ການຂະຫຍາຍຕົວຂອງວຽກລ້ຽງສັດ ແລະ ການປະມົງ ຢູ່ແຂວງໄຊຍະບູລີ

 ມີການຂະຫຍາຍຕົວ 0,21% ທຽບໃສ່ແຜນການປີກໍຄືມະຕິສະພາແມ່ນ 7% ສາມາດປະຕິບັດໄດ້ພຽງ 3% ສາມາດຕອບສະໜອງທາດຊີ້ນໄດ້ຢ່າງພຽງພໍກັບຄວາມຕ້ອງການ.

ລ້ຽງສັດຂອງປະຊາຊົນໃນໄລຍະ 6 ເດືອນຕົ້ນປີ 2024 ຝູງສັດລ້ຽງໃນໄລຍະຕົ້ນປີມີການຂະຫຍາຍຕົວ, ມີສັດລ້ຽງທັງໝົດ 5.411.946 ໂຕ; ໃນນັ້ນ, ມີຄວາຍ 84.699 ໂຕ, ທຽບໃສ່ຝູງສັດ 6 ເດືອນຕົ້ນປີຜ່ານມາຫຼຸດລົງ 3.300 ໂຕ, ທຽບໃສ່ແຜນການປີ (3.650ໂຕ) ຍັງບໍ່ມີການຂະຫຍາຍຕົວ, ທຽບໃສ່ປີຜ່ານມາຝູງສັດລ້ຽງຫຼຸດລົງ 6.543ໂຕ; ງົວ 332.676 ໂຕ, ທຽບໃສ່ຝຸງສັດ 6 ເດືອນຕົ້ນປີຜ່ານມາເພີ່ມຂຶ້ນ 4.667 ໂຕ, ທຽບໃສແຜນການປີ (27.989 ໂຕ) ຍັງບໍ່ມີການຂະຫຍາຍຕົວ, ທຽບໃສ່ປີຜ່ານມາຝູງສັດລ້ຽງຫຼຸດລົງ 17.191 ໂຕ; ໝູ 190.228 ໂຕ, ທຽບໃສ່ຝູງສັດ 6 ເດືອນຕົ້ນປີຜ່ານມາເພີ່ມຂຶ້ນ 171 ໂຕ, ທຽບໃສ່ແຜນການປີ (11.941ໂຕ) ຍັງບໍ່ມີການຂະຫຍາຍຕົວ, ທຽບໃສ່ປີຜ່ານມາຝູງສັດລ້ຽງຫຼຸດລົງ 8.785 ໂຕ; ແບ້ 40.651 ໂຕ, ທຽບໃສ່ຝູງສັດ 6 ເດືອນຕົ້ນປີຜ່ານມາເພີ່ມຂຶ້ນ 4.381 ໂຕ, ທຽບໃສ່ປີຜ່ານມາເຫັນວ່າຫຼຸດລົງ 401 ໂຕ; ສັດປີກ 4.665.400 ໂຕ, ທຽບໃສຝຸງສັດ 6 ເດືອນຕົ້ນປີເພີ່ມຂຶ້ນ 226.703 ໂຕ, ທຽບໃສ່ປີຜ່ານມາເຫັນວ່າຫຼຸດລົງ 328.012 ໂຕ; ຊ້າງ 171 ໂຕ, ມ້າ 34 ໂຕ, ໝາ 97.801 ໂຕ, ແກະ 66 ໂຕ.

ຜ່ານການຈັດຕັ້ງປະຕິບັດເຫັນວ່າການລ້ຽງສັດກໍໄດ້ມີການຂະຫຍາຍຕົວ ແລະ ໄດ້ຫັນຈາກການລ້ຽງແບບທໍາມະຊາດກະແຈກກະຈາຍມາລ້ຽງແບບເປັນກຸ່ມ, ເປັນຟາມຕິດພັນກັບການປູກຫຍ້າອາຫານສັດ ແລະ ຕາໜ່າງສັດຕະວະແພດ. ນອກນັ້ນ, ການລ້ຽງປາໃນໜອງກໍມີການຂະຫຍາຍຕົວຢ່າງແຜ່ຫຼາຍໃນຂອບເຂດທົ່ວແຂວງ. ດັ່ງນັ້ນ, ຈຶ່ງເຮັດໃຫ້ການຜະລິດທາດຊີ້ນສາມາດຕອບສະໜອງໄດ້ຢ່າງພຽງພໍກັບຄວາມຕ້ອງການ, ສາມາດຕອບສະໜອງການບໍລິໂພກສະເລ່ຍໃສ່ຫົວຄົນໜຶ່ງໃຫ້ໄດ້ 24,12 ກິໂລ/ຄົນ/6 ເດືອນທຽບໃສ່ແຜນປີ 2024 (55 ກິໂລ/ຄົນ/ປີ) ປະຕິບັດໄດ້ເທົ່າກັບ 43,85% ຊຶ່ງສະແດງອອກໃນການບໍລິໂພກທາດຊີ້ນ, ປາ ແລະ ໄຂ່ໄດ້ທັງໝົດ 10.455,90 ໂຕນ; ໃນນັ້ນ,ການບໍລິໂພກຊີ້ນ 4.635,67 ໂຕນ, ປາ 2.076,65 ໂຕນ (ປາລ້ຽງ 783,20 ໂຕນ, ປາດຸກ 489,50 ໂຕນ, ປາກະຊັງ444,15 ໂຕນ ແລະ ປາທໍາມະຊາດ 359,79 ໂຕນ), ອາຫານຈາກທໍາມະຊາດເຊັ່ນ: ກຸ້ງ, ຫອຍ, ປູ ແລະ ອື່ນໆ 2.182,73 ໂຕນ, ໄຂ່ໄດ້ 1.536,92 ໂຕນ, ຈາກການນໍາເຂົ້າ 13,93 ໂຕນ.

ໄລຍະ 6 ເດືອນທ້າຍປີນີ້, ແຂວງຈະສູ້ຊົນໃຫ້ໄດ້ມີການບໍລິໂພກຊີ້ນ, ໄຂ່, ປາ ໃຫ້ໄດ້ 23.816 ໂຕນ, ສະເລ່ຍ 55 ກິໂລ/ຄົນ/ປີ ຂຶ້ນໄປ ແລະ ສູ້ຊົນໃຫ້ຝູງສັດລ້ຽງຂະຫຍາຍຕົວ ສະເລ່ຍ 7% ຂອງຝູງສັດ; ໃນນີ້, ງົວໃຫ້ໄດ້ 8% ຂອງຝູງສັດ ເທົ່າກັບ 17.989 ໂຕ, ຄວາຍໃຫ້ໄດ້ 4% ຂອງຝູງສັດ ເທົ່າກັບ 3.650 ໂຕ, ໝູໃຫ້ໄດ້ 6% ຂອງຝູງສັດ ເທົ່າກັບ 11.941 ໂຕ, ແບ້ໃຫ້ໄດ້ 11,5% ຂອງຝູງສັດ ເທົ່າກັບ 4.721 ໂຕ, ສັດປີກໃຫ້ໄດ້ 5,5% ຂອງຝູງສັດ ເທົ່າກັບ 274.683 ໂຕ.

ນັ້ນແມ່ນສະພາບຂອງວຽກລ້ຽງສັດ ແລະ ການປະມົງຢູ່ແຂວງໄຊຍະບູລີ ໃນໄລຍະ 6 ເດືອນຕົ້ນປີ 2024 ໃນແຜນງານຄໍ້າປະກັນທາງດ້ານສະບຽງອາຫານ ແລະ ໂພຊະນາການ ທີ່ແມ່ນບາງຜົນງານໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງ ເຂົ້າໃນແຜນການປີຂອງຂະແໜງກະສິກຳ ແລະ ປ່າໄມ້ແຂວງໄຊຍະບູລີ ທີ່ໄດ້ຜ່ານການຈັດຕັ້ງປະຕິບັດຕົວຈິງ ທີ່ມີປະຊາຊົນຂອງແຂວງ ມີສ່ວນຮ່ວມໃນຈັດຕັ້ງການປະຕິບັດ.