 |
ໂອກາດນີ້, ທ່ານ ບຸນຫຼາຍ ບຸດທິ ໄດ້ລາຍງານການນໍາພາ-ຊີ້ນຳຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ ປີ 2025 ໂດຍແຂວງເຊກອງ ໄດ້ເພີ່ມທະວີຄວາມຮັບຜິດຊອບວຽກງານປ້ອງກັນຊາດ-ປ້ອງກັນຄວາມສະຫງົບ ຢ່າງເປັນລະບົບຕໍ່ເນື່ອງ ເຮັດໃຫ້ສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດ-ສັງຄົມສືບຕໍ່ຂະຫຍາຍຕົວຕາມທ່າອ່ຽງຂອງເສດຖະກິດແຫ່ງຊາດ.ໃນນັ້ນ, ຂົງເຂດວຽກງານກະສິກຳ-ປ່າໄມ້, ອຸດສະຫະກຳ, ຫັດຖະກຳ ສາມາດເພິ່ງຕົນເອງໄດ້ດີ ຊຶ່ງລວມຍອດຜະລິດຕະພັນພາຍໃນ ຄາດຄະເນຈະບັນລຸໄດ້ 6,2% ຂຶ້ນໄປ, ການເກັບລາຍຮັບເຂົ້າງົບປະມານ ລວມທັງໝົດ 345.03 ຕື້ກີບ,ທຽບໃສ່ແຜນການປີ ປະຕິບັດໄດ້ 55.92%, ຄຽງຄູ່ກັນນີ້ ການປະຕິບັດລາຍຈ່າຍ ໄດ້ 447.36 ຕື້ກີບ, ເທົ່າກັບ 69.79%.ນອກນັ້ນ, ຍັງໄດ້ເອົາໃຈໃສ່ປັບປຸງລະບົບການປົກຄອງ ນັບແຕ່ຂັ້ນແຂວງ, ຂັ້ນເມືອງ, ບ້ານ ມີຄວາມເຂັ້ມແຂງດີຂຶ້ນ, ເອົາໃຈໃສ່ຕໍ່ການຮຽນ-ການສອນແບບໃໝ່ທີ່ຮັບປະກັນຫຼັກມູນການສຶກສາ ແລະແກ້ໄຂບັນຫາການປະລະການຮຽນຂອງເດັກໃນເກນອາຍຸເຂົ້າຮຽນຊັ້ນຕ່າງໆ, ພ້ອມນີ້ ກໍໄດ້ເອົາໃຈໃສ່ສືບຕໍ່ເສີມສ້າງສາຍພົວພັນຮ່ວມມືກັບບັນດາເມືອງ,ແຂວງຂອງປະເທດທີ່ມີຊາຍແດນຕິດຈອດ ໂດຍສະເພາະ ສສ ຫວຽດນາມ, ພ້ອມນີ້ ການຈັດຕັ້ງປະຕິບັດວຽກງານກວດກາພັກ, ອົງການກວດກາລັດ ກໍໄດ້ເພີ່ມທະວີການຕິດຕາມ, ກວດກາ, ຕີລາຄາການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ເປັນຕົ້ນແມ່ນ ກວດກາສະມາຊິກພັກ ແລະ ການຈັດຕັ້ງພັກ ຕິດພັນກັບການຈັດຕັ້ງດໍາເນີນຊີວິດການເມືອງພາຍໃນຄະນະພັກ, ຖືເອົາວຽກງານຕິດຕາມ-ກວດກາ ເປັນການປ້ອງກັນ ແລະ ສະກັດກັ້ນສິ່ງຫຍໍ້ທໍ້ຕ່າງໆໃນກົງຈັກການຈັດຕັ້ງ ແລະ ຖັນແຖວສະມາຊິກພັກ-ພະນັກງານ ຊຶ່ງໃນໄລຍະປີ 2025 ນີ້, ແມ່ນໄດ້ສຸມໃສ່ການດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍປະຕິບັດຕາມກົດລະບຽບຂອງພັກ, ຕາມຄໍາສັ່ງ, ຄໍາແນະນໍາ ຢ່າງເຄັ່ງຄັດ ແລະ ເຮັດໃຫ້ການດຳເນີນກອງປະຊຸມໃຫຍ່ ຄັ້ງທີ Xl ຂອງອົງຄະນະພັກແຂວງເຊກອງ ລວມທັງການປັບປຸງລະບົບການຈັດຕັ້ງ ໄດ້ຮັບຜົນສຳເລັດຕາມລະດັບຄາດໝາຍ.
 |
ທ່ານ ຄໍາພັນ ພົມມະທັດ ໄດ້ເນັ້ນໃຫ້ພະນັກງານຫຼັກແຫຼ່ງຂອງແຂວງເຊກອງເອົາໃຈໃສ່ຈັດຕັ້ງປະຕິບັດວຽກງານກວດກາພັກ, ກວດກາລັດ ໃຫ້ມີຄວາມເຂັ້ມແຂງຂຶ້ນກວ່າເກົ່າ ເປັນຕົ້ນ: ຕ້ອງເອົາໃຈໃສ່ຍົກລະດັບການສຶກສາອົບຮົມ ໃຫ້ແກ່ຖັນແຖວສະມາຊິກພັກ, ພະນັກງານ ຄຽງຄູ່ກັບການຫັນເປັນທັນສະໄໝ, ຫັນເປັນດິຈີຕ໋ອນ, ເປັນເປົ້າໝາຍ, ເປັນທິດທາງໃນການພັດທະນາວຽກງານ, ເອົາໃຈໃສ່ປະສານສົມທົບ ກັບຄະນະກວດກາໃນແຕ່ລະຂັ້ນ ນັບແຕ່ສູນກາງ ລົງຮອດທ້ອງຖິ່ນ ເພື່ອຊອກໃຫ້ເຫັນເຖິງການຫັນປ່ຽນ ແລະເຫັນໄດ້ຈຸດອ່ອນ, ຂໍ້ຄົງຄ້າງ ເພື່ອຖອດຖອນບົດຮຽນໃນການແກ້ໄຂບັນຫາຕ່າງໆ ທີ່ກົດໜ່ວງຖ່ວງດຶງການຈັດຕັ້ງປະຕິບັດໜ້າທີ່ວຽກງານ ເຮັດໃຫ້ວຽກງານກວດກາໄດ້ຫັນປ່ຽນຢ່າງຕັ້ງໜ້າ,ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ Xl ຂອງອົງຄະນະພັກແຂວງ ໃຫ້ລົງສູ່ຮາກຖານທ້ອງຖິ່ນຢ່າງກວ້າງຂວາງ ເພື່ອຊຸກຍູ້ທົ່ວສັງຄົມ ປະກອບສ່ວນປະຕິບັດ ໃຫ້ບັນລຸຕາມຄາດໝາຍ; ເອົາໃຈໃສ່ປັບປຸງ ແລະ ສ້າງພື້ນຖານໂຄງລ່າງ ໂດຍສະເພາະ ລະບົບເສັ້ນທາງຄົມມະນາຄົມຂົນສົ່ງ ເພື່ອອຳນວຍຄວາມສະດວກໃຫ້ແກ່ໂດຍສານ ແລະ ຂົນສົ່ງສິນຄ້າ ວ່ອງໄວ ສະດວກສະບາຍຂຶ້ນ.
(ຂ່າວ: ອັດສະວິນ)
ຄໍາເຫັນ