ການລ້ຽງສັດເປັນຟາມ ໜຶ່ງໃນທ່າແຮງຫຼັກຂອງແຂວງເຊກອງ

ທ່ານ ປອ ຄຳໄລ ປັນຍາຄູນ ອາດີດຮອງເຈົ້າເມືອງລະມາມ ແຂວງເຊກອງ ຜູ້ຊີ້ນໍາຂົງເຂດເສດຖະກິດ ປະທານທີ່ປຶກສາກຸ່ມບໍລິສັດ ສອນ ກໍ່ສ້າງຄົບວົງຈອນ ຈຳກັດຜູ້ດຽວ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 27 ສິງຫານີ້ ທີ່ແຂວງເຊກອງ ກ່ຽວກັບຕົວແບບການລ້ຽງສັດເປັນຟາມ ແລະ ການດໍາເນີນທຸລະກິດຂອງກຸ່ມບໍລິສັດ ສອນ ກໍ່ສ້າງຄົບວົງຈອນ ຈຳກັດຜູ້ດຽວ ຊຶ່ງເປັນຕົວແບບໃນການລ້ຽງສັດເປັນຟາມ.

ທ່ານ ປອ ຄຳໄລ ປັນຍາຄູນ ໄດ້ເລົ່າຄືນຄວາມເປັນມາການສ້າງຕັ້ງນັບແຕ່ຍົກຍ້າຍລົງມາຢູ່ເມືອງລະມາມໃນປີ 1996; ນັບແຕ່ປີ 1997 ຫາ 2007 ປະກອບອາຊີບຕໍ່າສິ້ນຊົນເຜົ່າກຣຽງ, ຕົ້ມເຫຼົ້າຂາວ, ຂາຍເຄື່ອງຍ່ອຍ, ຊື້-ຂາຍເຂົ້າສານສົ່ງໃຫ້ພະແນກການແຂວງ-ເມືອງ; ນັບແຕ່ປີ 2008-2021 ໄດ້ຂາຍເຄື່ອງກໍ່ສ້າງ ແລະ ໄດ້ສ້າງຕັ້ງບໍລິສັດກໍ່ສ້າງເຄຫາສະຖານ, ບໍລິສັດກໍ່ສ້າງຂົວທາງ, ບໍລິສັດຊົນລະປະທານ, ບໍລິສັດສໍາຫຼວດອອກແບບ-ຂົວທາງເຄຫາສະຖານ ແລະ ການຄ້າຂາອອກ-ຂາເຂົ້າສິນຄ້າໄປຕ່າງປະເທດ; ມາຮອດປີ 2022 ທະນາຄານນະໂຍບາຍສາຂາແຂວງອັດຕະປື ແລະ ສຳນັກງານໃຫຍ່ໄດ້ເຂົ້າມາປຸກລະດົມ ແລະ ໄດ້ອອກຂໍ້ຕົກລົງເລກທີ 399/ທນບ, ລົງວັນທີ 7 ມີນາ 2022 ມອບໃຫ້ບໍລິສັດເຂົ້າມາພື້ນຟູຟາມໃນເນື້ອທີ່ 105 ເຮັກຕາ, ຕໍ່ມາທ່ານເຈົ້າແຂວງເຊກອງອອກຂໍ້ຕົກລົງເລກທີ 22/ຊກ, ລົງວັນທີ 13 ມັງກອນ 2023 ອະນຸມັດໃຫ້ກຸ່ມບໍລິສັດປັບປຸງສ້ອມແປງ-ກໍ່ສ້າງຟາມຄືນໃໝ່ ຕັ້ງຢູ່ບ້ານໂນນໜອງຫວ້າ ມີອາຄານລ້ຽງໝູທັງໝົດ 6 ຫຼັງ, ລ້ຽງໄກ່ 5 ຫຼັງ, ລ້ຽງໄກ່ໄຂ່ 1 ຫຼັງ, ສາງເກັບມ້ຽນອາຫານ 1 ຫຼັງ ແລະ ໂຮງງານຜະລິດອາຫານສັດ 1 ຫຼັງ, ເຮືອນພັກພະນັກງານ 1 ຫຼັງ ແລະ ຟາມລ້ຽງໝູພໍ່-ແມ່ພັນຢູ່ບ້ານໜອງບົງ ມີເນື້ອທີ່ 19 ເຮັກຕາ, ມີອາຄານໝູພໍ່-ແມ່ພັນ 5 ຫຼັງ, ມີເຮືອນພັກພະນັກງານ 1 ຫຼັງ ມີພະນັກງານທັງໝົດ 45 ຄົນ, ຊ່ຽວຊານຈາກປະເທດໄທ 3 ຄົນ ແລະ ຂະແໜງການລ້ຽງສັດລົງມາຊ່ວຍຊຸກຍູ້ 3 ຄົນ, ມີພະນັກງານບໍລິຫານ, ພະນັກງານຂາຍສັດ, ມີຄົນງານລ້ຽງສັດ ແລະ ມີຜູ້ອຳ ນວຍການກຸ່ມບໍລິສັດລົງເລິກໂດຍກົງ.

ທ່ານ ປອ ຄຳໄຫຼ ປັນຍາຄູນ ກ່າວໃຫ້ຮູ້ອີກວ່າ: ນັບແຕ່ປີ 2022-2025 ພວກເຮົາໄດ້ສົ່ງອອກ-ຈໍາໜ່າຍຜະລິດຕະພັນໃຫ້ຕະຫຼາດພາຍໃນແຂວງ ແລະ ຕະຫຼາດແຂວງສະຫວັນນະເຂດ, ນະຄອນຫຼວງວຽງຈັນ, ຊຽງຂວາງ, ຈຳປາສັກ, ອັດຕະປື ແລະ ແຂວງບໍ່ແກ້ວ ຊຶ່ງມີໝູພັນຊີ້ນ 87,840 ໂຕ, ໄກ່ສາມສາຍພັນ 80,000 ໂຕ, ໄກ່ລາດ 480,000ໂຕ, ໄກ່ພັນໄຂ່ 16,000ໂຕ, ໄຂ່ໄກ່ 7,956,000 ໜ່ວຍ ລວມຍອດຂາຍ 302 ຕື້ກ່ວາກີບໃນ 3 ປີ.

ປັດຈຸບັນຍັງສືບຕໍ່ລ້ຽງໝູພັນ 7,272 ໂຕ, ໝູພໍ່ພັນ 10 ໂຕ, ໝູແມ່ພັນ 500 ໂຕ, ລູກໝູເກີດໃໝ່ 1,830 ໂຕຕໍ່ 3 ເດືອນເທົ່າກັບ 5,490 ໂຕ, ໄກ່ສາມສາຍພັນ 30,000 ໂຕ, ໄກ່ລາດ 12,000 ໂຕ, ໄກ່ພັນໄຂ່ 4,000 ໂຕ ລວມໝູ ແລະ ໄກ່ທັງໝົດ 61,102 ໂຕ ສາມາດສະໜອງຄວາມຕ້ອງການຂອງຕະຫຼາດພາຍໃນໄດ້ຢ່າງພຽງ ພໍ ຫຼຸດຜ່ອນການນໍາເຂົ້າສັດຈາກຕ່າງແຂວງ ແລະ ຕ່າງປະເທດ ເພື່ອແກ້ໄຂວິກິດການທາງດ້ານເສດຖະກິດ-ການເງິນພາຍໃນແຂວງ ຕາມວາລະແຫ່ງຊາດໄດ້ກຳນົດໄວ້ ສາມາດສ້າງອາຊີບ ສ້າງວຽກເຮັດງານທຳໃຫ້ປະຊາຊົນພາຍໃນທ້ອງຖິ່ນ ປະກອບສ່ວນເຂົ້າໃນການສ້າງສາພັດທະນາປະເທດຊາດ ແລະ ພວກເຮົາມີຄວາມຕ້ອງການຫົວ ອາຫານສໍາເລັດຮູບໃນໜຶ່ງປີຈໍານວນ 7,700,400 ໂຕນ/ປີ ເພື່ອສືບຕໍ່ລ້ຽງສັດ ແລະ ທຶນເພື່ອມາຈັດຊື້ອຸປະກອນຂະຫຍາຍຟາມເປັນເງິນ 102,164,094,450 ຕື້ກີບ ແລະ ອື່ນໆ. ຂໍ້ສະດວກມີພື້ນທີ່ລ້ຽງສັດທີ່ພຽງພໍ, ມີສິ່ງປຸກສ້າງ-ອາຄານລ້ຽງສັດ, ເຮືອນພັກພະນັກງານ, ມີທຶນຮອນຂອງບໍລິສັດ, ມີພະນັກງານຄົນລາວ, ຊ່ຽວຊານລ້ຽງສັດ, ມີພາຫະນະ-ອຸປະກອນຮັບໃຊ້ໂຄງການຢ່າງຄົບຖ້ວນ ແລະ ທະນາຄານນະໂຍບາຍ, ເຈົ້າເມືອງ, ຂະແໜງການທີ່ກ່ຽວຂ້ອງເອົາໃຈໃສ່ຢ່າງໃກ້ຊິດໃນການຕິດຕາມ, ຊຸກຍູ້ຟາມລ້ຽງສັດ, ແນະນໍາວິທີການຈັດຕັ້ງປະຕິບັດໃນການປົກປັກຮັກສາການລ້ຽງສັດຢ່າງຕໍ່ເນື່ອງ. ໃນອະນາຄົດ ຈະສືບຕໍ່ຂະຫຍາຍເນື້ອທີ່ ແລະ ສັດລ້ຽງເພື່ອຕອບສະໜອງດ້ານສະບຽງອາຫານໃຫ້ມີຄວາມຍືນຍົງ ແລະ ສ້າງຄວາມເຂັ້ມແຂງໃຫ້ປະເທດຊາດ.