ເນື່ອງໃນໂອກາດວັນກຳມະກອນສາກົນ 1 ພຶດສະພາ 2025 ຄົບຮອບ 139 ປີ ທີ່ຈະມາເຖິງນີ້ ແນໃສ່ຊຸກຍູ້, ສົ່ງເສີມ ເຮັດໃຫ້ແຮງງານລາວ ກໍຄືໂຮງງານຕັດຫຍິບ ຢູ່ ສປປ ລາວ ດຳເນີນກິດຈະການ, ຖືກຕ້ອງຕາມລະບຽບການ ແລະ ກົດໝາຍ ທີ່ ສປປ ລາວ ວາງອອກ.
 |
ທ່ານ ອານິດ ຢາການາກີ ຮອງຜູ້ອຳນວຍການໂຮງງານ ລາວຢາມາກິ ຈຳກັດໄດ້ລາຍງານວ່າ: ໂຮງງານລາວຢາມາກິ ຈຳກັດ ເປັນໂຮງງານຜະລິດເສື້ອຜ້າ ເພື່ອສົ່ງອອກໄປຕ່າງປະເທດ ເປັນຕົ້ນແມ່ນ ບັງກາລາເທດ, ປະເທດໄທ ຊຶ່ງໂຮງງານດັ່ງກ່າວແມ່ນໄດ້ດຳເນີນທຸລະກິດມາແຕ່ ປີ 2006 ເປັນຕົ້ນມາ, ໃນປີ 2019 ພົບກັບບັນຫາ ແລະ ຄວາມຫຍຸ້ງຍາກທາງດ້ານແຮງງານຫຼຸດໜ້ອຍລົງ ບວກກັບສະພາບເສດຖະກິດເງິນເຟີ້ ຊຶ່ງໃນປັດຈຸບັນນີ້ແມ່ນມີພະນັກງານທັງໝົດ 280 ຄົນ ທີ່ທາງໂຮງງານຕ້ອງການແມ່ນ 400 ກວ່າຄົນ ເຮັດໃຫ້ສົ່ງຜົນຕໍ່ການຜະລິດ ບໍ່ສາມາດຜະລິດສິນຄ້າອອກສົ່ງໃຫ້ລູກຄ້າໄດ້ຕາມຄາດ ໝາຍ ເພາະວ່າແຕ່ກ່ອນແມ່ນສາມາດຜະລິດໄດ້ 4,000 ໂຕຕໍ່ມື້ ແລະ ໃນປັດຈຸບັນນີ້ແມ່ນສາມາດຜະລິດໄດ້ 1,500 ໂຕຕໍ່ມື້ໂດຍສະເລ່ຍ.
ທ່ານນາງ ອຳພອນ ວັນວິໄລ ຫົວໜ້າຝ່າຍບຸກຄະລາກອນໄດ້ລາຍງານວ່າ: ໂຮງງານ ໂກລິງ ລາວ ຈຳກັດ ເປັນໂຮງງານຜະລິດເກີບ ເພື່ອສົ່ງອອກໄປຕ່າງປະເທດ ໃນນີ້ສົ່ງອອກຈຳນວນ 24 ປະເທດ ມີຈຳນວນພະນັກງານທັງໝົດ 2,000 ກວ່າຄົນ ຍິງ 1,300 ກວ່າຄົນ, ໃນນີ້ມີແຮງງານຕ່າງປະເທດຄື: ບັງກາລາເທດ 128 ຄົນ, ຈີນ 24 ຄົນ, ສາມາດຜະລິດເກີບ ໄດ້ 3,000 ກວ່າຄູ່ຕໍ່ມື້, ສາມາດສົ່ງອອກ 1 ລອດໄດ້ປະມານ 5,000 ກວ່າຄູ່ ຕໍ່ລອດ ເຖິງຢ່າງໃດກໍຕາມ ສອງໂຮງງານດັ່ງກ່າວ, ໄດ້ມີສະຫວັດດີການ ແລະ ສິ່ງອຳນວຍຄວາມສະດວກຕ່າງໆ ເປັນຕົ້ນ ມີທີ່ພັກໃຫ້ຢູ່ບໍ່ໄດ້ເສຍຄ່າ, ມີເງິນອຸດໜູນຕ່າງໆ ແລະ ບໍລິການອື່ນໆ ໃຫ້ກັບພະນັກງານ ຢູ່ພາຍໃນໂຮງງານຢ່າງທົ່ວເຖິງ.
 |
ທ່ານນາງ ແກ້ວ ຈັນທະວີໄຊ ກໍໄດ້ສະແດງຄວາມຊົມເຊີຍ ຕໍ່ການຈັດຕັ້ງປະຕິບັດວຽກງານ ຂອງສອງໂຮງງານດັ່ງກ່າວ ກໍຄື ຜູ້ບໍລິຫານໂຮງງານ ແລະ ແຮງງານທຸກຄົນ ທີ່ໄດ້ມີຄວາມຂະຫຍັນ, ຫ້າວຫັນ ພ້ອມກັນຈັດຕັ້ງປະຕິບັດພາລະບົດບາດ, ໜ້າທີ່ຂອງຕົນເອງດ້ວຍຄວາມຮັບຜິດຊອບ ໂດຍສະເພາະ ຜູ້ບໍລິຫານໂຮງງານ ທີ່ສາມາດຂັບເຄື່ອນ ທຸລະກິດຂອງຕົນເອງ ນັບແຕ່ໄດ້ຮັບການສ້າງຕັ້ງຈົນມາຮອດປັດຈຸບັນ ເຮັດໃຫ້ໂຮງງານມີຜົນສຳເລັດ ແລະ ຂະຫຍາຍຕົວຢ່າງຕໍ່ເນື່ອງ ຊຶ່ງໄດ້ປະກອບສ່ວນເຂົ້າໃນການພັດທະນາເສດຖະກິດ - ສັງຄົມ ຂອງ ສປປ ລາວ ໃຫ້ມີການຂະຫຍາຍຕົວຂຶ້ນໄປເລື້ອຍໆ.
 |
ພ້ອມດຽວກັນນັ້ນ, ໂຮງງານຍັງໄດ້ມີຄວາມເອົາໃຈໃສ່ໃນການເບິ່ງແຍງດ້ານເງື່ອນໄຂການເຮັດວຽກ, ສຸຂະພາບ ແລະ ຄວາມປອດໄພຂອງແຮງງານ ເປັນຕົ້ນສະຫວັດດີການແຮງງານ ຕິດພັນກັບເງິນເດືອນຄ່າແຮງງານ, ການເຂົ້າສູ່ລະບົບປະກັນສັງຄົມ, ເຮັດໃຫ້ໂຮງງານມີຄວາມໝັ້ນຄົງ, ບໍ່ຂາດແຄນແຮງງານ, ທັງໄດ້ມີການກະຕຸ້ນໄວ ເພື່ອຫັນປ່ຽນການບໍລິຫານຄຸ້ມຄອງ, ຕິດພັນກັບການຄຸ້ມຄອງແຮງງານໄປສູ່ກົນໄກໃໝ່ ໃຫ້ສອດຄ່ອງກັບສະພາບເງື່ອນໄຂຄວາມເປັນຈິງ, ທັງໄດ້ຊຸກຍູ້ສົ່ງເສີມ, ສ້າງວຽກເຮັດງານທຳໃຫ້ ແກ່ແຮງານລາວ ໄດ້ມີວຽກເຮັດງານທຳ, ມີລາຍຮັບ, ກຸ້ມຢູ່ກຸ້ມກິນ, ທັງເປັນການປະກອບສ່ວນ, ຊຸກຍູ້ ດຶງດູດເອົາແຮງງານລາວເຂົ້າມາເຮັດວຽກຢູ່ພາຍໃນປະເທດ, ຫຼຸດຜ່ອນອັດຕາການຫຼັ່ງໄຫຼຂອງແຮງງານລາວ ອອກໄປເຮັດວຽກຢູ່ຕ່າງປະເທດ ຕື່ມອີກ, ເພື່ອຂັບເຄື່ອນການເຄື່ອນໄຫວທຸລະກິດຂອງໂຮງງານດັ່ງກ່າວ, ໃຫ້ໄປຕາມຈຸດປະສົງ ແລະ ຄາດໝາຍທີ່ຕັ້ງໄວ້ ໃນແຕ່ລະໄລຍະ, ພ້ອມທັງຍິນດີຈະໃຫ້ການຮ່ວມມື, ປະສານສົມທົບ ເພື່ອແກ້ໄຂບັນດາບັນຫາຕ່າງໆທີ່ເກີດຢູ່ພາຍໃນໂຮງງານ ເພື່ອເຮັດໃຫ້ການດຳເນີນທຸລະກິດຂອງໂຮງງງານ ມີການຂະຫຍາຍຕົວຢ່າງຕໍ່ເນື່ອງ, ສາມາດຜະລິດສິນຄ້າສົ່ງອອກ ໃຫ້ພຽງພໍກັບຄວາມ ຕ້ອງການຂອງຕະຫຼາດ.
ຂ່າວ-ພາບ: ບຸນອູ້ມ
ຄໍາເຫັນ