ ໃຫ້ແກ່ສິນຄ້ານໍາເຂົ້າ-ສົ່ງອອກ ຂອງສອງປະເທດ. ກະຊວງອຸດສາຫະກໍາ ແລະ ການຄ້າລາວ ແລະ ກະຊວງອຸດສາຫະກໍາ ແລະ ການຄ້າ ຫວຽດນາມ ໄດ້ສໍາເລັດການລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຕ້ານການຄ້າຂາຍເຖື່ອນ ແລະ ລົບໜີພາສີ-ອາກອນຜ່ານດ່ານຊາຍແດນ ລະຫວ່າງ ລາວ-ຫວຽດນາມ ໃນເດືອນເມສາ 2024 ຢູ່ນະຄອນຫຼວງວຽງຈັນ, ສປປ ລາວ.
ສ່ວນການຮ່ວມມືດ້ານອຸດສາຫະກໍາ, ພະລັງງານ-ບໍ່ແຮ່ ສອງຝ່າຍ ໄດ້ສືບຕໍ່ຈັດຕັ້ງຜັນຂະຫຍາຍຢ່າງມີປະສິດທິຜົນ ສ້າງບົດບັນທຶກຄວາມເຂົ້າໃຈ ລະຫວ່າງ ລັດຖະບານລາວ ແລະ ລັດຖະບານຫວຽດນາມ ວ່າດ້ວຍການຮ່ວມມືພັດທະນາ ບັນດາເຂື່ອນໄຟຟ້າຢູ່ລາວ,ການເຊື່ອມຕໍ່ລະບົບໄຟຟ້າ ແລະ ການຊື້-ຂາຍໄຟ ລະຫວ່າງ ສອງປະເທດ ທີ່ໄດ້ລົງນາມໃນເດືອນຕຸລາ 2016; ສັນຍາຮ່ວມມືພັດທະນາບັນດາໂຄງການພະລັງງານ,ໄຟຟ້າ ແລະ ບໍ່ແຮ່ ລະຫວ່າງ ລັດຖະບານລາວ ແລະ ລັດຖະບານຫວຽດນາມ ທີ່ໄດ້ເຊັນໃນເດືອນກຸມພາ 2019.ດ້ານການຄ້າຖ່ານຫີນ, ສອງຝ່າຍ ໄດ້ເຫັນດີເປັນເອກະພາບແກ້ໄຂບັນຫາຫຍຸ້ງຍາກຕໍ່ການຄ້າຖ່ານຫີນ. ພິຈາລະນາລົງທຶນປັບປຸງ ແລະ ຍົກລະດັບເສັ້ນທາງຂົນສົ່ງຖ່ານຫີນຫາດ່ານຊາຍແດນ; ສອງຝ່າຍ ສ້າງເງື່ອນໄຂ ໃຫ້ວິສາຫະກິດ,ກຸ່ມບໍລິສັດຂອງສອງຝ່າຍ ຮ່ວມມືກັນສ້າງສາຍພານຂົນສົ່ງຖ່ານຫີນ ຜ່ານດ່ານຊາຍແດນ ແນໃສ່ຫຼຸດຜ່ອນຄ່າໃຊ້ຈ່າຍ ແລະ ເວລາການຂົນສົ່ງຖ່ານຫີນ.
ການຮ່ວມມືດ້ານການຄ້າໄຟຟ້າ, ຝ່າຍຫວຽດນາມ ໄດ້ຮັບຮອງຂອບລາຄາໄຟຟ້າ ໄລຍະນັບແຕ່ວັນທີ 31 ທັນວາ 2025 ຫາວັນທີ 31 ທັນວາ 2030. ເພື່ອສ້າງເງື່ອນໄຂສະດວກ ໃຫ້ແກ່ວິສາຫະກິດ ລະຫວ່າງ ສອງປະເທດ ຜັນຂະຫຍາຍການຮ່ວມມື ໃນການຊື້-ຂາຍຖ່ານຫີນ ແລະ ໄຟຟ້າ, ສອງຝ່າຍ ພວມຮ່ວມກັນຄົ້ນຄວ້າສ້າງເນື້ອໃນ, ປຶກສາຫາລືຄວາມເປັນໄປໄດ້ໃນການລົງນາມສັນຍາ ລະຫວ່າງລັດຖະບານລາວ ແລະ ລັດຖະບານຫວຽດນາມ ກ່ຽວກັບການຊື້-ຂາຍ ຖ່ານຫີນ ແລະ ໄຟຟ້າ.ຕໍ່ກັບການຮ່ວມມືດ້ານການຂົນສົ່ງ ແລະ ກໍ່ສ້າງສອງຝ່າຍ ໄດ້ປະສານສົມທົບສຶກສາຄົ້ນຄວ້າ ແລະ ຊຸກຍູ້ຊອກຫາແຫຼ່ງທຶນ ມາຜັນຂະຫຍາຍບັນດາໂຄງການຈຸດສຸມ ລວມມີ: ເສັ້ນທາງດ່ວນເຊື່ອມຕໍ່ ວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ທ່າແຂກ-ເຕີນເອີບ-ຫວຸ້ງອ່າງ ແລະ ບັນດາໂຄງການເຊື່ອມຕໍ່ຄົມມະນາຄົມທີ່ສໍາຄັນອື່ນໆ... ຊຸກຍູ້ການຈັດຕັ້ງຜັນຂະຫຍາຍສັນຍາ,ອະນຸສັນຍາ ແລະ ອະນຸສັນຍາດັດແກ້ເພີ່ມເຕີມບາງມາດຕາຂອງອະນຸສັນຍາ ລະຫວ່າງ ລັດຖະບານ ແຫ່ງ ສປປ ລາວ ແລະ ສສ ຫວຽດນາມ ວ່າດ້ວຍການຮ່ວມມືລົງທຶນພັດທະນາ ທ່າທຽບເຮືອ 1, 2 ແລະ 3 ຂອງທ່າເຮືອຫວຸ້ງອ່າງ.
ການຮ່ວມມືດ້ານການເງິນ-ທະນາຄານ ກະຊວງການເງິນຂອງສອງປະເທດ ໄດ້ດໍາເນີນການຜັນຂະຫຍາຍວຽກງານຮ່ວມມືຕາມບົດບັນທຶກການຮ່ວມມືໄລຍະ 2021-2025, ການເຄື່ອນໄຫວວຽກງານຮ່ວມມືທີ່ຈັດຕັ້ງປະຕິບັດໃນປີ 2024 ໄດ້ປະກອບສ່ວນເພີ່ມຄວາມເຂັ້ມແຂງດ້ານລະບຽບການ ແລະ ນະໂຍບາຍໃນວຽກງານການຄຸ້ມຄອງການເງິນພາກລັດ;ບໍາລຸງຍົກສູງຄວາມອາດສາມາດໃຫ້ແກ່ພະນັກງານຂະແໜງການເງິນ.ທະນາຄານກາງຂອງສອງປະເທດ ໄດ້ສືບຕໍ່ຈັດຕັ້ງຜັນຂະຫຍາຍບົດບັນທຶກຊ່ວຍຈໍາ (MOU) ທີ່ໄດ້ລົງນາມຮ່ວມກັນ ໂດຍສະເພາະແມ່ນ MOU ວ່າດ້ວຍດ້ວຍການຊຸກຍູ້ສົ່ງເສີມການນໍາໃຊ້ສະກຸນເງິນທ້ອງຖິ່ນກີບ-ດົງ ແລະ MOU ຮ່ວມມືດ້ານນະວັດຕະກໍາທາງການເງິນ ແລະ ລະບົບຊໍາລະ ລວມທັງການປະຕິບັດແຜນການຊ່ວຍເຫຼືອໃຫ້ຄໍາແນະນໍາດ້ານນະໂຍບາຍ,ການແລກປ່ຽນພົບປະການນໍາຂັ້ນສູງ, ແລກປ່ຽນບົດຮຽນ ແລະ ປະສົບການດ້ານເຕັກນິກຢູ່ລາວ ແລະ ຫວຽດນາມ.
ການຮ່ວມມືດ້ານກະສິກໍາ,ປ່າໄມ້ ແລະ ພັດທະນາຊົນນະບົດ ສອງຝ່າຍໄດ້ແລກປ່ຽນຄະນະຜູ້ແທນຂັ້ນສູງ,ຊ່ຽວຊານ ວິຊາການເຕັກນິກຢ່າງເປັນປົກກະຕິ ແນໃສ່ເພີ່ມທະວີການຮ່ວມມື ແລະ ແລກປ່ຽນບົດຮຽນໃນຂົງເຂດກະສິກໍາ, ປ່າໄມ້, ຊົນລະປະທານ,ສົ່ງເສີມກະສິກໍາ,ຄວາມປອດໄພທາງດ້ານສະບຽງອາຫານ ແລະ ຊອກຫາຄູ່ຮ່ວມມືລົງທຶນເຂົ້າມາລາວ. ຝ່າຍຫວຽດນາມ ໄດ້ໃຫ້ການສະໜັບສະໜູນຝ່າຍລາວໃນການຈັດຕັ້ງຜັນຂະຫຍາຍໂຄງການແບ່ງເຂດກະສິກໍາ.ໃນນັ້ນ, ໃຫ້ການສະໜັບສະໜູນສ້າງຕົວແບບການຜະລິດກະສິກໍາ ຢູ່ແຂວງໄຊສົມບູນ;ປັບປຸງບັນດາເອກະສານທີ່ກ່ຽວຂ້ອງ ຂອງໂຄງການກໍ່ສ້າງສູນບໍລິການເຕັກນິກກະສິກໍາ ແຂວງໄຊສົມບູນ ເພື່ອສະເໜີສອງລັດຖະບານ ພິຈາລະນາອະນຸມັດຈັດຕັ້ງຜັນຂະຫຍາຍ; ປີ 2024, ຫວຽດນາມ ຝຶກອົບຮົມຍົກລະດັບຄວາມອາດສາມາດໃຫ້ພະນັກງານສູນບໍລິການເຕັກນິກກະສິກໍາຂອງ 3 ແຂວງ ຈໍານວນ 15 ທ່ານ: ແຂວງຫົວພັນ, ຊຽງຂວາງ ແລະ ແຂວງໄຊສົມບູນ ຢູ່ມະຫາວິທະຍາໄລປ່າໄມ້,ນະຄອນຫຼວງຮ່າໂນ້ຍ;ສອງຝ່າຍ ໄດ້ຮ່ວມກັນຈັດຕັ້ງຜັນຂະຫຍາຍບັນດາໂຄງການຊົນລະປະທານ ທີ່ລັດຖະບານຫວຽດນາມ ຊ່ວຍສ້າງຢ່າງມີປະສິດທິຜົນ ແລະ ສໍາເລັດຜົນຄື: ໂຄງການກໍ່ສ້າງລະບົບຊົນລະປະທານ ຂະໜາດນ້ອຍ 4 ແຫ່ງ ຢູ່ແຂວງໄຊສົມບູນ;ກໍ່ສ້າງສໍາເລັດບໍລິມາດວຽກ ໂຄງການກໍ່ສ້າງລະບົບຊົນລະປະທານເມືອງໜອງບົກ, ແຂວງຄໍາມ່ວນ ຕາມສັນຍາ ແລະ ກໍາລັງລາຍງານຂໍການອະນຸມັດດ້ານຫຼັກການ ຈາກສອງລັດຖະບານ ກ່ຽວກັບບັນດາວຽກເພີ່ມເຕີມ ເພື່ອສືບຕໍ່ຈັດຕັ້ງປະຕິບັດໂຄງການ (ໂຄງການອໍານາດການປົກຄອງແຂວງຮ່າຕິ້ງ ເປັນເຈົ້າຂອງໂຄງການ ສົມທົບກັບ ແຂວງຄໍາມ່ວນ); ວຽກງານປ່າໄມ້,ສອງຝ່າຍ ໄດ້ເພີ່ມທະວີການຮ່ວມມືດ້ານວິຊາການ.ໄດ້ສໍາເລັດການລົງນາມບົດບັນທຶກຄວາມເຂົ້າໃຈຮ່ວມມື ໃນວຽກງານປ່າໄມ້ (ຂັ້ນກະຊວງ) ຂອງສອງປະເທດ.ແລກປ່ຽນບົດຮຽນ, ປະສົບການໃນວຽກງານປ່າໄມ້ ແລະ ປົກປັກຮັກສາປ່າ,ໃນປີ 2024 ຝ່າຍຫວຽດນາມ ໄດ້ຕ້ອນຮັບຄະນະວິຊາການ ຝ່າຍລາວ 2 ຄະນະ ທີ່ໄປແລກປ່ຽນບົດຮຽນ ແລະ ປະສົບການ ກ່ຽວກັບການຈ່າຍຄ່າບໍລິການສິ່ງແວດລ້ອມປ່າໄມ້ ແລະ ການອອກໃບຢັ້ງຢືນການມອບທີ່ດິນ ແລະ ປ່າໄມ້.
ຕໍ່ກັບການປະມົງ,ສອງຝ່າຍ ໄດ້ສໍາເລັດຮຽບຮຽງເນື້ອໃນ ແລະ ຂັ້ນຕອນເອກະສານພາຍໃນຂອງແຕ່ລະປະເທດ ທີ່ລະບຸໃນບົດບັນທຶກຄວາມເຂົ້າໃຈ ກ່ຽວກັບການຮ່ວມມືດ້ານການປະມົງ (ຂັ້ນກົມ) ລະຫວ່າງ ລາວ- ຫວຽດນາມ; ຄາດວ່າຈະລົງນາມບົດບັນທຶກສະບັບດັ່ງກ່າວໃນມໍ່ໆນີ້.
ໃນດ້ານການລ້ຽງສັດ ແລະ ສັດຕະວະແພດ, ສອງຝ່າຍ ໄດ້ແລກປ່ຽນຂໍ້ມູນຂ່າວສານຢ່າງເປັນປະຈໍາ ກ່ຽວກັບສະພາບພະຍາດສັດ, ມາດຕະການຄວບຄຸມພະຍາດ ແລະ ຄຸ້ມຄອງການເຄື່ອນຍ້າຍສັດ ແລະ ຜະລິດຕະພັນສັດ ລະຫວ່າງ ສອງປະເທດ ແລະ ພວມດໍາເນີນການປຶກສາຫາລື ແລະ ຂໍຄໍາເຫັນຈາກແຕ່ລະຝ່າຍ ກ່ຽວກັບຄວາມເປັນໄປໄດ້ ໃນການສ້າງຕັ້ງສູນຮ່ວມມືດ້ານກະສິກໍາ-ປ່າໄມ້ ລາວ-ຫວຽດນາມ.
ຄໍາເຫັນ